1, 2. Matut nna rawt jat wa ai hte maren, hpa galaw na matu sharin la lu ai kun? Ga shadawn langai jaw u.

MASHA langai gaw ma langai hpe kumhpa jaw ai ngu nna shingran yu u. Dai shaloi, kanu kawa ni gaw ma hpe ndai hku tsun shangun ai: “Chyeju kaba sai ngu tsun u.” Shi hpe tsun shangun ai majaw sha, shi tsun dat ai. Raitim, asak kaba wa ai shaloi gaw, kaga ni tsawra myit madun ai shaloi chyeju dum ai lam madun na matu, kanu kawa ni hpa majaw myit ai hpe shi chye na wa ai. Chyeju dum chye na matu sharin la wa ai majaw, kaga ni hpe shi nan chyeju dum chye wa ai.

² Anhte hta mung dai hte bung ai lam nga ai. Yehowa a lam shawng nnan chye wa ai shaloi, shi a matsun ga ni hpe madat mara na matu, kade daram ahkyak ai lam sharin la wa ai. Raitim, teng man lam hta rawt jat na matu shakut ai shaloi, Yehowa a myit mang ai lam, gara hpe ra sharawng ai, gara hpe gaw n ra ai ngu ai lam ni hpe grau sharin la lu wa ai. Anhte a galaw hkawm sa ai lam ni hte lata ai lam ni hta, Yehowa a ningmu shingkang ka-up na nga yang, shi zawn anhte chye myit wa na re.

3. Yehowa zawn myit na matu hpa majaw yak ai kun?

³ Yehowa zawn myit chye hkra sharin la ai shaloi anhte grai  kabu tim, n hkum tsup ai ni re ai majaw, kalang lang rai yang, shi myit ai hku myit na matu yak chye ai. Ga shadawn, akyang hten za ai lam, arung arai marin ai lam, hkaw tsun bungli, sai hpe shut ai hku akyu jashawn ai lam hte kaga lam ni hta Yehowa a ningmu hpe chye na na matu yak chye ai. Rai yang, Yehowa zawn grau nna myit chye wa hkra, gara hku sharin la mai na kun? Dai zawn myit chye ai gaw, ya aten hte htawm hpang a matu kaja ai dawdan lam jahkrat lu hkra gara hku karum ya na kun?

4. Myit jasat hpe galai shai ra ai ngu ai gaw hpa lachyum rai kun?

⁴ Roma 12:2 hpe hti u. Ndai Chyum daw hta, Yehowa zawn myit lu hkra, anhte hpa galaw ra na hpe kasa Pawlu tsun da ai. Dinghta ga a myit hku n hkan dagraw na matu tsun da ai. Mungkan ga a ningmu hte myit jasat ni hpe nyet kau ra ai lam, shawng na sumhpa hta hkaja wa sai. Raitim, anhte a myit jasat hpe galai shai ra ai ngu nna mung, Pawlu tsun wa ai. Tsun mayu ai gaw, Karai a Mungga hpe hkaja ra ai. Karai a myit mang lam hpe chye hkra galaw nna sawn sumru ra ai. Shi a myit mang ai lam nga na matu shakut ra ai.

5. Hti ai hte hkaja ai gaw gara hku shai ai hpe sang lang dan u.

⁵ Hkaja ai ngu ai gaw, ntsa lam alawan hti kau ai (sh) mahtai ni hpe mahkret matsing da ai daram sha n re. Anhte hkaja ai shaloi, ndai lam gaw Yehowa hte seng nna hpa sharin ya ai, hpa majaw shi dai hku myit ai, galaw ai ngu ai lam ni hpe myit ra ai. Ndai lam hpe hpa majaw galaw shangun ai (sh) hpa majaw koi shangun ai hpe mung, chye na hkra shakut ra ai. Anhte a galaw hkawm sa ai lam hte myit mang ai lam ni hta, hpa ni galai shai ra ai hpe mung, myit yu ra ai. Anhte hkaja shagu, dai lam ni yawng hpe myit sawn sumru lu na gaw n re. Raitim, hkaja ai aten a ka-ang hkup daram hpe, sawn sumru na matu aten jaw ai gaw kaja ai.​—⁠Shakawn 119:97; 1 Timohti 4:15.

6. Karai a Mungga hpe myit sawn sumru na nga yang, hpa byin wa na kun?

⁶ Karai a Mungga hpe ayan na myit sawn sumru na nga yang, laklai ai lam ni byin wa na re. Yehowa a myit mang ai lam gaw hkum tsup ai ngu ai hpe ‘tinang hkum tinang sakse madun lu na’ (sh) tinang nan kam wa na re. Masa lam ni hte seng nna Yehowa gara hku mu mada ai hpe chye na wa nna, shi a ningmu ni hpe hkap la lu wa na re. Dai majaw, anhte a myit mang ai lam hpe galai shai nna, lam nnan hku myit mang ra ai. Dai hku nna, Yehowa zawn myit chye wa na re.

7, 8. (a) Arung arai hte seng nna Yehowa gara hku mu mada ai kun? (Sumhpa shawng na sumla ni hpe yu u.) (b) Arung arai ni hpe Yehowa zawn mu mada na nga yang, hpa lam gaw anhte a matu ahkyak htum rai na kun?

⁷ Myit mang ai lam gaw, galaw ai lam hta akyu shabyin ya lu ai. (Marku 7:21-23; Yaku 2:17) Dai lam hte seng nna asan sha chye na lu na matu, ga shadawn nkau hpe myit yu ga. Langai, Yesu shangai wa ai labau hpe yu yang, arung arai hte seng nna Yehowa gara hku mu mada ai hpe asan sha chye lu ai. Kasha Yesu hpe bau maka na matu, Yosep yan Mari hpe Karai Kasang lata wa ai. Shan yan gaw matsan ai ni re. (Jaw Jau 12:8; Luka 2:24) Yesu shangai ai shaloi, Mari gaw Yesu hpe, “ushat wakang hta kaleng tawn da wu ai; kaning rai nme law, manam jarawp hta shanhte a matu nga shara n nga ma lu ai” majaw re. (Luka 2:7) Grau nna nga manu ai shara hta Yesu shangai wa hkra, Yehowa lajang  ya mai ai. Raitim, Karai Kasang hpe nawku dawjau ai lam hpe shawng tawn ai dinghku hta, Yesu hpe kaba wa shangun mayu ai. Dai lam gaw Yehowa a matu, ahkyak htum lam re.

⁸ Yesu shangai wa ai labau gaw, arung arai hte seng nna Yehowa a ningmu hpe chye shangun ai. Kanu kawa nkau gaw, shanhte a ma ni Yehowa hte hku hkau lam hten za na masa nga yang pyi, arung arai law law tam shangun mayu ma ai. Raitim, Yehowa a ningmu hta ahkyak htum gaw, anhte hte shi a hku hkau lam re. Dai lam hte seng nna Yehowa a ningmu hpe nang hkap la ai kun? Nang galaw ai lam gaw hpa hpe madun nga ai kun?​—⁠Hebre 13:5 hpe hti u.

9, 10. Kaga masha ni hpe ahtu kataw shangun ai lam hte seng nna Yehowa zawn mu mada ai lam gara hku madun mai na kun?

⁹ Lahkawng gaw, kaga masha ni hpe ahtu kataw shangun ai wa hte seng nna Yehowa gara hku mu mada ai lam re. Yesu ndai hku tsun ai: “Ndai kam sham nga ai ma kaji ni hta na langai mi hpe, myit kataw shangun ai wa kadai rai timung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai.” (Marku 9:42) Dai gaw grai ahkyak shatai ra na ga re. Yesu gaw shi Kawa hte bung ai hpe anhte chye ga ai. Dai majaw, Yesu a sape langai hpe myit kataw shangun ai wa kadai hpe mung, Yehowa n ra sharawng ai lam anhte chye lu ai.​—⁠Yawhan 14:9.

¹⁰ Ahtu kataw shangun ai hte seng nna Yehowa hte Yesu zawn nang mu mada ai kun? Anhte a galaw hkawm sa ai lam gaw hpa hpe madun nga ai kun? Ga shadawn, bu hpun mawn sumli ai hte seng nna nang ra sharawng ai lam nga na re. Raitim, dai hku bu hpun mawn sumli ai gaw, nawku hpung kaw nna marai langai ngai hpe ahtu kataw shangun ai (sh) nse nsa myit ni byin wa shangun ai nga yang hpa galaw na kun? Hpunau nauna ni hpe tsawra ai myit gaw, anhte ra sharawng ai lam ni hpe asum hkam kau na matu shadut ya ai kun?​—⁠1 Timohti 2:9, 10.

11, 12. Tinang myit hpe hkang nna, Yehowa nju ai hpe nju ndawng ai nga yang, n kaja ai hpe n galaw na matu anhte hpe gara hku karum ya ai kun?

¹¹ Masum, n hkru ai lam hpe Yehowa nju ndawng ai. (Esaia 61:8) Anhte gaw n hkum tsup ai ni re ai majaw, jaw ai hpe galaw na matu, kalang lang rai yang yak ai hpe Yehowa chye na ai. Raitim, shi zawn sha n kaja ai hpe nju ndawng shangun mayu ai. (Shakawn 97:10 hpe hti u.) N kaja ai lam ni hpe Yehowa hpa majaw nju ndawng ai lam myit sawn sumru na nga yang, shi myit ai hku myit chye wa na re. N kaja ai lam yawng hpe ninghkap lu na matu mung n-gun atsam lu na re.

¹² N kaja ai hpe nju na matu sharin la na nga yang, masa lam nkau hte seng nna shut ai ngu Chyum Laika hta tup hkrak n tsun da tim pyi, dai lam ni gaw shut ai ngu chye na wa na re. Ga shadawn, akyang lailen hten za ai ka manawt ai lam langai (lap dancing) gaw, dai ni aten mungkan hta grai gumhkawng wa nga ai. Dai zawn ka manawt ai gaw, marai langai ngai hte hkum shan kanawn ai n re ai majaw, n kaja ai lam n re ngu  nna masha nkau sawn la ma ai. * Dai lam hte seng nna Yehowa teng sha gara hku hkamsha ai kun? N kaja ai lam yawng mayawng hpe Yehowa nju ai lam myit dum u. Tinang myit hpe hkang lu hkra sharin la let, Yehowa nju ai hpe nju ndawng ai hku nna, n kaja ai lam yawng hte tsan tsan nga ga.​—⁠Roma 12:9.

13. Htawm hpang hta hpaji rawng ai hku dawdan lu na matu, ya aten kaw nna masa lam ni hpe Yehowa zawn hpa majaw myit ra ai kun?

¹³ Anhte hkaja ai shaloi, masa lam ni hpe Yehowa gara hku mu mada ai hpe myit ging ai. Dai hku myit na nga yang, hpaji rawng ai hku dawdan lu hkra karum ya na re. Dawdan lam kalang ta jahkrat ra na masa ni hte anhte hkrum ai shaloi hta mung, myit kahpra sana n re. (Ga Shagawp 22:3) Chyum Laika kaw nna kasi ningli nkau hpe hkaja yu ga.

14. Hputihpa a madu jan hpe tsun ai Yosep a ga ni kaw nna hpa sharin la lu ai kun?

¹⁴ Hputihpa a madu jan gaw Yosep hpe hkalem ai shaloi, shi kalang ta ninghkap kau ai. Dinghku hte seng nna Yehowa a ningmu hpe Yosep myit sumru da ai hpe chye lu ai. (Ningpawt 39:8, 9 hpe hti u.) Yosep ndai hku tsun ai: “Dai n hkru ai amu kaba hte Karai Kasang a man e ngai kaning rai shut hpyit lu na rai ta?” Karai a ningmu shi hta nga ai hpe madun nga ai. Anhte gaw gara hku kun? Nang hpe na a bungli manang gaw sawse lawklek wa yang hpa galaw na kun? Shing nrai, marai langai ngai gaw, ngang hte seng nna dan dawng hkra ka da ai laika ni (sh) sumla ni hpe na a phone de sa ya ai nga yang gaw gara hku kun? * Dai zawn masa ni hte seng nna Yehowa gara hku mu mada ai lam sharin hkam la da na nga yang, hpa galaw na hpe tau hkrau dawdan da lu nna, Yehowa hpe mung sadi dung lu na re.

15. Hebre ramma masum zawn, Yehowa hpe anhte gara hku sadi dung mai na kun?

¹⁵ Shadrak, Meshak, Abed-nego ngu ai Hebre la sha masum a kasi ningli hpe mung myit yu ga. Hkawhkam Nebuhkadneza gaw, shi galaw da ai ja sumla hpe nawku na matu matsun ai shaloi, shanhte gaw ningdang kau ma ai. Yehowa hpe sadi dung ai nga yang, hpa byin wa na hte seng nna myit da ngut chyalu re ai lam hkawhkam hpe htai ai mahtai kaw nna asan sha chye lu ai. (Pru Mat 20:4, 5; Daniela 3:4-6, 12, 16-18) Dai ni aten hta gaw gara hku kun? Shut shai ai nawku htung hte matut mahkai nga ai lamang hta alu bang na matu, bungli madu gaw nang hpe tsun yang gara hku galaw na kun? Dai zawn masa garai n byin shi ai ya aten kaw nna, dai lam ni hte seng ai Yehowa a ningmu hpe myit sawn sumru da ai gaw kaja htum re. Dai zawn masa ni hte anhte hkrum yang, Hebre ramma masum galaw wa ai hte maren, jaw ai hpe tsun na matu hte galaw na matu grau loi na re.

16. Hkyak hkyak tsi tsi ra ai hte seng nna tau hkrau shajin da na matu, Yehowa a ningmu hpe chye da ai gaw anhte hpe gara hku karum ya na kun?

¹⁶ Yehowa myit mang ai lam hpe myit sumru  ai gaw, hkyak hkyak tsi tsi ra wa ai aten hta mung, matut sadi dung na matu karum ya ai. Sai (sh) sai a madung daw mali hpe n bang na matu, anhte dawdan da ga ai. (Kasa 15:28, 29) Raitim, Hkristan langai hpra gaw Chyum Laika npawt tara ni hta madung nna, sai hte seng ai lam hpe dawdan ra na lam ni naw nga ai. Hpa galaw na ngu ai hte seng nna dawdan na matu, galoi aten gaw kaja htum rai na kun? Machyi makaw hkrum nna, dawdan lam ni hpe alawan jahkrat ra na aten (sh) tsi rung lung nga ai aten hta kun? Tsep kawp n re ai. Tsi tsi ai hte seng nna sawk sagawn ai lam ni galaw na matu, tinang galaw mayu ai lam ni hpe asan sha sang lang dan ai tara shang laika ka na matu hte sarawun hte tsun shaga na matu gaw ya aten re. *

17-19. Yehowa a ningmu hpe ya aten kaw nna anhte sharin da na matu hpa majaw ahkyak ai kun? Ga shadawn langai tsun dan rit.

¹⁷ Hpang jahtum hku nna, “Madu e, dai nang hta n byin u ga” ngu nna hpaji n rawng ai hku Petru tsun ai hpe, Yesu bai htang wa ai lam hpe myit yu ga. Yesu gaw shi hte seng nna tau hkrau myihtoi da ai lam ni, mungkan ntsa hta si ra na lam ni hte Karai Kasang ra sharawng ai lam ni hpe Yesu atsawm myit sawn sumru wa na re. Dai lam ni gaw, Yehowa hpe matut nna sadi dung na matu hte anhte yawng a matu shi a asak hpe gawng malai hkungga hku nna jaw na matu karum ya wa ai.​—⁠Mahte 16:21-23 hpe hti u.

¹⁸ Dai ni aten hta, Karai Kasang gaw anhte hpe shi a jinghku byin shangun mayu nna, dang lu ai daram kabu gara shiga hkaw tsun shangun mayu ai. (Mahte 6:33; 28:19, 20; Yaku 4:8) Raitim, Yesu hpe Petru tsun wa ai zawn, masha nkau gaw kaja ai yaw shada lam hte anhte hpe shadut wa chye ai. Ga shadawn, bungli madu gaw nang gumhpraw law law lu la na matu, ahkaw ahkang jaw wa ai ngu saga. Raitim, dai gaw nawku hpung hte hkaw tsun bungli hta nang akyu jashawn nga ai aten nkau mi hpe, jaw kau ra na nga yang gaw gara hku kun? Shing nrai, nang gaw jawng lung nga ai rai yang, nta hte grai tsan ai shara de sa nna, kahtap nna hpaji sharin la lu na matu, sara ni gaw ahkaw ahkang jaw wa  ai ngu saga. Dai zawn masa hte hkrum wa yang, garai n dawdan shi ai shaloi, akyu hpyi sawk sagawn nna, nta masha ni (sh) myitsu salang ni hpe nang tsun dan na kun? Dai lam ni hta, Yehowa gara hku mu mada ai hpe sharin la nna, shi a ningmu hpe na a ningmu byin hkra, ya aten kaw nna galaw da na nga yang grau kaja ai. Dai hku galaw da na nga yang, dai zawn masa ni hte hkrum wa ai shaloi, aloi sha ningdang kau lu na re. Yehowa a magam gun ai lam hta, myit maju jung na matu dawdan da ngut chyalu re ai majaw, hpa galaw ra na hpe tup hkrak chye ai.

¹⁹ Na a sadi dung ai lam hpe, n myit mada ai sha chyam dinglik wa chye ai kaga masa ni hpe mung, nang myit da mai ai. Byin wa chye ai masa yawng a matu gaw, tau hkrau shajin da lu na n re. Raitim, tinang hkrai hkaja ai aten hta, Yehowa a myit mang ai lam hpe sumru da na nga yang, gara masa hta mi raitim, anhte hkaja da ai lam ni hpe gara hku hkan sa mai na lam bai dum wa na re. Dai majaw, anhte hkaja ai shaloi, masa lam ni hpe Yehowa gara hku mu mada ai hpe tam sawk sagawn ga. Shi a ningmu gaw anhte a ningmu byin wa nna, ya aten hte htawm hpang hta hpaji rawng ai dawdan lam ni jahkrat lu na matu gara hku karum ya ai hpe myit da ga.

20, 21. (a) Mungkan nnan hta anhte hpa majaw lawt lu lam nga na kun? (b) Ya aten hta mung gara hku ngwi pyaw lu ai kun?

²⁰ Anhte yawng mungkan nnan hpe myit mada nga ga ai. Anhte law malawng gaw, mungkan Hparadisu hta htani htana asak hkrung na matu myit mada nga ai. Karai a Mungdan npu hta, ya aten hkrum nga ai mayak mahkak ni hte hkra machyi ai lam ni kaw nna lawt lu na re. Tinang ra sharawng ai, ra marin ai hta hkan nna wanglu wanglang lata lu ai lawt lu ai lam nga na re.

²¹ Raitim, shadawn sharam n nga ai lawt lu lam lu na ngu ai lachyum gaw n re. Myit shagrit shanem ai ni gaw, Yehowa a tara hte shi a myit mang ai lam hta madung tawn nna dawdan lam ni jahkrat ra na re. Kabu gara let ngwi pyaw simsa lu na re. (Shakawn 37:11) Dai aten garai n du wa shi tim, Yehowa a ningmu hpe anhte a ningmu byin hkra galaw na nga yang, ya aten hta mung ngwi pyaw lu na re.