1. Grau htum ai tsawra myit gaw hpa rai kun? Dai hpe nang gara hku madun na kun? (Ndai sumhpa shawng na sumla hpe yu u.)

YEHOWA gaw tsawra myit a npawt rai nga ai. (1 Yawhan 4:7) Grau htum ai tsawra myit gaw, teng man ai npawt tara hta madung tawn ai. Chyum Laika hta dai zawn tsawra myit hpe Greek ga hku a·gaʹpe ngu ai ga si hpe lang ai. Dai tsawra myit hta marai langai ngai hpe tsawra ai hte alum ala hkamsha ai lam lawm ai. Raitim, dai hta hkamsha lam sha n-ga kaga ni a akyu lu na matu, tingkyeng myit n rawng ai amu bungli lawm ai. Kaga ni hpe kaja ai hku galaw ya na matu anhte hpe shadut ya ai. Dai zawn tsawra myit gaw, anhte hpe ngwi pyaw shangun nna lachyum rawng ai aprat hpe lu shangun ai.

2, 3. Yehowa gaw masha ni hpe tingkyeng akyu n tam ai tsawra myit gara hku madun wa ai kun?

² Yehowa gaw Adam yan Ewa hpe n hpan shi ai aten kaw nna masha hpe tsawra ai lam madun wa ai. Anhte asak hkrung na matu ra ai lam yawng lawm hkra, mungkan ga hpe hpan da ya ai. Dai hta n-ga, mungkan ga kaw anhte teng sha ngwi pyaw ai aprat lu na matu mung hpan da ai. Yehowa gaw shi a matu  galaw da ai n re ai sha, anhte a matu galaw da ai re. Mungkan ga hpe hkum tsup hkra hpan ngut jang she, masha hpe shi hpan ai. Shan hpe mungkan hparadisu hta htani htana asak hkrung na myit mada lam mung shi jaw wa ai.

³ Dai hpang, Yehowa gaw masha ni hpe, tingkyeng akyu n tam ai tsawra myit hpe kaja htum madun wa ai. Adam yan Ewa gaw shi hpe gumlau wa tim, shan a kashu kasha ni kaw nna shi hpe tsawra ai ni hpe hkye la na matu, shi a Kasha hpe gawng malai hkungga hku nna lajang ya wa ai. (Ningpawt 3:15; 1 Yawhan 4:10) Gawng malai jahpu a lam Yehowa ga sadi jaw ai aten kaw nna, dai shagu hkungga hpe jaw ngut sai ngu shi mu mada ai. Shaning 4,000 daram na ai hpang, Yehowa gaw shi a Kasha shingtai hpe shinggyim masha a matu jaw wa ai. (Yawhan 3:16) Yehowa a tsawra myit hpe anhte grai chyeju dum ai.

4. Masha gaw n hkum tsup tim, tingkyeng akyu ntam ai tsawra myit hpe madun lu ai lam anhte gara hku chye lu ai kun?

⁴ Anhte gaw n hkum tsup ai ni raitim, tingkyeng akyu n tam ai tsawra myit hpe madun mai na kun? Madun mai ai. Yehowa gaw shi a hkrang sumla hte maren, anhte hpe hpan da ai majaw, shi hta nga ai atsam hpe anhte hkan galaw mai ai. Anhte ni gaw tingkyeng akyu n tam ai tsawra myit hpe madun na matu n loi tim, mai madun ai. Abela gaw shi hta nga ai kaja htum hpe tingkyeng akyu n tam ai myit hte hkungga nawng nna, Karai Kasang hpe tsawra ai lam madun wa ai. (Ningpawt 4:3, 4) Noa mung Karai a shiga hpe masha ni n madat tim, shaning law law hkaw tsun ai hku nna tingkyeng akyu n tam ai tsawra myit madun wa ai. (2 Petru 2:5) Abraham mung tsawra dik ai kasha Isak hpe sharawng awng let shagu hkungga jaw ai hku nna, Karai Kasang hpe yawng hta grau tsawra ai lam madun wa ai. (Yaku 2:21) Dai sadi dung ai masha ni zawn, anhte mung tsawra myit hpe madun na matu n loi tim madun mayu ga ai.

5. Jet ai tsawra myit hpe gara hku madun mai ai kun?

⁵ Chyum Laika hta anhte madun ai jet ai tsawra myit hpe ndai hku tsun ai: “ga hte, n-gup shinglet hte sha n rai, amu bungli hta madun dan ai teng man tsaw ra myit rai ra nga ai.” (1 Yawhan 3:18, JCLB) Dai gaw tsawra myit hpe n-gup ga hte n tsun ra ai ngu ai lachyum kun? N re. (1 Htesaloni 4:18) “Nang hpe ngai tsawra ai” ngu n-gup ga hte tsun ai daram sha n-ga anhte tsun ai hte maren tatut madun ra ai. Ga shadawn, hpunau nauna ni hta malu masha (sh) bu hpun palawng n nga yang, shanhte gaw kaja ai shachyen shaga ai ga hta n-ga grau ra ai. (Yaku 2:15, 16) Dai zawn sha, anhte gaw Yehowa hte hting bu ni hpe tsawra ai majaw, hkaw tsun masha law na matu akyu hpyi ai sha n ga, hkaw tsun magam hta shakut nna mung shang lawm ai.​—⁠Mahte 9:38.

6, 7. (a) “Hpyi hpun ai hpe koi” ngu ai gaw hpa rai kun? (b) Masu ai tsawra myit madun ai ga shadawn nkau gaw hpa rai kun?

⁶ Dai majaw anhte a tsawra myit gaw “hpyi n hpun ai” (sh) “hpyi hpun ai hpe koi” ra ai. (Roma 12:9, NW; 2 Korinhtu 6:6, NW) Kalang lang, masha langai gaw tsawra ai lam hpe masu nna madun ma ai. Shi a tsawra myit gaw jet ai kun? Shi hpe hpa gaw shadut ya ai  kun? Tsawra myit hta hpyi hpun ai lam n nga ai. Masu ai tsawra myit gaw manu n dan ai.

⁷ Masu ai tsawra myit madun ai lam nkau hpe hkaja yu ga. Satan gaw Edin sun hta Ewa hpe ga shaga ai shaloi, Ewa akyu a matu tsun ai zawn re. Raitim, shi galaw ai lam gaw n rai taw nga ai. (Ningpawt 3:4, 5) Dawi hkawhkam re ai shaloi, shi a manang gaw Ahihtohpela re. Raitim, Ahihtohpela gaw shi a akyu matu Dawi a ntsa sadi n dung wa ai. Shi galaw ai lam gaw manang majing hku n rai taw nga ai. (2 Samuela 15:31) Dai ni aten hta mung, makam masham htak mat ai ni hte nawku hpung hka bra na matu galaw ai ni gaw “ga sau ga pyaw hte hkalem” nga ma ai. (Roma 16:17, 18) Shanhte gaw kaga ni hpe yu lanu lahku ai zawn galaw dan tim, teng sha nga yang tinang akyu a matu re.

8. Tinang hkum tinang hpa ga san ni san ra ai kun?

⁸ Masu ai tsawra myit gaw kaya kahpa re. Dai hpe hkalem ai masha ni gaw madun ai. Anhte gaw masha hpe mai masu tim, Yehowa hpe gaw n mai masu ai. Yesu gaw hpyi hpun ai akyang nga ai ni hpe “katawng daw kau” nna ari jaw na ngu tsun ai. (Mahte 24:51) Yehowa a mayam ni re ai anhte gaw hpyi hpun ai baw n galaw mayu ga ai. Dai majaw, tinang hkum tinang ndai hku san ra ai: ‘Nye a tsawra myit gaw jet ai kun? (sh) Ngai gaw tinang akyu sha tam nna n ding man ai masha kun?’ “Hpyi n hpun ai” tsawra myit madun mai ai lam jahku hpe hkaja yu ga.

9. Teng man ai tsawra myit gaw anhte hpe hpa galaw na matu shadut ya ai kun?

⁹ Nang galaw ai hpe kadai mung n sadi hkrup yang pyi kabu gara let galaw u. Anhte galaw ai hpe kadai mung n chye tim, kaga ni a matu tsawra myit, matsan dum ai myit hte sharawng awng let galaw ya ra ai. (Mahte 6:1-4 hpe hti u.) Anani hte Sahpira hta dai myit jasat n nga ai. Shan alu bang ai shaloi masha ni hpe chye shangun mayu ai. Kade daram alu jaw ai hpe mung masu nna tsun wa ai. Dai majaw, ari jaw hkrum wa ai. (Kasa 5:1-10) Raitim, anhte gaw hpunau nauna ni hpe teng sha tsawra yang, shanhte a matu tsawra myit hte galaw ya ai lam ni hpe masha ni n chye tim kabu nga na re. Wenyi shat jaw ai Uphkang Hpung hpe karum ya nga ai hpunau ni kaw nna anhte sharin la lu ai. Shanhte gaw, shanhte hkum shanhte myit maju jung ai lam n nga ai. Hpa lamang ni galaw nga ai hpe mung masha ni hpe n chye shangun ma ai.

10. Kaga ni hpe shagrau ai lam gara hku madun mai ai kun?

¹⁰ Kaga ni hpe shagrau u. (Roma 12:10 hpe hti u.) Yesu gaw shi a sape ni a lagaw hpe kashin ya ai hku nna shanhte hpe shagrau ai lam madun wa ai. (Yawhan 13:3-5, 12-15) Yesu zawn anhte mung, shagrit shanem ai myit nga wa hkra shakut nna masha ni hpe karum ya ra ai. Kasa ni mung Yesu galaw dan wa ai lachyum hpe chyoi pra ai wenyi lu ngut yang she chye na wa ai. (Yawhan 13:7) Anhte mung, hpaji grau chye ai, grau lusu ai, laksan lit ni lu da ai majaw kaga ni hta grau ai ngu n myit ai sha, kaga ni hpe shagrau ai lam madun ga ai. (Roma 12:3) Kaga masha ni shakawn hkrum yang, anhte manawn ai myit n nga ai. Anhte mung dai zawn shakawn hkrum ging ai rai tim,  shanhte hte arau kabu ya ai.

11. Anhte a shakawn ai ga gaw hpa majaw ding man ra ai kun?

¹¹ Ding man ai myit hte shakawn ya u. Kaga ni hpe shakawn na matu ahkaw ahkang tam u. Shakawn ai gaw “shadaw shalan na matu, mai kaja ai ga” re ai hpe anhte yawng chye ga ai. (Ehpesu 4:29) Raitim, anhte a ga gaw kaga ni hpe hkyaw sha ai hku n re ai sha, ding man ai myit hte tsun mayu ga ai. Anhte gaw myit hta n lawm ai ga ni hpe tsun na n re ai zawn, sharin shaga ya ging ai aten hta mung, anhte a lit hpe koi na n re. (Ga Shagawp 29:5) Anhte gaw masha ni a man hta shakawn ya nna, shingdu hta gaw mara tam ai ga tsun na nga yang, hpyi hpun ai ni re. Kasa Pawlu a tsawra myit gaw jet ai. Korinhtu hpung hpe shi laika ka ai shaloi, shanhte teng sha galaw ai hpe shakawn ya ai. (1 Korinhtu 11:2) Raitim, shanhte hpe sharin shaga ra ai shaloi gaw, tsawra myit hte atsawm chye na hkra tsun dan wa ai.​—⁠1 Korinhtu 11:20-22.

12. Manam daw ai lam hta jet ai tsawra myit hpe anhte gara hku madun mai ai kun?

¹² Manam daw kam u. Yehowa gaw hpunau nauna ni hpe gam jaw gam ya na matu tsun da ai. (1 Yawhan 3:17 hpe hti u.) Raitim, manam daw ai shaloi anhte hta kaja ai myit jasat nga ra ai. Anhte hkum anhte ndai hku san mai ai: ‘Nye nta de grai hkau ai manang ni (sh) hpung hta lit kaba lu da ai ni hpe sha shaga ai kun? Lama ma bai jaw na masha hpe sha shaga nga ai kun? Nau n hkau ai hpunau nauna ni (sh) ngai hpe hpa mung n galaw ya ai ni hpe gam jaw gam ya ai kun?’ (Luka 14:12-14) Ndai masa hpe shingran yu u: Hpunau langai gaw hpaji n rawng ai daw dan lam jahkrat wa ai majaw, karum ya ra ai nga yang gara hku kun? (sh) Anhte saw shaga ai marai langai ngai gaw anhte hpe galoi mung chyeju n dum ai wa rai yang gaw gara hku kun? Yehowa anhte hpe ndai hku tsun ai: “Aput apai n nga ai sha, nanhte shada da manam daw ai lam a daw nga mu.” (1 Petru 4:9) Anhte teng man ai myit hte jaw yang ngwi pyaw na re.​—⁠Kasa 20:35.

13. (a) Gara aten hta anhte grau myit galu ra ai kun? (b) Gawng kya ai ni hpe anhte hpa galaw ya mai ai kun?

¹³ Gawng kya ai ni hpe karum ya u. “Gawng kya ai ni hpe shadaw shangang nga mu, masha yawng hte hpe galu kaba ai myit madun nga mu” ngu Chyum Laika hta tsun da ai majaw, anhte a jet ai tsawra myit gaw chyam dinglik hkrum chye ai. (1 Htesaloni 5:14) Makam masham gawng kya wa ai hpunau nauna law law gaw mahkam masham bai ngang wa ma ai. Raitim, nkau mi gaw tsawra myit hte myit galu ai lam hpe matut nna ra nga ai. Shanhte hpe anhte gara hku karum ya mai na kun? Chyum Laika hte n-gun jaw mai ai, hkaw tsun bungli rau sa na matu saw shaga mai ai, shanhte tsun ai hpe madat ya ai lam ni anhte galaw mai ai. Anhte yawng hta makam masham kaba ai hte  gawng kya ai lam lahkawng yan nga ai hpe dum ra ai. Dai majaw, hpunau nauna ni hpe “gawng kya ai” wa (sh) “makam masham kaba ai” wa ngu anhte n mai myit ai. Kasa Pawlu pyi, shi hta gawng kya ai lam nga ai hpe yin la wa ai. (2 Korinhtu 12:9, 10) Anhte yawng gaw shada da n-gun jaw hkat nna karum shing tau ra ai.

14. Hpunau nauna ni hte matut simsa hkra gara hku sharawng awng let galaw ra ai kun?

¹⁴ Simsa hkra galaw u. Hpunau nauna ni hte simsa lam lu ai gaw grai manu dan ai. Anhte n tara ai lam hkrum nga yang (sh) chye na shut yang pyi, simsa lam lu hkra hpa hpe raitim galaw ra ai. (Roma 12:17, 18 hpe hti u.) Anhte gaw marai langai ngai hpe myit n pyaw hkra galaw hkrup yang, shi hpe hpyi nem ra ai. Raitim, myit madung hte rai ra ai. Ga shadawn, “nang dai zawn hkamsha ai majaw ngai myit n pyaw ai” ngu tsun na malai, tinang a mara hpe yin la nna “ngai nang hpe hkra machyi hkra tsun dat ai majaw ngai myit n pyaw ai” ngu tsun yang grau kaja ai. Simsa lam gaw dinghku hta grau ahkyak ai. Madu wa hte madu jan gaw masha ni a man hta tsawra dan tim, shingdu hta gaw shada da ga pyi n shaga ai, hkra machyi hkra tsun hkat ai, hkrit hpa lam ni pyi galaw wa ai nga yang shut ai.

15. Gaja wa mara raw ya ai ngu gara hku madun mai na kun?

¹⁵ Mara raw ya u. Marai langai ngai gaw anhte hpe shut hpyit yang, shi hpe mara raw ya nna anhte a hkamsha lam hpe malap kau ra ai. Anhte hpe shut hpyit ai wa gaw shi galaw shut ai hpe n chye yang pyi, anhte gaw mara raw kau ya ra ai. Mara raw ya ai hku nna, “nanhte a tsaw ra myit hpe madun nna shada da hkam mana nga mu. Nanhte hpe shajup shangang da ai ngwi pyaw ai makyit sumri a marang e dai Wenyi e jaw ya ai myit hkrum kahkyin gumdin lam hpe atsam htum hkra kyem mazing da nga mu.” (Ehpesu 4:2, 3, JCLB) Gaja wa mara raw ya lu hkra, kaga masha ni galaw wa ai lam hpe matut nna n myit na matu ra ai. Tsawra ai myit gaw “mara n tam nga ai.” (1 Korinhtu 13:4, 5) Mara n kam raw ya yang, hpunau nauna ni  hte sha n-ga, Yehowa hte mung hku hkau lam kaja na n re. (Mahte 6:14, 15) Gaja wa mara raw ya ai nga yang, anhte hpe shut hpyit da ai masha a matu akyu hpyi ya na re.​—⁠Luka 6:27, 28.

16. Yehowa a magam hta laksan lit ni lu ai shaloi anhte gara hku hkamsha ai kun?

¹⁶ Tinang akyu hpe hkum tam. Yehowa a magam hta anhte laksan lit ni lu wa ai shaloi, “tinang akyu n re ai sha, kaga wa a akyu sha tam” nna jet ai tsawra myit hpe madun mai ai. (1 Korinhtu 10: 24) Ga shadawn, ninghtawn zuphpawng ni hte ginwang zuphpawng ni hta, manam tau ni gaw zuphpawng htingnu de kaga ni hta jau nna du ai. Dai aten hta tinang hte tinang a nta masha ni a matu shara kaja lata da na matu chyam dinglik hkrum chye ai. Raitim, shanhte kaw nna law malawng gaw, shanhte lit ang ai shara hta sha dung ma ai. Dai hku galaw nna, tinang akyu n tam ai tsawra myit hpe shanhte madun nga ai. Shanhte a kasi kaja hpe anhte gara hku hkan sa mai na kun?

17. Hkristan langai gaw mara kaba galaw hkrup nna, jet ai tsawra myit nga yang shi hpa galaw na kun?

¹⁷ Ip da ai mara hpe tawng ban nna matut hkum galaw. Hkristan nkau gaw mara kaba ni galaw da nna ip da ai. Shanhte gaw kaya ai (sh) masha ni yu kaji na tsang ai majaw byin mai ai. (Ga Shagawp 28:13) Mara hpe ip da ai gaw tsawra myit n rawng ai re. Hpa majaw nga yang, mara galaw ai wa hte kaga ni a matu shoihpa nga ai majaw re. Gara hku nna kun? Yehowa gaw shaman chyeju hku nna jaw ai chyoi pra ai wenyi hpe hkring kau ai majaw hpung hta simsa lam n nga sai. (Ehpesu 4:30) Hkristan langai gaw mara kaba galaw hkrup nna, jet ai tsawra myit nga yang myitsu salang ni hpe tsun dan nna, ra ai karum shingtau lam hpe hkap la na re.​—⁠Yaku 5:14, 15.

18. Jet ai tsawra myit gaw kade daram ahkyak ai kun?

¹⁸ Tsawra myit gaw atsam yawng hta grau htum ai atsam re. (1 Korinhtu 13:13) Tsawra myit a Npawt re ai Yehowa hpe teng sha kasi la ai ni hte Yesu hpang hkan ai ni hpe chye lu hkra dai atsam gaw karum ya ai. (Ehpesu 5:1, 2) Ngai hta tsawra myit n nga yang, ngai gaw hpa n rai nga ai nga nna Pawlu tsun wa ai. (1 Korinhtu 13:2) Anhte gaw ga hte sha n rai, amu bungli hte tsawra myit hpe matut nna madun nga ga.