1, 2. (a) Prat masa ni galai shai ai shaloi, anhte hpe gara hku hkra machyi chye ai kun? (Sumhpa shawng na sumla hpe yu u.) (b) Shakawn 131 hku nga yang, myit simsa lam lu na matu hpa gaw karum ya na kun?

LAWT yan Aletzendra gaw Behtela hta 25 ning jan magam gun ngut ai hpang, lamwoi ningshawng ni hku nna lit bai lu wa ai. Shawng nnan hta shanhte myit n pyaw ma ai. Lawt ndai hku tsun ai: “Behtela hte ngai na lit hpe ngai grai tsawra nna, kaga hpa mung galaw na matu n myit ai. Ndai hku hpa majaw galai shai ra ai hpe ngai chye na tim, bat loi mi, shata loi mi na ai hpang, ngai gaw ningdang kau hkrum ai ngu hkamsha ai.” Lawt gaw galai shai ai hte seng nna kaja ai ningmu nga dat, n kaja ai ningmu nga dat byin taw nga ai.

² Prat hta kalang lang, n myit mada da ai galai shai lam ni byin chye nna, dai gaw anhte hpe myitru myit tsang shangun nna hki ba lit li shangun chye ai. (Ga Shagawp 12:25) Galai shai ai lam  hpe hkap la na matu yak ai shaloi, matut nna myit simsa lu hkra hpa galaw lu na kun? (Shakawn 131:1-3 hpe hti u.) N myit mada da ai sha prat masa ni galai shai mat tim, matut nna myit simsa lu wa ai moi aten hte ya aten na Karai Kasang a mayam ni a lam hkaja yu ga.

3. Yosep a masa gaw n myit mada ai sha gara hku galai shai mat ai kun?

³ Yosep a lam hpe myit yu ga. Yaku gaw kasha ni yawng hta na Yosep hpe tsawra dik htum re. Dai majaw, kahpu ni gaw shi hpe manawn ma ai. Yosep asak 17 ning hta, kahpu ni gaw shi hpe mayam hku nna dut sha kau ai. (Ningpawt 37:2-4, 23-28) Yosep gaw, Egutu mung hta 13 ning daram na hkra, mayam hte bawng masha hku nna jamjau hkrum wa ai. Shi hpe grai tsawra ai kawa hte mung tsan mat wa ai. Shi masa a majaw, myit mada lam n nga sai ngu hkamsha nna myit machyi nga ai kun? Dai hku n byin wa ai. Shi hpe hpa gaw karum ya wa ai kun?

4. (a) Yosep htawng hkrat nga ai laman hpa galaw wa ai kun? (b) Yosep a akyu hpyi ga hpe Yehowa gara hku mahtai jaw wa ai kun?

⁴ Yosep htawng hkrat nga ai laman, Yehowa shi hpe gara hku karum ya nga ai hpe shi myit maju jung wa na re. (Ningpawt 39:21; Shakawn 105:17-19) Shi kaji ai shaloi mu wa ai myihtoi ga hte seng ai yup mang ni hpe mung shi myit nna, Yehowa shi hte arau rai wa ai hpe mung dum wa na re. (Ningpawt 37:5-11) Yehowa hpang chyahkring hkring akyu hpyi nna, shi myit hta nga ai lam ni yawng hpe tsun dan wa na re. (Shakawn 145:18) Yehowa gaw Yosep a akyu hpyi ga hpe mahtai jaw wa nna, hpa mi byin wa tim, “shi hte rau nga nga” na hpe kam shangun wa ai.​—⁠Kasa 7:9, 10. *

5. Yehowa hpe matut nna nawku dawjau na matu, “Karai Kasang a ngwi pyaw” lam gaw gara hku karum ya ai kun?

⁵ Kaning re ai manghkang ni hkrum wa tim, anhte hpe myit simsa shangun nna, anhte a “myit mang” lam hpe makawp maga ya ai “Karai Kasang a ngwi pyaw” lam hpe lu mai ai. (Hpilipi 4:6, 7 hpe hti u.) Myitru myit tsang nna hki ba lit li ai shaloi, “Karai Kasang a ngwi pyaw” lam gaw, asum n jaw nna Yehowa hpe matut nawku na matu n-gun lu jaw ai. Dai zawn mahkrum madup ni nga ai ya aten na hpuanau nauna ni a lam hpe hkaja yu ga.

6, 7. Akyu hpyi ai gaw, myit masin hta simsa lu hkra gara hku karum ya ai kun? Ga shadawn tsun dan u. 

⁶ Raiyan hte Juliyet gaw, laksan lamwoi ningshawng hku nna shan magam gun ai aten htum sana hpe chye ai shaloi, grai myit daw mat ai. Raiyan ndai hku tsun ai: “Dai lam hte seng nna Yehowa kaw akyu hpyi dat ai. Shi hpe kamhpa ai lam madun na ahkaw ahkang re ai hpe an chye ai. Anhte a nawku hpung kaw nna masha law law gaw, teng man ai lam de du wa ai nau n na shi ai. Dai majaw, makam masham hte seng nna kaja htum kasi madun lu hkra karum ya na matu, Yehowa kaw akyu hpyi ai.”

⁷ Shan a akyu hpyi ga hpe Yehowa gara hku mahtai jaw wa ai kun? Raiyan ndai hku tsun ai: “Akyu hpyi ngut ai hte kalang ta, n kaja ai  ningmu ni, myit tsang ai lam ni mat mat ai. Karai Kasang a ngwi pyaw ai lam gaw anhte a myit masin hte myit mang ai lam hpe bau sin makawp maga ya ai. An hta jaw ai myit jasat nga ai nga yang, Yehowa a matu akyu rawng ai ni matut byin lu na hpe chye ai.”

8-10. (a) Anhte myit tsang ai shaloi, Karai Kasang a chyoi pra ai wenyi gaw gara hku karum ya ai kun? (b) Yehowa gaw, shi a magam gun na matu myit maju jung ai ni hpe gara hku karum ya ai kun?

⁸ Karai Kasang a chyoi pra ai wenyi gaw, anhte hpe myit simsa shangun ai. Prat hta ahkyak htum gaw hpa re ai hpe chye na shangun ai Chyum daw ni hpe mung, tam mu hkra karum ya ai. (Yawhan 14:26, 27 hpe hti u.) Behtela hta 25 ning daram magam gun wa ai Hpilip yan Meri a lam hpe myit yu ga. Shata mali laman hta, shan a kanu lahkawng yan hte jinghku langai mung n nga mat ai. Bai nna, bawnu hkra machyi ana nga ai Meri a kawa hpe mung yu lajang ra ai.

⁹ Hpilip ndai hku tsun ai: “Ngai gaw dai lam ni hpe hkam sharang lu ai ngu shadu da ai. Raitim, lama ma gaw ra taw ai. Sin Langchyi sumhpa langai hta, Kolose 1:11 hpe sadi hkrup ai. Ngai hkam sharang nga ai rai ti mung, hpring tup ai madang hku gaw n re. ‘Myit galu nna ngwi pyaw let, hpring tup ai madang hku hkam sharang’ ra na re. Prat hta ngwi pyaw lam lu na gaw, prat masa ni a ntsa madung ai n re ai sha, chyoi pra ai wenyi lu ai ntsa madung ai lam, dai chyum daw gaw ngai hpe chye na shangun ai.”

¹⁰ Hpilip yan Meri gaw Yehowa a magam gun ai lam hta sha matut myit maju jung ai majaw, lam amyu myu hku shaman chyeju lu wa ai. Behtela kaw nna pru nna kade n na yang, Chyum ga sharin ni lu wa ai. Chyum ga sharin ni gaw bat mi hta kalang sha n-ga sharin mayu nna, galu kaba rawt jat wa ai. Meri ndai hku tsun ai: “Shanhte gaw an hpe ngwi pyaw shangun nna, masa lam yawng kaja mat na ngu Yehowa tsun nga ai lam re.”

11, 12. (a) Yehowa shaman chyeju jaw na lam lama ma hpe Yosep gara hku galaw wa ai kun? (b) Yosep hpe Yehowa gara hku shaman chyeju jaw wa ai kun?

¹¹ Prat masa ni n myit mada ai sha galai shai mat ai shaloi, anhte grai myit tsang wa nna, manghkang ni hpe sha myit maju jung mat chye ai. Yosep a masa gaw dai zawn hkamsha chye ai masa re. Raitim, Yosep gaw shi hkrum ai masa hte seng nna, kaja htum shi galaw lu ai hpe galaw ai. Hputihpa a matu, kaja htum bungli shakut ya wa ai zawn, htawng hta mung, sin langa agyi shangun ai lam yawng hpe galaw ya wa ai.​—⁠Ningpawt 39:21-23.

¹² Lani mi hta, Hpara-u a htingnu hta magam gun wa ai htawng ma lahkawng hpe yu  lajang ya na matu, Yosep lit ap hkrum ai. Yosep gaw shan yan hpe tsawra myit madun ai. Dai majaw, shan yan gaw, shan mu wa ai yup mang a lam hte myit tsang ai lam ni hpe tsun dan mayu wa ai. (Ningpawt 40:5-8) Shan yan hte dai zawn ga shaga lu wa ai gaw, hpang jahtum shi hpe lawt lam lu shangun na hpe Yosep n chye wa ai. Lahkawng ning na ai hpang, htawng kaw nna shi lawt wa nna, Egutu mung hta Hpara-u hta lai nna, ahkang aya kaba dik ai wa byin wa ai.​—⁠Ningpawt 41:1, 14-16, 39-41.

13. Anhte a masa lam gara hku mi raitim, Yehowa kaw na shaman chyeju lu na matu gara hku galaw mai na kun?

¹³ Yosep zawn, anhte mung n hkang lu ai masa lam ni hte hkrum chye ai. Raitim, anhte myit galu nna kaja htum galaw na nga yang, Yehowa shaman chyeju jaw na re. (Shakawn 37:5) Anhte myit shanut nga nna myit tsang nga tim pyi, lawt lam (sh) myit mada lam n nga ai gaw n re. (2 Korinhtu 4:8) Hkaw tsun magam hta myit maju jung nga na nga yang, Yehowa gaw anhte hte arau rai na re.

14-16. Prat a masa lam ni galai shai mat tim, kabu gara shiga hkaw tsun ai wa Hpilip gaw, hkaw tsun bungli hta gara hku myit maju jung nga ai kun?

¹⁴ Prat a masa lam ni galai shai mat tim, hkaw tsun magam hta myit maju jung wa ai masha ni hta na langai gaw, kabu gara shiga hkaw tsun ai wa Hpilip re. Yerusalem hta lit nnan lu ai shaloi mung, kabu gara let shi gun hpai wa ai. (Kasa 21:1-6) Dai hpang masa lam yawng galai shai mat ai. Stehpan sat hkrum nna, Hkristan ni hpe laja lana zingri ai majaw, Hkristan ni gaw Yerusalem kaw nna hprawng mat ra ai. Hpilip gaw, Yehowa a magam matut gun hpai mayu ai majaw, kabu gara shiga hpe na la na matu ra nga ai Samari mare de sa mat wa ai.​—⁠Mahte 10:5; Kasa 8:1, 5.

¹⁵ Hpilip gaw, Karai Kasang a chyoi pra ai wenyi lam matsun ai gara shara de raitim, sa na matu jin jin re. Kabu gara shiga hpe n na yu shi ai masha ni hpe hkaw tsun na matu, Yehowa gaw shi hpe akyu jashawn wa ai. Yuda masha law malawng gaw, Samari masha ni hpe yu kaji nna n-gawn nsawn kanawn mazum ma ai. Raitim, Hpilip gaw lachyen lahka ai myit n nga ai sha, myit rawt let shanhte hpe kabu gara shiga hkaw tsun wa ai. Samari ‘masha wunawng wuwa gaw, myit langai sha hte’ shi hkaw tsun ai hpe madat la ai.​—⁠Kasa 8:6-8.

¹⁶ Maigan amyu masha law law nga ai Azutu hte Kesare mare ni hta hkaw tsun na matu, chyoi pra ai wenyi gaw Hpilip hpe kalang bai matsun wa ai. (Kasa 8:39, 40) Dai hpang, shi a prat gaw bai galai shai mat ai. Shi dinghku hte rai mat ai. Masa lam ni gara hku mi galai shai mat tim, hkaw tsun magam hta matut nna amu law nga ai majaw, Yehowa mung shi hte shi a dinghku hpe shaman chyeju jaw wa ai.​—⁠Kasa 21:8, 9. 

17, 18. Prat a masa lam ni galai shai mat ai shaloi, hkaw tsun bungli hta myit maju jung nga ai gaw anhte hpe gara hku karum ya ai kun?

 ¹⁷ Aten hpring magam gun law law gaw, shanhte a masa ni galai shai mat tim, matut ngwi pyaw na matu hte jaw ai ningmu ni nga na matu karum ya ai gaw, hkaw tsun magam hta myit maju jung ai hku nna re ngu tsun ma ai. Ga shadawn, Dingda Ahprika kaw nga ai Awsbon yan Polai gaw Behtela kaw nna hkring ra ai shaloi, nga shara hte aten kadun bungli lu na matu loi na re ngu myit wa ai. Raitim, Awsbon ndai hku tsun ai: “Bungli lu na matu n loi ai hpe chye wa ai.” Polai mung ndai hku tsun ai: “Shata masum ting bungli n lu wa ai. Mahkawng da ai gumhpraw mung ma mat sai. Manghkang kaba rai nga ai.”

¹⁸ Yak la ai dai masa hpe Awsbon yan Polai tawt lai lu hkra hpa gaw karum ya wa ai kun? Awsbon ndai hku tsun ai: “Nawku hpung hte arau hkaw tsun bungli hta shang lawm ai gaw, matut nna myit maju jung na matu hte kaja ai ningmu nga na matu karum ya ai.” Nta hta dung nga nna myit tsang nga na malai, hkaw tsun magam hta amu law nga na matu shan dawdan wa ai. Dai zawn galaw ai gaw, shan hpe grai pyaw shangun ai. Awsbon ndai hku tsun ai: “Bungli lu na matu matut nna tam ai. Hpang jahtum hta gaw bungli lu wa ai.”

19-21. (a) Matut simsa na matu hpa gaw anhte hpe karum ya na kun? (b) Galai shai lam ni hkrum ai shaloi, ra ang ai hku tinang mung galai shai nna asak hkrung ai gaw hpa akyu lu ai kun?

¹⁹ Anhte chye wa sai hte maren, byin nga ai masa lam ni hta kaja htum galaw lu ai hpe galaw nna Yehowa hpe tsep kawp kamhpa na nga yang, hpa mi byin wa tim, myit hta matut simsa lu na re. (Mihka 7:7 hpe hti u.) Galai shai ai lam ni hte maren hkan galaw ai gaw, Yehowa hte hku hkau lam ngang kang shangun ai hpe, nang chye wa na re. Grai yak ai masa ni hte hkrum tim, Yehowa hpe shamyet shanat ai gaw hpa re ai hpe sharin la lu wa ai ngu nna Behtela kaw na jahkring kau hkrum ai Polai tsun dan ai. Shi ndai hku tsun  ai: “Yehowa hte hku hkau lam grai ngang kang wa ai.”

²⁰ Lahta kaw tsun wa ai Meri mung, asak kaba sai kawa hpe yu lajang nga let ningshawng mung galaw nga ai. Shi ndai hku tsun ai: “Myit tsang lam ni nga wa yang, matut n myit ai sha, akyu hpyi nna hkring sa la ai. Yehowa a lata hta ap da na matu ahkyak ai lam hpe ngai sharin la lu wa ai. Htawm hpang hta mung dai hte maren galaw mat wa ra na re.”

²¹ Galai shai ai lam ni gaw, shan yan n myit mada da ai lam hku makam masham chyam dinglik ai lam re ngu Lawt yan Aletzendra tsun ai. Raitim, dai chyam dinglik lam ni gaw shan hpe kade daram karum ya wa ai lam shan chye wa ai. Ya nga yang, manghkang ni hkrum tim, tawt lai lu na matu makam masham nga sai hpe shan yan chye sai. Grau kaja ai masha ni byin wa ai ngu nna mung shan hkamsha wa ai.

22. Anhte a masa lam ni hpe kaja htum hparan na nga yang, hpa hpe kam mai ai kun?

²² Dai ni na aten hta, anhte a prat gaw n myit mada da ai sha galai shai mat chye ai. Yehowa a magam hta kaga lit ni lu la ai, hkam ja lam nau n nga wa ai (sh) dinghku hta lit nnan ni lu wa ai mung rai na re. Hpa mi byin wa tim, Yehowa nang hpe lanu lahku ya na re. Dai hpe kam u. Shi gaw, ra ang ai aten hta nang hpe karum ya mat na re. (Hebre 4:16; 1 Petru 5:6, 7) Ya aten hta gaw, na a masa lam ni hpe kaja htum hparan nga u. Wa Karai Kasang Yehowa kaw akyu hpyi u. Shi hpe tsep kawp kamhpa lu hkra sharin la u. Dai hku galaw na nga yang, masa lam ni gara hku mi galai shai mat tim, Yehowa kaw nna simsa lam hpe galoi mung hkam la lu na re.