1, 2. (a) Yesu a prat hkrun lam hta ahkyak htum bungli gaw hpa rai kun? Hpa majaw kun? (b) “Karai Kasang hte arau bungli galaw ai ni” hku nna, awng dang lu na matu anhte hpa galaw ra ai kun?

YESU HKRISTU gaw lasama sara langai rai nna, hpang de gaw magam gun langai byin wa ai. (Marku 6:3; Roma 15:8, 9) Dai bungli lahkawng hpe atsawm sha galaw wa ai. Lasama sara langai hku nna, hpun hte arung arai hpan amyu myu galaw lu hkra, hkingrai ni hpe gara hku akyu jashawn na lam sharin la wa ai. Magam gun langai hku nna mung, Karai a Mungga kaw nna teng man ai tara hpe, masha amyu baw sang shagu chye hkra, Chyum Laika machye machyang hpe akyu jashawn wa ai. (Mahte 7:28; Luka 24:32, 45) Yesu asak 30 hta, lasama bungli hpe jahkring kau nna, magam gun langai byin wa ai. Hpa majaw nga yang, dai bungli gaw shi galaw ra na ahkyak dik htum bungli re ai hpe chye ai majaw re. Karai a Mungdan kabu gara shiga hkaw tsun na matu, Karai Kasang gaw shi hpe ginding aga de shangun dat ai lam shi tsun wa ai. (Mahte 20:28; Luka 3:23; 4:43) Yesu gaw, shi a prat hpe kabu gara shiga hkaw tsun ai hta myit maju jung nna, kaga ni hpe mung dai hte maren byin shangun mayu ai.​—⁠Mahte 9:35-38.

² Anhte law malawng gaw, lasama bungli galaw ai ni n re. Raitim, anhte yawng gaw, kaga ni hpe kabu gara shiga hkaw tsun ai magam gun ni re. Ndai bungli gaw, Karai Kasang nan lawm  ai majaw grai ahkyak ai. Dai majaw anhte yawng gaw, “Karai Kasang hte arau bungli galaw ai ni re.” (1 Korinhtu 3:9; 2 Korinhtu 6:4, NW) Shakawn kungdawn sara tsun ai ndai ga hpe anhte myit hkrum ga ai: “Na mungga a namchyim gaw teng man ai lam rai nga ai.” (Shakawn 119:159, 160, NW) Yehowa a mungga gaw teng man ai. Dai majaw anhte gaw, hkaw tsun magam hta “teng man ai mung ga hpe ding ding chye hpajang ai” ni tai mayu ga ai. (2 Timohti 2:15 hpe hti u.) Yehowa, Yesu hte Mungdan a lam ni hpe kaga ni chye wa hkra, sharin ya lu ai madung hkingrai gaw Chyum Laika re. Dai hpe kung kyang hkra chye lang na matu, anhte shakut ga ai. Hkaw tsun magam hta awng dang lam lu na matu, Yehowa a uhpung gaw kaga akyu rawng ai hkingrai ni hpe mung lajang da ya ai. Dai hkingrai ni hpe gara hku akyu jashawn mai na lam sharin la ra ai. Dai hkingrai ni gaw, anhte a Sharin Achyin Hkingrai ni re.

3. Hkaw tsun magam hta anhte hpa hpe myit maju jung ging ai kun? Dai hku galaw lu na matu, Kasa 13:48 gaw anhte hpe gara hku karum ya ai kun?

³ Hkaw Tsun Hkingrai ngu n tsun ai sha, Sharin Achyin Hkingrai ngu nna hpa majaw tsun ai hpe nang mau na re. “Hkaw tsun ai” ngu ai gaw, shiga hpe ndau shana ai lachyum re. Raitim, “sharin ya ai” ngu ai gaw, na la ai shiga hpe chye na nna, tatut hkan galaw na matu sang lang dan ya ai hpe tsun ai re. Jahtum nhtoi grai ni sai majaw, Chyum ga sharin hpang na matu hte masha ni hpe teng man ai lam sharin ya na matu myit maju jung ging ai. Rai yang she, shanhte gaw Hkristu a sape ni byin wa na re. Anhte gaw, “n htum n wai asak lu la na san da ai ni” hpe mu tam hkra shakut shaja ra nna, Yehowa hpe shanhte nawku wa hkra karum ya ra ai lachyum re.​—⁠Kasa 13:44-48 hpe hti u.

4. “N htum n wai asak lu la na san da ai ni” hpe anhte gara hku tam na kun?

⁴ “N htum n wai asak lu la na san da ai ni” hpe anhte gara hku mu tam lu na kun? Tsa ban langai na Hkristan ni a matu dai masha ni hpe mu tam na lam langai gaw, hkaw tsun ai hku nna re. Yesu gaw sape ni hpe ndai hku tsun ai: “Gara mare, gara kahtawng hta e rai ti mung, nanhte shang myit yang, dai yang na ging dan nga ai wa hpe tam la mu.” (Mahte 10:11) Dai ni na aten hta mung anhte dai zawn galaw ra ai. Masha ni gaw, myit n ding man ai, gumrawng ai (sh) Karai Kasang hte seng ai lam hpe hpa zawn n nawn ai nga yang, shanhte kabu gara shiga madat na matu anhte n myit mada ai. Myit ding man ai ni, shagrit shanem ai ni hte teng man ai lam hpe gaja wa chye mayu ai ni hpe sha, anhte tam ga ai. Yesu lasama sara re ai shaloi, shi galaw wa ai lam hte ya anhte masha hkan tam ai lam hpe shingdaw mai ai. Chyinghka, kan dang (sh) dai zawn arung arai lama ma n galaw shi yang, Yesu gaw htap htuk ai hpun hpe shawng tam ai. Dai hpang, shi a hpaji hte lasama hkingrai ni hpe akyu jashawn nna, arung arai ni hpe galaw ai. Dai ni na aten hta mung, myit ding man ai masha ni hpe shawng tam ra ai. Dai hpang, anhte a hkingrai ni, machye machyang ni hpe akyu jashawn nna, sape ni byin wa hkra karum ya ra ai.​—⁠Mahte 28:19, 20.

5. Anhte a Sharin Achyin Hkingrai ni hte seng nna hpa chye da ra ai kun? Sang lang dan u. (Sumhpa shawng na sumla hpe yu u.)

⁵ Hkingrai langai hpra hta laksan yaw shada lam nga ai. Ga shadawn, lasama sara langai hku nna, Yesu lang wa ai hkingrai ni hpe myit yu u. * Shi hta, shadawn na matu, matsing masat na matu, ret daw na matu, hku shawaw na matu hkingrai ni ra ai. Bai nna, hkrang shapraw lu hkra, hpun pyen ni langai hte langai atsawm matut hkra galaw ra ai. Dai hte maren, anhte a Sharin Achyin Hkingrai langai  hpra hta mung, laksan yaw shada lam nga ai. Dai ahkyak ai hkingrai ni hpe gara hku akyu jashawn mai na lam hkaja yu ga.

6, 7. (a) Matut mahkai kat hpe nang gara hku akyu jashawn na kun? (b) Zuphpawng saw shaga laika hpe anhte hpa majaw akyu jashawn ra ai kun?

⁶ Matut mahkai kat. Ndai gaw kaji tim, grai akyu rawng ai hkingrai re. Anhte hpe shachyen ya lu nna, jw.org website hpe kalang ta matsun ya lu ai. Anhte a website hta, anhte a lam hpe grau hkaja lu nna, Chyum Laika hkaja na matu pyi hpyi shawn wa chye ai. jw.org hta, Chyum Laika hkaja na matu, marai 400,000 jan hpyi shawn wa sai. Shani shagu tsa lam hku hpyi shawn nga ai. Nang hkrum ai masha ni hpe dai matut mahkai kat jaw lu na matu, kat nkau hpe nang gun da mai ai.

⁷ Saw shaga laika. Saw shaga laika hta zuphpawng hte seng nna ndai hku tsun da ai: “Nang hpe saw shaga ga ai Yehowa Sakse ni hte Chyum Laika hkaja u.” Ngut nna, “zuphpawng ni hpe lung yu u” “Yehowa Sakse langai hte Chyum Laika hkaja yu u” ngu nna mung tsun da ai. Dai majaw, saw shaga laika gaw, anhte kadai ni re ai hpe tsun dan ya lu nna, “Wenyi hta matsan mayan rai nga ai ni” Chyum Laika hkaja mayu wa hkra, karum ya lu ai. (Mahte 5:3) Chyum Laika hkaja na matu hkap la ai raitim, n hkap la ai raitim, zuphpawng lung na matu yawng hpe saw shaga ga ai. Shanhte zuphpawng sa lung ai shaloi, Chyum Laika kaw nna kade daram sharin la lu ai hpe shanhte chye wa na re.

8. Zuphpawng ni hpe kalang daram sa lung yu na matu, masha ni hpe hpa majaw saw shaga ra ai kun? Ga shadawn tsun dan rit.

⁸ Zuphpawng ni hpe kalang daram sa lung yu na matu, masha ni hpe saw shaga ra ai. Hpa majaw kun? Shanhte zuphpawng sa lung ai shaloi, Yehowa Sakse ni gaw shut shai ai nawku htung ni hte n bung ai lam chye wa na re. Chyum Laika kaw nna teng man ai lam ni hpe sharin ya nna, Karai Kasang hpe masha ni chye wa hkra karum ya nga ai hpe mung, shanhte mu wa na re. (Esaia 65:13) Ga shadawn, Amerikan mungdan kaw nna yan la langai re ai Re yan Linda gaw, ndai shai ai lam hpe sadi hkrup wa ai. Shan gaw Karai Kasang hpe kam sham nna shi a lam grau chye mayu ma ai. Dai majaw, hpung langai hta n shang shi yang, lam lahkawng hte seng nna chye lu hkra, shan a mare hta nga ai nawku jawng langai hpang langai hpe lung na matu dawdan da ai. Lam langai gaw, nawku jawng kaw nna lama ma hpe sharin la lu na matu re. Lahkawng gaw, hpung masha ni a bu hpun mawn sumli ai lam gaw, Karai Kasang hpe nawku ai ni zawn htap htuk ra ai ngu ai lam re. Nawku jawng ni grai law ai majaw, shaning ni grai na mat ai. Shan mung, grai myit htum mat ai. Shan gaw hpa mung n sharin la lu nna, shan hkrum ai hpung masha ni mung sari n rawng ai hku bu hpun ma ai. Lani mi hta, shan a jahpan kaw nna hpang jahtum ngam ai nawku jawng de sa ngut ai hpang, Linda gaw bungli de, Re gaw nta de wa mat ai. Nta de wa ai lam hta, Nawku Htingnu makau hku Re lai mat ai. ‘Dai Nawku Htingnu hta hpa galaw ai hpe chye na matu sa yu na’ ngu shi myit dat ai. Shi lung wa ai nawku jawng yawng hta na, ndai gaw kaja htum re! Nawku Htingnu kaw nna masha yawng gaw, alum ala hkap tau nna grai hku hkau chye ma ai. Grai sari rawng ai hku mung bu hpun da ai. Re gaw shawng kaw dung nna sharin ya ai lam ni hpe mung ra sharawng mat ai. Zuphpawng de shawng nnan sa lung nna “Karai Kasang gaw nanhte hte rau anga nga ai” ngu tsun wa ai masha a lam Pawlu ka wa ai. Re a mabyin mung dai zawn sha re. (1 Korinhtu 14:23-25) Dai shaloi kaw nna, Re gaw Laban shani shagu zuphpawng sa lung ai. Bat lapran zuphpawng mung ayan na sa lung hpang ai. Linda mung  zuphpawng lung hpang ai. Shan a asak 70 jan sai raitim, Chyum Laika hkaja nna, hkalup hkam la ai.

9, 10. (a) Garan laika hpe akyu jashawn na matu hpa majaw loi ai kun? (b) Karai Kasang A Mungdan Gaw Hpa Rai Ta? ngu ai garan laika hpe gara hku akyu jashawn na kun?

⁹ Garan laika. Anhte a sharin achyin hkingrai hta, garan laika matsat nga ai. Akyu jashawn na matu loi nna, ga shaga hpang lu na matu mung karum ya ai. Garan laika ni hpe 2013 hta dip shapraw hpang wa nna, ya nga yang, wan hkying manga dip shapraw ngut sai. Garan laika yawng a hkrang gaw maren sha re. Dai majaw, garan laika langai hpe gara hku akyu jashawn na hpe chye yang, yawng hpe chye sai. Marai langai ngai hte ga shaga hpang na matu, garan laika langai hpe nang gara hku akyu jashawn na kun?

¹⁰ Karai A Mungdan Gaw Hpa Rai Ta? ngu ai garan laika hpe garan na ngu saga. Garan laika shawng kaw na ga san ni hpe madun nna ndai hku san u: “Karai Kasang a Mungdan gaw gara hku rai na hpe nang myit ga ai kun? Nang gara hku chye na ai kun?” Mahtai masum kaw nna langai ngai hpe lata shangun u. Shi a mahtai gaw, jaw ai (sh) shut ai ngu tsun na malai, garan laika hta lawm ai “Chyum Laika Hta Tsun Da Ai Lam” hpe hpaw madun nna, dai kaw madun da ai Daniela 2:44 hte Esaia 9:5 hpe hti dan u. Tsun shaga ngut ai hpang, “Sumru Yu Ga” ngu ai ga baw lawu na, “Karai Kasang a Mungdan uphkang ai npu hta gara hku asak hkrung lu na ta?” ngu ai ga san hpe san u. Dai ga san a mahtai hpe hpang kalang bai sa chyai ai shaloi tsun dan mai ai. Bai hkrum ai shaloi, Chyum Laika sharin hpang na hkingrai langai re ai Karai Kasang Kaw Na Kabu Gara Shiga ngu ai laika buk a daw 7 hpe akyu jashawn mai ai.

11. Anhte a magazin ni a yaw shada lam gaw hpa rai a ta? Dai hte seng nna anhte hpa hpe chye da ra ai kun?

¹¹ Magazin ni. Sin Langchyi hte Dum Hprang! laika ni gaw, mungkan hta ga gale law dik htum hte dip shabra law dik htum magazin ni re. Ndai magazin ni hpe mungdan shagu kaw na masha ni hti ma ai majaw, shara shagu na masha ni myit lawm na lam ni hpe ka da ya ai. Dai ni na aten hta, prat a matu ahkyak dik htum lam gaw hpa re ai hpe masha ni chye hkra karum ya na matu, dai magazin ni hpe akyu jashawn ging ai. Raitim, shawng nnan hku nna, gara magazin gaw kadai ni a matu yaw shada nna ka da ai hpe chye ra ai.

12. (a) Dum Hprang! laika gaw kadai ni a matu rai nna, yaw shada lam gaw hpa rai a ta? (b) Ndai hkingrai hte seng nna gara mahkrum madup kaja ni nang lu wa ai kun?

¹² Dum Hprang! laika gaw, Chyum Laika hpe nau n chye ai ni (sh) tsep kawp n chye ai ni a matu yaw shada da ai. Shanhte gaw, Hkristan sharin achyin ai lam hpe tsep kawp n chye ai ni, nawku htung hpe n kam ai ni (sh) shanhte a prat hpe Chyum Laika gaw karum ya lu ai hpe n chye ai ni mai byin ai. Dum Hprang! laika a madung yaw shada lam langai gaw, Karai Kasang nga ai hpe kam sham wa na matu re. (Roma 1:20; Hebre 11:6) “Gaja wa teng teng rai nga ai, . . . Karai Kasang a mung ga” re ai Chyum Laika hpe kam sham wa hkra mung karum ya ai. (1 Htesaloni 2:13) 2018 ning na Dum Hprang! magazin masum a ga baw ni gaw: “Ngwi Pyaw Shangun Ai Lam,” “Dinghku Hpe Awng Dang Shangun Ai Lam 12” hte “Yawn Hkyen Nga Ai Ni A Matu Karum Ya Ai Lam” ngu ai ni re.

13. (a) Shawa a matu shapraw ai Sin Langchyi gaw kadai ni a matu rai a ta? (b) Ndai hkingrai hte seng nna gara mahkrum madup kaja ni nang lu wa ai kun?

¹³ Shawa a matu shapraw ai Sin Langchyi a  madung yaw shada lam gaw, Karai Kasang hte Chyum Laika hpe hkungga ai ni hpe Chyum Laika lam sang lang dan na matu re. Chyum Laika sharin ya ai lam nkau hpe shanhte chye yang chye na. Raitim, tup hkrak jaw ai hku gaw n chye shi ai rai na re. (Roma 10:2; 1 Timohti 2:3, 4) 2018 ning na magazin masum gaw, ndai ga san ni hpe mahtai jaw ya ai: “Chyum Laika Gaw Ya Aten Hta Tatut Akyu Nga Ai Kun?,” “Htawm Hpang Hta Hpa Byin Wa Na Kun?,” “Nang Hpe Karai Kasang Lanu Lahku Ai Kun?”

14. (a) Anhte a Sharin Achyin Hkingrai Ni hta lawm ai video mali gaw gara video ni kun? (b) Ndai video ni hpe madun nna, gara mahkrum madup kaja ni lu wa sai kun?

¹⁴ Video ni. Yesu aten hta lasama sara ni hta nga ai hkingrai ni gaw, lata hte n-gun shadat ra ai hkingrai ni sha re. Raitim, dai ni aten na lasama sara ni hta gaw, zingret jak, hku shawaw jak hte hpun pyen shatsawm jak ni zawn re ai myihprap wan n-gun hte lang ai jak hkingrai ni nga taw sai. Dai ni aten anhte hkaw tsun ai shaloi mung, laika buk hku shapraw da ai laili laika ni sha n-ga, masha ni hpe madun lu ai grai kaja ai video ni nga taw sai. Dai ni kaw na mali gaw, anhte a sharin achyin ya ai hkingrai ni hta lawm ai: Chyum Laika Hpe Hpa Majaw Hkaja Ra Ai Kun?, Chyum Laika Sharin Ai Lamang Hpe Gara Hku Galaw A Ta?, Nawku Htingnu Hta Hpa Ni Galaw A Ta?, Yehowa Sakse Ni​—⁠Anhte Gaw Kadai Ni Kun? ngu ai video ni re. Grau kadun ai video ni gaw minit lahkawng pyi n galu nna, shawng nnan hkaw tsun ai shaloi hta madun mai ai. Grau galu ai video ni hpe gaw, bai kawan ai shaloi (sh) aten jaw lu ai nta madu ni hpe madun mai ai. Ndai video ni gaw, Chyum Laika hkaja mayu wa hkra, zuphpawng ni sa lung mayu wa hkra masha ni hpe shadut ya ai majaw, grai kaja ai hkingrai ni rai nga ai.

15. Tinang a amyu ga hte anhte a video langai hpe yu yang pyi, masha ni gara hku akyu lu ai kun? Ga shadawn tsun dan rit.

¹⁵ Ga shadawn, Maihkro Nisha zunlawng kaw nna htawt wa ai, Yapi amyu ga shaga ai num langai hte nauna langai hkrum ai. Nauna gaw, Chyum Laika Hpe Hpa Majaw Hkaja Ra Ai Kun? ngu ai video hpe Yapi ga hte madun dan ai. Video hpang ai hte dai num gaw ndai hku tsun ai: “Ndai ngai na amyu ga rai nga ai. Ngai kam pyi n kam ai. Ndai nsen hpe madat yu yang, shi gaw ngai na zunlawng kaw na rai na re. Shi ngai na ga shaga nga ai!” Dai hpang, jw.org hta na shi a amyu ga hte mara da ai yawng hpe yu na, hti na ngu shi tsun ai. (Kasa 2:8, 11 hte shingdaw u.) Kaga ga shadawn langai gaw, Amerikan mungdan hta nga ai nauna langai a mahkrum madup re. Kaga mungdan kaw nga ai kahkri hpang de, shi a amyu ga hku nna dai video link hpe sa ya ai. Shi gaw dai video hpe yu nna, kamoi hpang de ndai hku laika ka ai: “Mungkan ga hpe nhkru ai nat uphkang nga ai lam hpe ngai grai myit lawm mat ai. Dai majaw, Chyum Laika sharin ya na matu hpyi shawn dat sai.” Shi gaw anhte a magam bungli hpe pat shingdang da ai mungdan kaw nga ai.

16. (a) Karai Kasang A Ga Madat Nna Htani Htana Asak Hkrung U, (b) Karai Kasang Kaw Na Kabu Gara Shiga, (c) Ya Aten Hta Yehowa Myit Ra Ai Hpe Kadai Ni Galaw Nga A Ta? ngu ai brochure a yaw shada lam hpe tsun dan u.

¹⁶ Brochure ni. Laika atsawm n chye ai (sh) shi a amyu ga hte Chyum Laika laili laika ni n nga ai nga yang, teng man ai tara gara hku sharin ya na kun? Karai Kasang A Ga Madat Nna Htani Htana Asak Hkrung U ngu ai brochure hpe akyu jashawn mai ai. * Chyum  Laika sharin hpang na matu kaja htum hkingrai gaw, Karai Kasang Kaw Na Kabu Gara Shiga ngu ai brochure re. Hpang jahtum laika man kaw lawm ai ga baw 14 hpe madun nna, gara hpe myit lawm ai kun? ngu nna san mai ai. Ngut yang, shi lata ai lam hte hkaja hpang u. Na a bai kawan ai lam ni hta dai hku shakut yu sai kun? Anhte a sharin achyin ya ai hkingrai ni hta lawm ai, masum ngu na brochure gaw, Ya Aten Hta Yehowa Myit Ra Ai Hpe Kadai Ni Galaw Nga A Ta? ngu ai re. Ndai brochure gaw, chyum ga sharin ni uhpung a lam chye wa hkra yaw shada da ai. Ndai brochure hpe gara hku akyu jashawn mai na hte seng nna, March 2017, Anhte A Hkristan Prat Hte Magam​—⁠Zuphpawng Shaman Laika Buk hta yu u.

17. (a) Hkaja laika buk langai hpra a yaw shada lam gaw hpa ni rai a ta? (b) Hkalup hkam ai ni yawng gaw hpa galaw ra ai kun? Hpa majaw kun?

¹⁷ Laika buk ni. Brochure hpe akyu jashawn nna hkaja hpang ngut ai hpang, gara aten hta rai rai Chyum Laika Anhte Hpe Hpa Sharin Ya Ai Kun? ngu ai laika buk hte matut hkaja mai ai. Ndai hkingrai gaw, Chyum Laika madung sharin ya ai lam ni hpe chye na hkra karum ya ai. Chyum ga sharin gaw rawt jat wa nna, dai laika buk hkaja ngut sai nga yang, Karai Kasang A N-gaw Nwai Ai Myit Hta A Nga Nga Mu ngu ai laika buk hte matut hkaja mai ai. Ndai hkingrai gaw, Chyum Laika npawt tara ni hpe tinang a prat hkrun lam hta gara hku hkan sa lu na hpe sharin ya ai. Chyum ga sharin gaw, hkalup hkam ngut yang pyi, ndai laika buk lahkawng yan hpe ngut hkra hkaja ra ai. Rai yang she, Yehowa a ntsa ngang kang ai makam masham nga nna, matut sadi dung lu na re.​—⁠Kolose 2:6, 7 hpe hti u.

18. (a) Teng man ai lam sharin ya ai ni hku nna, hpa galaw na matu 1 Timohti 4:16 hta n-gun jaw da ai kun? Akyu gaw hpa rai a ta? (b) Sharin Achyin Hkingrai Ni hpe akyu jashawn ai yaw shada lam gaw hpa rai a ta?

¹⁸ Masha ni hpe, htani htana asak lu shangun ai “teng man ai kabu gara shi ga” sharin ya na matu, Yehowa Sakse ni re ai anhte hta lit nga ai. (Kolose 1:5; 1 Timohti 4:16 hpe hti u.) Dai hpe galaw lu hkra, anhte hta Sharin Achyin Ya Ai Hkingrai ni nga ai. (“ Sharin Achyin Hkingrai Ni” ngu ai lawk hpe yu u.) Dai hkingrai ni hpe kaja htum akyu jashawn u. Dai hkingrai ni kaw nna, gara hkingrai hpe akyu jashawn na, gara aten hta lang na ngu ai hpe anhte langai hpra dawdan mai ai. Raitim, anhte a yaw shada lam gaw, laika garan na daram sha n re ai hpe dum u. Anhte a shiga hpe myit n lawm ai ni hpe, laili laika ni jaw na n re. Anhte a yaw shada lam gaw, “n htum n wai asak lu la na san da ai ni,” Karai Kasang a lam gaja wa chye mayu ai ni, shagrit shanem nna myit ding man ai ni hpe sape byin wa hkra karum ya na matu re.​—⁠Kasa 13:48; Mahte 28:19, 20.