1, 2. (a) Tinang myit hpe n hkang lu yang hpa byin na kun? (b) Tinang myit hpe hkang lu ai hte seng nna hpa majaw hkaja ra ai kun?

TINANG myit hpe hkang lu na matu Yehowa Karai Kasang gaw anhte hpe karum ya lu ai. (Galati 5:22, 23) Yehowa hta tinang myit hpe hkang lu ai atsam nga ai. Raitim, anhte gaw n hkum tsup ai majaw hkang lu na matu yak ai. Dai ni aten hta, tinang myit hpe n hkang lu ai majaw, masha ni gaw manghkang ni byin nga ai. Dai gaw ahkyak ai lam ni n galaw byin ai sha hpang hkrat shangun ai. Jawng hta, bungli hta n kang ka ai masha byin shangun chye ai. Tinang myit hpe n hkang lu yang, grai mazut ai ga ni tsun ai, tsa chyaru lu lai ai, tsa ya kani ya byin ai, dawsa ai, hka bra ai, hka kap ai, htawng hkrat ai, myit hta hkra machyi ai, hpye ai amu galaw ai majaw ana ni kap wa ai hte n kam lu ai ma hkum lu ai lam ni mung byin chye ai.​—⁠Shakawn 34:11-14.

² Tinang myit hpe n hkang lu ai masha gaw, tinang nan mung, kaga ni hte mung manghkang ni byin shangun ai. Aten ni na wa ai hte maren, masha ni gaw tinang myit hpe hkang lu ai atsam lani hte lani yawm wa ai gaw dan dawng nga ai. Dai gaw anhte a matu mauhpa n re. Hpa majaw nga yang, anhte asak hkrung nga ai “hpang jahtum na nhtoi” hta tinang myit hpe n hkang lu ai masha ni nga wa na ngu Karai a Mungga hta tau hkrau tsun da  ai. Gaja wa mung dan dawng nga ai. ​—⁠2 Timohti 3:1-3.

3. Anhte hpa majaw tinang myit hpe hkang ra na kun?

³ Anhte hpa majaw tinang myit hpe hkang ra ai kun? Ahkyak ai lam lahkawng nga ai. Langai, tinang a myit hte hkamsha lam ni hpe hkang lu ai ni gaw manghkang ni nau n nga ai. Kaga masha ni hte hku hkau lam kaja na matu loi ai. Pawt sin dawng ai, myit tsang ai, myit kaji garen ai ngu hkamsha ai lam ni hpe mung koi lu ai. Lahkawng, Karai Kasang a jinghku matut byin na matu, gunglau ai lam ni hpe ninghkap ra nna n kaja ai ra marin ai myit hpe mung hkang ra ai. Dai hpe Adam yan Ewa n galaw lu wa ai. (Ningpawt 3:6) Shanhte zawn, dai ni aten na masha law law mung, tinang myit hpe n hkang lu ai majaw hkrit hpa manghkang ni hkrum nga ai.

4. N kaja ai myit jasat ni hpe hkang na matu shakut nga ai ni hpe hpa gaw karum ya na kun?

⁴ Yehowa gaw anhte n hkum tsup ai majaw, tinang myit hpe hkang lu na matu yak ai hpe chye na ya ai. Raitim, shi gaw anhte a n kaja ai myit jasat hpe hkang lu na matu karum ya mayu ai. (1 Hkawhkam 8:46-50) Tsawra ai manang langai zawn, shi gaw anhte a hkamsha lam hte ra marin ai lam hpe hkang lu na matu yak ai shaloi tsawra myit hte karum ya mayu ai. Ndai sumhpa hta, tinang myit hpe hkang lu ai Yehowa a kasi ningli hpe anhte hkaja na re. Chyum Laika kaw na kaja ai hte n kaja ai kasi hpe mung anhte hkaja na re. Anhte hpe tatut karum ya lu ai hpaji jaw ga ni hpe mung hkaja na re.

5, 6. Yehowa gaw tinang myit hpe hkang lu ai lam hte seng nna anhte a matu hpa kasi ningli madun wa ai kun?

⁵ Yehowa gaw lam shagu hta hkum tsup ai majaw tinang myit hpe hkang lu ai lam hta mung hkum tsup ai. (Tara Jahprang 32:4) Anhte gaw n hkum tsup ai. Raitim, shi a myit hkang lu ai kasi ningli hpe anhte atsawm sumru yang, shi hpe grau nna kasi la lu na re. Anhte myit n pyaw ai shaloi, kaja ai hku bai htang lu na matu ndai lam gaw karum ya lu ai. Yehowa a tinang myit hpe hkang lu ai kasi ningli nkau mi gaw hpa rai kun?

⁶ Edin sun hta Satan ninghkap wa ai shaloi, Yehowa gara hku bai htang wa ai lam hpe myit yu ga. Satan ninghkap ai majaw, sumsing lamu hta nga ai Karai Kasang a mayam ni gaw kajawng mat nna masin pawt na re. Satan a majaw byin ai yakhkak jamjau ai lam yawng hpe myit ai shaloi, nang mung dai zawn hkamsha na re. Raitim, Yehowa gaw dai lam hpe lai lai jan jan matai bai n htang ai. Jaw ai hku bai htang wa ai. Yehowa gaw alawan n chye pawt ai. Satan a ninghkap ai lam hpe rap ra ai hku hparan ai. (Pru Mat 34:6; Yoba 2:2-6) Hpa majaw ta? Yehowa gaw kadai hpe mung hten bya n hkrum na matu hte yawng mayawng myit malai lu na matu ra sharawng ai majaw aten jaw da ai.​—⁠2 Petru 3:9.

7. Yehowa a kasi ningli kaw nna anhte hpa sharin la lu ai kun?

⁷ Ga n shaga shi yang atsawm sumru na matu hte alawan matai htang ai baw n galaw na matu anhte hpe Yehowa a kasi ningli gaw sharin ya ai. Dai majaw, grai ahkyak ai dawdan lam ni jahkrat ra ai shaloi, sumru na matu aten jaw ra ai. Gara hku tsun shaga na hte jaw ai hpe galaw lu na matu nyan hpaji lu na matu akyu hpyi u. (Shakawan 141:3) Anhte masin pawt ai (sh) yawn hkyen ai shaloi, lai lai jan  jan bai htang na matu grai loi ai. Dai majaw, masha law law gaw n myit yu ai sha galaw ai, tsun shaga ai majaw myit yawn hpa lam ni hkrum nga ai.​—⁠Ga Shagawp 14:29; 15:28; 19:2.

8. (a) Tinang myit hpe hkang lu ai hte seng nna kaja ai kasi ningli hpe gara kaw mu lu na kun? (b) Hputihpa a madu jan gaw Yosep hpe gunglau na matu shakut ai shaloi, ninghkap lu na matu Yosep hpe hpa gaw karum ya wa ai kun? (Ndai sumhpa shawng na sumla hpe yu u.)

⁸ Myit hkang lu ai lam a akyu hpe gara Chyum Laika kasi ningli gaw dan dawng shangun ai kun? Yaku a kasha Yosep a lam hpe myit yu ga. Shi gaw Hpara-u hpe makawp maga ya ai ningbaw Hputihpa a nta hta amu gun nga ai shaloi, gunglau ai lam hpe ninghkap wa ai. Hputihpa a madu jan gaw, Yosep “hkum shingyan galu kaba nna ahpraw nsam” tsawm ai majaw, law law lang gunglau na matu shakut ai. Gunglau ai hpe ninghkap na matu Yosep hpe hpa gaw karum ya wa ai kun? Yosep gaw dai hpe asum jaw kau yang, hpa byin wa na hpe tau hkrau nna atsawm myit da ai mung mai byin ai. Yosep a palawng hpe Hputihpa a madu jan magra wa ai shaloi, shi kaw nna hprawng mat wa ai. Shi ndai hku tsun ai: “Dai zawn n hkru ai amu hte Karai Kasang hpe ngai kaning di shut hpyit lu na rai nga a ta?”​—⁠Ningpawt 39:6, 9, JCLB; Ga Shagawp 1:10 hpe hti u.

9. Gunglau hkrum ai shaloi ninghkap na matu nang gara hku hkyen lajang da mai ai kun?

⁹ Yosep a kasi ningli kaw nna anhte hpa sharin la lu ai kun? Karai Kasang a tara ni hpe tawt lai na matu gunglau hkrum ai shaloi, gunglau ai hpe anhte ninghkap ra ai. Yehowa Sakse n byin shi yang, lu lai sha lai ai, ladu lai tsa chyaru lu ai, hkayawm lu ai, nanghpam lu sha ai, hpye ai amu galaw ai hte kaga n hkru ai lam ni mung masha nkau mi galaw wa ai. Hkalup hkam ngut ai hpang hta pyi, dai lam ni hte gunglau hkrum ai aten ni nga yang nga na re. Dai zawn nang hkrum ai shaloi, asum jaw kau yang, Yehowa hte na a hku hkau lam htenza mat na hpe myit yu ra ai. Tinang hpe gunglau hkrum shangun ai masa ni hpe chye hkra shakut ra nna, dai hpe gara hku koi lu na matu mung dawdan da ra ai. (Shakawn 26:4, 5; Ga Shagawp 22:3) Dai zawn chyam dinglik hkrum yang, dai hpe ninghkap lu na matu nyan hpaji hte tinang myit hpe hkang lu na matu Yehowa kaw hpyi shawn u.

10, 11. (a) Ramma ni jawng hta hpa ni byin nga ai kun? (b) Karai a tara ni hpe tawt lai na matu gunglau hkrum yang, ninghkap na matu Hkristan ramma ni hpe hpa gaw karum ya lu ai kun?

¹⁰ Yosep hkrum wa ai masa zawn, dai ni aten na Hkristan ramma ni mung bung ai lam lama ma hkrum nga na re. Langai gaw nauna Kim re. Shi a jawng manang ni gaw kru ya hte laban shani hta shanhte hpye ai amu galaw ai lam hpe sa shakawng dan ma ai. Kim hta gaw dai hku bai tsun dan na matu n nga ai. Kaga masha ni hte n bung ai majaw “kau da hkrum ai, garen gari ai” zawn hkam sha ai nga nna shi tsun ai. Shi a jawng manang ni gaw shi dai zawn n galaw ai majaw grai anya ai ngu shadu ma ai. Raitim, Kim gaw teng sha hpaji rawng ai re. Ramma aten hta num la kanawn mayu ai myit gaw grai atsam kaba ai hpe shi chye da ai. (2 Timohti 2:22) Jawng manang ni gaw shi hpe mahkawn ajet naw re ai kun nga nna chyahkring hkring san ma ai. Shi hpa majaw hpye ai amu n galaw ai hpe tsun dan na matu  dai gaw ahkaw ahkang lu shangun ai. Hpye ai amu galaw na matu shadut hkrum ai shaloi, ninghkap na matu dawdan da ai Hkristan ramma ni hpe anhte grai shakawn ga ai. Yehowa mung nanhte hpe shakawn na re.

¹¹ Hpye ai amu galaw na matu gunglau hkrum ai shaloi, n ninghkap wa ai masha ni a kasi ningli ni hpe mung Chyum Laika hta tsun da ai. Anhte hta tinang hkum hpe hkang lu ai atsam n nga yang, n kaja ai akyu ni lu la ai hpe dai gaw madun dan ai. Nang gaw Kim a masa zawn hkrum nga yang, Ga Shagawp daw kaba 7 hta tsun da ai angawk ai ramma lasha a lam hpe myit yu u. Amnon a lam hte shi a akyang lailen a majaw hkrit hpa akyu lu la ai lam hpe mung myit yu u. (2 Samuela 13:1, 2, 10-15, 28-32) Kanu kawa ni gaw ma ni hpe tinang myit hpe hkang lu ai lam grau nga wa na matu, nyan hpaji lu na matu dai zawn kasi ningli ni hpe dinghku nawku hta bawng ban mai ai.

12. (a) Yosep gaw shi a kahpu ni hte seng nna shi a hkamsha lam hpe gara hku hkang wa ai kun? (b) Gara masa ni hta anhte a hkamsha lam hpe hkang ra ai kun?

¹² Kaga lam hta mung Yosep gaw tinang myit hpe hkang lu ai lam hta kaja ai kasi ningli hpe bai madun wa ai. Shi a kahpu ni lusha mari na matu Egutu mung de sa wa ai shaloi hta re. Yosep gaw shanhte a myit hpe chye na matu, shanhte a kanau re ai hpe n tsun dan ai. Shi grai hkamsha wa ai shaloi, shi a kahpu ni n mu ai shara hta shi hkrai sa hkrap ai. (Ningpawt 43:30, 31; 45:1) Hpunau, nauna langai gaw nang hpe hkra machyi shangun yang, hpang she myit malai lu ai baw ga ni tsun ai, galaw ai lam ni hpe koi lu na matu Yosep a kasi ningli gaw karum ya lu ai. (Ga Shagawp 16:32; 17:27) Shing nrai, shapraw da hkrum ai jinghku ni nga yang, shanhte hte ahkyak ai lam n nga ai sha matut mahkai ai baw n galaw na matu mung, na a myit hpe hkang ra ai. Dai hku galaw na matu yak na re. Raitim, Yehowa a kasi ningli hpe hkan sa ai, shi a lam matsun hte maren galaw ai hpe dum yang, dai hku galaw na matu grau loi wa na re.

13. Hkawhkam Dawi a mabyin kaw nna anhte hpa sharin la lu ai kun?

¹³ Hkawhkam Dawi a kasi ningli kaw nna mung anhte akyu lu mai ai. Shawlu hte Shimi gaw shi hpe jahte tam ai shaloi, masin n pawt ai. Shi a ahkang aya hpe jailang nna shanhte hpe matai n htang wa ai. (1 Samuela 26:9-11; 2 Samuela 16:5-10) Raitim, Dawi gaw tinang myit hpe aten shagu gaw n hkang lu wa ai. Batsheba hte shi shut ai lam, Nabala lawhpa ai majaw shi bai htang ai lam ni hpe hti ai kaw nna anhte chye lu ai. (1 Samuela 25:10-13; 2 Samuela 11:2-4) Dawi kaw nna grai manu dan ai lam ni anhte sharin la lu ai. Langai, Karai a masha ni hpe woi awn ai ni gaw, tinang myit hpe hkang lu ai atsam grau nga ra ai. Rai yang she, ahkang aya hpe shut ai hku jailang na n re. Lahkawng, ngai gaw galoi mung gunglau hkrum na n re ngu tinang hkum tinang ladu lai kamhpa ai baw kadai mung n byin ging ai.​—⁠1 Korinhtu 10:12.

14. Hpunau langai hta hpa mahkrum madup nga wa ai kun? Dai zawn masa ni hta anhte a bai htang ai lam gaw hpa majaw grai ahkyak ai kun?

¹⁴ Tinang myit hpe hkang lu ai atsam rawt jat hkra gara hku galaw lu na kun? Luiji a mabyin hpe myit yu ga. Shi a mawdaw hpang maga hpe mawdaw langai sa adawt ai. Dai majaw manghkang byin ai. Dai wa gaw shi shut tim, Luiji  hpe grai marawn nna ga law saw ai. Luiji gaw shi simsa lam lu la na matu, mawdaw la hte mung simsa na matu Yehowa kaw akyu hpyi ai. Dai la wa gaw matut nna marawn taw ai. Dai majaw Luiji gaw, dai la wa a mawdaw htenza mat ai a matu shabrai bai lu hkra, shi a pahkam hkam ai company hte seng ai laika ni ka ya nna wa mat ai. Bat mi na ai hpang, Luiji gaw num langai hpang de bai kawan sa ai. Shi a madu wa gaw shi hpe mawdaw adawt ai wa re. Dai mawdaw la wa gaw kaya taw nna shi n hkru ai hku tsun wa ai hpe bai hpyi nem ai. Shi gaw Luiji a mawdaw htenza mat ai majaw, shabrai bai lu hkra pahkam hkam ai company hte matut mahkai ya na ngu tsun ai. Dai majaw Luiji gaw shi a mawdaw hpe bai gram lu wa ai. Dai la gaw Chyum Laika hkaja na matu myit hkrum nna hkaja ai lam ni hpe mung myit lawm ai. Dai lam a majaw Luiji gaw, manghkang byin ngut ai hpang simsa lam matut nga na matu kade daram ahkyak ai lam hte shi masin pawt na nga yang, manghkang kade daram kaba wa na hpe chye mat ai.​—⁠2 Korinhtu 6:3, 4 hpe hti u.

15, 16. Nang hte na a dinghku hta tinang myit hpe hkang lu ai atsam grau nga wa hkra Chyum Laika hkaja ai lam gaw gara hku karum ya lu ai kun?

¹⁵ Hkristan ni gaw Chyum Laika hpe ayan atsawm hkaja na nga yang, tinang myit hpe  grau hkang lu wa na re. Karai Kasang gaw Yawshu hpe ndai hku tsun wa ai hpe dum u: “Ndai tara laika hpe na nten hta na dawm mai na n rai; dai hta ka da mada mahkra nang hkan nang lu n ga, dai hpe shani shana hti aru yu nga u; dai rai jang, nang maw ai lam byin lu nna, nang myit ai kaw du na ra ai.” (Yawshu 1:8) Chyum Laika hkaja ai lam gaw, tinang myit hpe hkang lu ai lam rawt jat wa na matu nang hpe gara hku karum ya lu ai kun?

¹⁶ Tinang myit hpe hkang lu ai atsam nga yang akyu lu nna, n nga yang jamjau hkrum ai lam hpe Chyum Laika hta lawm ai kasi ningli ni kaw nna anhte sharin la lu ai. Dai kasi ningli hpe Yehowa ka da ai gaw lachyum nga ai. (Roma 15:4) Dai lam ni hpe anhte hti na, hkaja na, atsawm sumru na nga yang hpaji rawng wa na re. Dai lam ni hpe nang hte na a dinghku hta gara hku jailang na hpe chye na hkra shakut u. Karai a Mungga kaw nna hpaji ga ni hpe hkan sa lu na matu Yehowa hpang karum hpyi u. Masa nkau mi hta tinang myit hpe hkang lu ai atsam yawm taw yang, dai hpe hkap la u. Dai hpang, de a matu akyu hpyi nna rawt jat wa hkra shakut u. (Yaku 1:5) Anhte a laili laika ni hta, nang hpe karum ya lu ai tatut re ai hpaji ga ni hpe mu tam na matu sawk sagawn u.

17. Ma ni tinang myit hpe hkang lu ai atsam rawt jat na matu kanu kawa ni hpe gara lam ni gaw karum ya lu ai kun?

¹⁷ Na a ma ni tinang myit hpe hkang lu ai atsam rawt jat wa na matu nang gara hku karum ya lu ai kun? Ma ni gaw dai atsam ningja ni lawm let n shangai wa ai hpe kanu kawa ni chye ai. Dai majaw, ma ni hpe tinang a kasi ningli ni kaw nna kaja ai atsam ningja ni hpe sharin ya ra ai. (Ehpesu 6:4) Na a ma ni hta tinang myit hpe hkang lu ai atsam yawm nga ai hpe chye yang, ngai gaw kaja ai kasi ningli madun nga ai kun ngu tinang hkum tinang san yu u. Hkaw tsun bungli ayan sa ai, zuphpawng ayan lung ai, dinghku nawku ayan galaw nna kaja ai kasi ningli hpe nang madun mai ai. Na a ma ni hpe n mai galaw ai ngu tsun ang yang tsun ra ai. Yehowa mung Adam yan Ewa hpe dai zawn masat da ya ai. Dai masat da ai lam ni gaw, Yehowa a ahkang aya hpe hkungga na matu shanhte hpe karum ya lu ai. Kanu kawa ni mung, tinang a ma ni hpe tara jahkrat ai, kasi kaja madun ai gaw, tinang myit hpe hkang lu na matu ma ni hpe sharin ya nga ai re. Karai Kasang a ahkang aya hpe tsawra nna shi a tsang madang ni hpe hkungga ai lam gaw grai manu dan ai atsam ningja ni rai nna, na ma ni hta nga na matu shalat ya lu ai.​—⁠Ga Shagawp 1:4,  5, 7, 8 hpe hti u.

18. Manang ni hpe hpaji rawng ai hku hpa majaw lata ra ai kun?

¹⁸ Kanu kawa raitim, n raitim, anhte yawng gaw manang hpe hpaji rawng ai hku lata ra ai. Na a manang ni gaw Yehowa hpe tsawra yang, lachyum nga ai bandung jahkrat na matu hte manghkang ni hpe koi na matu nang hpe n-gun jaw na re. (Ga Shagawp 13:20) Shanhte madun ai tinang myit hpe hkang lu ai kaja ai kasi ningli gaw nang hpe hkan galaw na matu shadut ya ai. Na a kaja ai kasi ningli mung shanhte hpe n-gun jaw lu ai. Tinang myit hpe hkang lu ai atsam anhte hta nga yang, Karai Kasang ra sharawng ai lam lu na matu karum ya lu ai. Anhte a prat ngwi pyaw nna tsawra ai ni hpe kaja ai lam ni garan ya lu na re.