1. Mungkan a tingkyeng akyu tam ai myit jasat gaw anhte a shagrit shanem ai myit hpe gara hku hkra machyi shangun ai kun?

KARAI a mungga kaw nna sharin la lu ai lam ni hpe tatut hkan sa na matu, hpa majaw yak ai kun? Jaw ai hpe galaw na matu, anhte hta shagrit shanem ai myit nga ra ai. “Hpang jahtum na nhtoi ni” hta, anhte a makau grup-yin na masha ni gaw “tinang hkum hpe tsaw ra ai ni, gumhpraw marin ai ni, grang dakat ai ni, gumrawng gumtawng re ai ni” hte “masin n si hkraw ai ni” re ai majaw, shagrit shanem na matu yak nga ai. (2 Timohti 3:1-3) Dai zawn myit jasat ni nga ai gaw n kaja ai hpe, Karai a mayam ni chye ai. Raitim, dai zawn myit jasat nga ai ni gaw awng dang nga nna shanhte a prat gaw ngwi pyaw nga ai zawn rai nga ai. (Shakawn 37:1; 73:3) Dai majaw, anhte ndai hku pyi myit wa chye ai: ‘Kaga masha ni hpe karum ya ai gaw teng sha galaw ging ai lam kun? Shagrit shanem ai myit madun na nga yang, masha ni ngai hpe naw hkungga na kun?’ (Luka 9:48) Mungkan myit jasat anhte hpe shingkang ka-up na ahkang jaw na nga yang, hpunau nauna ni hte kaja ai hku hkau lam gawng kya wa chye ai. Anhte gaw, Hkristan  ni re ai hpe mung kaga ni ginhka yak mat chye ai. Karai Kasang a mayam ni madun wa ai shagrit shanem ai kasi hpe hkaja nna hkan sa na nga yang, kaja ai akyu ni lu na re.

2. Moi na sadi dung ai Karai a mayam ni kaw nna anhte hpa sharin la lu ai kun?

² Karai Kasang a jinghku byin na matu, moi na sadi dung ai Karai a mayam ni hpe hpa gaw karum ya wa ai kun? Karai a myit hpe shanhte gara hku shapyaw ya ai kun? Jaw ai hpe galaw lu na nden marai hpe gara kaw nna lu la ai kun? Chyum Laika hta lawm ai shanhte a kasi ningli ni hpe anhte hti nna, myit sawn sumru na nga yang, makam masham ngang kang wa na re.

3, 4. (a) Anhte hpe Yehowa gara hku sharin ya ai kun? (b) Makam masham matut nna ngang kang na matu hpa majaw machye machyang hta n-ga naw ra ai kun?

³ Makam masham matut nna ngang kang nga na matu, ra ai lam ni hpe Yehowa lajang da ya ai. Chyum Laika, Hkristan laili laika ni, jw website, JW TV lamang, bat shagu zuphpawng ni hte zuphpawng kaba ni hku nna, hpaji jaw ga hte shaman shakyang ya ai lam lu la nga ai. Raitim, machye machyang hta n-ga kaga lam ni naw ra ai hpe Yesu sanglang dan ai. Shi ndai hku tsun ai: “Ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai”​—⁠Yawhan 4:34.

⁴ Karai a myit hku hkan galaw na gaw, Yesu a matu shahpa hte bung ai. Hkamja lam jaw ai malu masha gaw, hkum hkrang hpe n-gun ja shangun nna myit pyaw shangun ai. Dai zawn sha, Karai a myit hku hkan galaw ai gaw, anhte a makam masham hpe shangang ya nna myit pyaw shangun ai. Ga shadawn, hkaw tsun magam sa na matu grai pu ba nga ai ngu saga. Raitim, shakut nna sa dat ai. Bai wa ai shaloi, grai ngwi pyaw nna shalan shabran lam lu la ai ngu hkamsha ga ai n re i?

5. Hpaji rawng ai majaw hpa akyu ni lu na kun?

⁵ Yehowa galaw shangun ai lam ni hpe hkan galaw na nga yang, anhte hpaji rawng na re. (Shakawn 107:43) Hpaji byeng-ya rawng ai ni gaw, kaja ai akyu law law lu la ma ai. “Nang ra ai hpa rai ti mung, dai hte shadawn lu ai n rai. . . . shi hta manoi manat ai ni a matu asak hpun rai nga ai: Dai hpe n tat kau ai wa gaw a nga ai.” (Ga Shagawp 3:13-18) Yesu ndai hku tsun ai: “Ndai lam ni hpe nanhte chye nna, dai hpe hkan shatup myit yang gaw, nanhte a lu myit dai.” (Yawhan 13:17) Yesu matsun ai hte maren sape ni matut hkan galaw na nga yang, ngwi pyaw lu na re. Yesu a kasi ningli hte sharin achyin ai lam ni hpe hkan sa ai gaw, shanhte a prat hkrun lam byin wa ai.

6. Anhte sharin la wa ai lam ni hpe hpa majaw matut nna hkan sa ra ai kun?

⁶ Anhte sharin la wa ai lam ni hpe matut nna hkan sa ra ai. Ga shadawn, machye machyang hte hpawn hkingrai ni mung law law nga ai jak gram ai sara langai a lam hpe myit yu ga. Hkingrai ni hpe shi akyu jashawn yang she, ningtawn ai jak gram sara tai wa hkra, dai hkingrai ni gaw shi hpe karum ya lu na re. Shi hta mahkrum madup law law nga na re. Raitim, ningtawn ai jak gram sara langai matut naw byin mayu yang, shi sharin la wa ai lam ni hpe tatut akyu jashawn ra na re. Dai hte maren, teng man ai lam hpe anhte shawng nnan chye wa ai shaloi, hti ai lam ni hpe tatut hkan sa ai majaw, anhte grai pyaw ga ai. Raitim, matut nna ngwi pyaw lu hkra, Yehowa sharin ya ai lam ni hpe shani shagu matut hkan sa ra ai.

7. Chyum Laika kasi ningli ni kaw nna akyu lu la hkra hpa galaw ra na kun?

⁷ Ndai sumhpa hta, matut nna shagrit shanem myit nga na matu, yak shangun chye ai masa lam nkau hpe bawngban mat na re. Moi na sadi dung ai mayam ni gara hku shagrit shanem wa ai hpe hkaja lu na re. Wenyi lam hta ngang kang na matu, dai lam ni hpe hti ai daram hte sha gaw n mai ai. Hti ai lam ni hpe myit sumru nna tatut hkan sa ra ai.

8, 9. Kasa 14: 8-15 hta mu lu ai Pawlu a shagrit shanem ai myit kaw nna hpa sharin la lu ai kun? (Sumhpa shawng na sumla hpe yu u.)

⁸ “Masha yawng mayawng hkye hkrang la ai hkrum lu nna, teng man ai lam a chye chyang ai kaw du lu” na matu, Karai Kasang ra sharawng ai. (1 Timohti 2:4) Teng man lam hpe n chye shi ai masha ni hpe nang gara hku mu mada ai kun? Kasa Pawlu gaw, Yehowa hte seng ai lam nkau hpe chye da ngut chyalu re ai Yuda masha ni hpe hkaw tsun ai. Shut shai ai hpara shaje ni hpe nawku ai ni hpe mung hkaw tsun ai. Shanhte bai htang ai lam a majaw, Pawlu a shagrit shanem ai myit chyam dinglik hkrum wa ai. Gara hku nna kun?

⁹ Pawlu gaw, shawng nnan lang na sasana magam hta, Barnaba hte arau Lustra mare de sa ai. Lukaoni masha ni gaw, Pawlu yan Barnaba hpe grai laklai ai masha ni hku mu mada nna, shanhte a shut shai ai hpara ni a amying re ai Zeu hte Herma ngu amying jaw nna shaga ai. Pawlu yan Barnaba gaw dai hpe arawng la ai kun? Kaga mare lahkawng hta zingri zingrat hkrum wa ai majaw, ya gaw kaja ai masa de galai shai mat sai ngu nna mu mada ai kun? Dai zawn, masha ni shan hpe myit maju jung ai majaw, kabu gara shiga hpe masha ni grau myit lawm wa hkra galaw na matu ahkaw ahkang re ngu shan myit wa ai kun? N myit ai. Shan yan grai myit n pyaw nna ndai hku jahtau ai: “Hpa rai dai galaw wa myit ta? An mung nanhte hte maren shinggyim masha yan sha rai ga ai.”​—⁠Kasa 14:8-15.

10. Pawlu yan Barnaba gaw Lukaoni masha ni hta grau ai ngu hpa majaw n hkam la ai kun?

¹⁰ Anhte mung shinggyim masha ni sha re ai ngu nna Pawlu yan Barnaba tsun ai gaw, shan yan mung n hkum tsup ai ngu tsun mayu ai re. Lukaoni masha ni a nawku dawjau ai lam hte shan a nawku dawjau ai lam bung ai ngu tsun mayu ai n re. Pawlu yan Barnaba hpe sasana magam gun na matu Karai Kasang shangun dat ai re. (Kasa 13:2) Shan yan gaw, chyoi pra ai wenyi hte namman chya hkrum nna mauhpa myit mada lam lu wa ai. Dai lam a majaw, shan yan gaw kaga ni hta grau nna laklai ai ngu n hkamsha wa ai. Lukaoni masha ni mung, kabu gara shiga hpe hkap la na nga yang, sumsing lamu myit mada lam lu wa na hpe shan yan chye ai.

11. Pawlu zawn, anhte mung hkaw tsun ai shaloi gara hku shagrit shanem mai ai kun?

¹¹ Shagrit shanem myit madun ra na masa lam langai hpe anhte chye lu sai. Pawlu zawn, anhte mung, anhte lu da ai magam lit a majaw (sh) Yehowa a karum shingtau lam hte awng dang wa ai lam ni a majaw, kaga ni hta grau ai ngu nna n hkam la ga ai. Tinang hkum tinang ndai hku san mai ai: ‘Nye a hkaw tsun lawk hta nga ai masha ni hte seng nna gara hku hkamsha ai kun? Amyu rusai langai ngai hpe lachyen lahka mayu ai myit nga ai kun?’ Mungkan ting hta, Yehowa Sakse ni gaw, kabu gara shiga madat mayu ai masha ni hpe tam nga ai. Yehowa Sakse nkau nga yang, madang nem ai ngu nna masha ni sawn la ai amyu masha ni a amyu ga hte htung hking ni hpe pyi sharin la ai. Shanhte hkaw tsun nga ai masha ni hta na shanhte grau ai ngu n sawn la ai. De a malai, Mungdan shiga hpe masha law law hkap la wa hkra, shanhte hkaw tsun nga ai masha langai hpra a lam hpe chye na ya lu hkra shakut ai.

12. Kaga ni hpe teng sha lanu lahku ai lam Epahpra gara hku madun wa ai kun?

¹² Shagrit shanem ai myit madun ra na kaga lam langai gaw, “anhte zawn hpu la ai makam masham lu la nga ai” hpunau nauna ni a matu, akyu hpyi ya ai lam re. (2 Petru 1:1) Dai hpe Epahpra galaw wa ai. Chyum Laika hta shi a amying masum lang tsun da ai. Pawlu gaw Roma kaw htawng hkrat nga ai aten, Kolose Hkristan ni hpang de laika ka ai shaloi, Epahpra hte seng nna ndai hku tsun ai: “Nanhte a matu sharawng awng let shi akyu hpyi ya nga ai.” (Kolose 4:12, NW) Epahpra gaw, hpunau  nauna ni hpe atsawm chye nna, shanhte hpe lanu lahku ya ai. Pawlu gaw shi hpe “bawng dung manang” ngu shaga ai majaw, Epahpra hta mung manghkang ni nga na re. (Hpilimon 23) Raitim, shi gaw kaga ni a ra kadawn ai lam hpe matut nna karum ya nga ai. Epahpra gaw hpunau nauna ni a matu, akyu hpyi ya ai zawn, anhte mung akyu hpyi ya mai ai. Shanhte a amying gang nna pyi hpyi ya mai ai. Dai zawn akyu hpyi ga ni gaw grai atsam kaba ai.​—⁠2 Korinhtu 1:11, 12; Yaku 5:16.

13. Akyu hpyi ai lam hta Epahpra hpe gara hku kasi la mai na kun?

¹³ Kadai ni hpe amying gang nna akyu hpyi ya mai na lam myit yu u. Nawku hpung hta nga ai manang ni (sh) manghkang ni hpe hparan ra nga ai dinghku ni hpe nang myit mai ai. Shanhte gaw, gunglau ai lam ni hpe ninghkap nga ra ai (sh) dawdan lam ni jahkrat na matu yak nga ai rai na re. jw.org hta na “Makam Masham A Majaw Htawng Rawng Nga Ai Yehowa Sakse Ni” ngu ai sumhpa hta lawm ai hpunau ni a amying hpe shalawm nna akyu hpyi ya mai ai. (သတင်းကဏ္ဍ၊ တရားရေးရာဖြစ်စဉ်များ ngu ai hta yu u.) Tsawra ai marai langai ngai si mat ai ni a matu akyu hpyi ya mai ai. Ja gumhpraw yakhkak nga ai ni, tsin-yam tsin dam (sh) hpyen majan hkrum wa ai ni a matu mung akyu hpyi ya mai ai. Anhte akyu hpyi ya ra ai hpunau nauna ni grai law hkra nga ai. Anhte dai hku akyu hpyi ai gaw, anhte a matu sha n-ga, kaga masha ni a matu mung myit ya ai lam madun ai re. (Hpilipi 2:4) Dai zawn akyu hpyi ga ni hpe Yehowa na ai.

14. Yehowa gaw gara hku nna kaja htum madat ya ai kun?

¹⁴ Shagrit shanem ai myit madun ra na kaga lam langai gaw, atsawm sha madat ya ai lam re. Yaku 1:19 hta “na la na matu lawan nga u” ngu nna tsun da ai. Kaja htum madat ya ai wa gaw Yehowa re. (Ningpawt 18:32; Yawshu 10:14) Ga shadawn, Pru Mat Wa Ai 32:11-14 (Hti u) hta lawm ai lam hpe hti yu u. Mawshe gaw shi a ningmu hte seng nna tsun ai shaloi, Yehowa n madat ya tim mai ai. Raitim, shi madat ya wa ai. Moi shut ga ai marai langai ngai a tsun shaga ai lam hpe myit galu let madat ya nna, shi a hpaji jaw ga hpe nang hkan sa na kun? Yehowa  chyawm gaw, kam sham ai myit hte akyu hpyi ai shinggyim masha yawng a akyu hpyi ga hpe myit galu let madat ya ai.

15. Kaga masha ni hpe shagrau ai hku nna Yehowa hpe gara hku kasi la mai na kun?

¹⁵ Tinang hkum tinang ndai hku san u: ‘Abraham, Rahkela, Mawshe, Yawshu, Manoa, Elia hte Hezekia ni a akyu hpyi ga hpe, Yehowa shagrit shanem let madat ya ai nga yang, ngai mung madat ya ging ai n re i? Hpunau nauna ni a hpaji jaw ga hpe madat ya ai hku nna shanhte hpe shagrau ya lu na kun? Byin mai ai daram shanhte a hpaji jaw ga ni hpe hkan sa ai kun? Nawku hpung hta (sh) dinghku kata hta ngai grau nna aten jaw ra na marai langai ngai nga ai kun? Dai lam ni hte seng nna ngai hpa galaw na kun?’​—⁠Ningpawt 30:6; Tara Agyi 13:9; 1 Hkawhkam 17:22; 2 Hkawhkam Labau 30:20.

16. Shimi matsa nna gasat ai shaloi, Hkawhkam Dawi gara hku bai htang ai kun?

¹⁶ Kaga masha ni anhte hpe n tara ai hku galaw ai shaloi, shagrit shanem ai myit gaw, tinang hkum tinang hkang lu hkra karum ya ai. (Ehpesu 4:2) Kaja htum kasi ningli hpe 2 Samuela 16:5-13 (Hti u) hta mu lu ai. Hkawhkam Shawlu a jinghku re ai Shimi gaw, Dawi hte shi a shangun ma ni hpe matsa mawa ga tsun ai, gasat ai. Shimi galaw ai lam hpe Dawi jahkring kau mai ai. Raitim, myit galu let hkam sharang wa ai. Tinang hkum tinang hkang lu hkra Dawi gara hku galaw wa ai kun? Shakawn Kungdawn daw kaba 3 hpe hti yang anhte chye lu na re.

17. Tinang hkum tinang hkang lu hkra Dawi hpe hpa gaw karum ya ai kun? Dawi hpe gara hku kasi la mai na kun?

¹⁷ Dawi gaw, shi a kasha Absalom shi hpe sat na matu shakut nga ai aten hta, Shakawn Kungdawn daw kaba 3 hpe ka wa ai. Dai aten hta Shimi sa gasat ai re. Raitim Dawi gaw, matut simsa na matu shakut wa ai. Gara hku nna kun? Shakawn Kungdawn 3:4 hta ndai hku tsun da ai: “Nye a nsen hte ngai Yehowa hpe shaga nga nna, Shi gaw shi a chyoi pra ai bum hta nna ngai hpe htan ya ni ai.” N kaja ai lam ni anhte hkrum yang, Dawi zawn anhte mung akyu hpyi ra ai. Rai yang, hkam jan lu hkra, Yehowa gaw chyoi pra ai wenyi jaw na re. Anhte hpe marai langai ngai gaw n kaja ai hku galaw yang, tinang hkum tinang hkang lu na kun? (sh) Mara raw kau ya lu na kun? Nang hkrum nga ai mayak mahkak hpe Yehowa chye nna, nang hpe shaman chyeju jaw na hpe teng sha kam ai kun?

18. Yehowa jaw ai lam matsun ni hpe hkan sa yang hpa akyu ni lu na kun?

¹⁸ Jaw ai ngu anhte chye ai lam ni hpe galaw na nga yang, hpaji byeng-ya rawng wa nna Yehowa mung shaman chyeju jaw na re. Ga Shagawp 4:7 hta ndai hku tsun ai: “Hpaji byeng-ya madung rai nga ai.” Hpaji byeng-ya gaw machye machyang hta madung tawn ai. Raitim, machye machyang hta n-ga naw ra ai. Hpaji byeng-ya hta, anhte a dawdan ai lam ni mung lawm ai. Kagyin ni pyi, nshung ta a matu shahpa mahkawng ai hku nna, hpaji byeng-ya rawng ai hpe madun ai. (Ga Shagawp 30:24, 25) “Karai Kasang a hpaji byeng-ya” ngu nna mung amying lu ai Hkristu gaw, Kawa ra sharawng ai hpe ayan na galaw ai. (1 Korinhtu 1:24; Yawhan 8:29) Shagrit shanem let jaw ai ngu anhte chye da ai hpe lata ai hku nna, hpaji byeng-ya rawng ai lam madun na nga yang, Karai Kasang gaw anhte hpe shaman chyeju jaw na re. (Mahte 7:21-23 hpe hti u.) Dai majaw, nawku hpung hpe, shagrit shanem let Yehowa hpe nawku lu ai shara shatai na matu, nang mung shang lawm madi shadaw nga u. Jaw ai ngu anhte chye da ai lam ni hpe hkan galaw na matu, myit galu ra nna, aten ra na re. Raitim, matut nna shagrit shanem nga u. Rai yang, ya aten hta mung, htawm hpang hta mung ngwi pyaw lu na re.