1. Yehowa Sakse ni gaw hpa majaw ngwi pyaw ai amyu masha ni rai kun? (Sumhpa shawng na sumla hpe yu u.)

YEHOWA SAKSE ni gaw, ngwi pyaw ai amyu masha ni re. Zuphpawng ni, zuphpawng kaba ni (sh) kanawn mazum ai aten ni hta, mani sumsai hte shada da tsun shaga hkat nna grai pyaw nga ma ai. Hpa majaw dai daram pyaw ai kun? “Ngwi pyaw ai Karai Kasang” Yehowa hpe chye ai majaw re. Yehowa hpe nawku nna, shi hpe kasi la na matu shakut ma ai. (1 Timohti 1:11, NW; Shakawn 16:11) Yehowa gaw ngwi pyaw ai a npawt rai nna, anhte hpe mung pyaw shangun mayu ai majaw, ngwi pyaw lu na lam amyu myu hpe jaw da ai.​—⁠Tara Jahprang 12:7; Hpaji 3:12, 13.

2, 3. (a) Ngwi pyaw ai ngu ai lachyum gaw hpa rai kun? (b) Ngwi pyaw na matu hpa majaw yak ai kun?

² Nang gaw gara hku kun? Ngwi pyaw nga ai kun? Pyaw ai ngu ai lachyum gaw, tinang a prat hpe myit dik nna, grai kabu gara ai hpe tsun ai re. Yehowa kaw nna shaman chyeju lu ai ni sha, jet ai ngwi pyaw lam lu na ngu, Chyum Laika hta tsun da ai. Raitim, dai ni aten hta ngwi pyaw lu na matu hpa majaw yak nga ai kun?

 ³ Hki ba lit li ai masa ni hte hkrum ai majaw, ngwi pyaw lu na matu yak chye ai. Ga shadawn, tsawra ai marai langai hpung kaw na shapraw hkrum ai (sh) si mat ai, dinghku hka bra ai, bungli n nga mat ai lam ni hkrum chye ai. Dinghku hta ayan na pawt hkat nga ai majaw, simsa lam n nga ai, bungli manang (sh) jawng manang ni gaw anhte hpe jahpoi asawng ai, Yehowa hpe nawku ai majaw, zingri hkrum ai (sh) htawng jahkrat hkrum ai lam ni a majaw mung, ngwi pyaw na matu yak nga na re. Shing nrai, hkam kaja lam nau n nga wa ai, machyi jung nga ai, myit daw myit hten nga ai majaw mung rai na re. Raitim, masha ni hpe shalan shabran ya nna ngwi pyaw shangun na “ngwi pyaw ai Daru Magam du” Yesu Hkristu hpe myit dum nga u. (1 Timohti 6:15, NW; Mahte 11:28-30) Satan a mungkan hta anhte asak hkrung nga ai majaw, manghkang grai law hkra hkrum tim pyi, anhte hpe ngwi pyaw shangun na atsam ningja nkau hpe, Bum Ntsa Na Mungga hta Yesu tsun wa ai.

4, 5. Matut nna ngwi pyaw lu na matu hpa galaw ra ai kun?

⁴ Yesu gaw, grai ahkyak ai ndai lam hpe tsun wa ai: “Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga ma lu ai.” (Mahte 5:3) Wenyi lam hta ra kadawn nga ai ngu nna anhte hkamsha yang, Yehowa a lam matsun hte karum shing tau lam ra nna, shi hpe chye chyang ra ai ngu ai hpe hkam la na re. Dai lam hpe gara hku galaw mai ai kun? Chyum Laika hpe hkaja nna Karai Kasang a ga madat ra ai. Shi hpe nawku dawjau ai lam gaw, anhte a prat hta ahkyak htum byin ra ai. Dai lam ni galaw ai nga yang, ngwi pyaw lu na re. Karai a ga sadi ni hpring tsup wa na ngu ai makam masham mung, grau nna ngang kang wa na re. Chyum Laika hta lawm ai, “a rawng ai myit mada ai lam” gaw, anhte hpe n-gun jaw lu na re.​—⁠Titu 2:11.

⁵ Manghkang ni hkrum nga tim, ngwi pyaw mayu ai nga yang, Yehowa hte hku hkau lam matut nna kaja hkra galaw ra ai. Kasa Pawlu ndai hku tsun ai: “Madu hta tutnawng e kabu gara nga mu; bai ngai tsun nngai, kabu gara nga mu.” (Hpilipi 4:4) Yehowa hte ni htep mayu ai nga yang, shi hte seng ai machye machyang nga ra ai. Chyum Laika hta ndai hku tsun ai: “Hpaji byeng-ya mu hkrup ai hte, Chye chyang ai myit lu la ai wa gaw, a nga ai. Shi gaw, shi hta manoi manat ai ni a matu asak hpun rai nga ai: Dai hpe n tat kau ai wa gaw a nga ai.”​—⁠Ga Shagawp 3:13, 18.

6. Gara lam hpe galaw yang anhte ngwi pyaw lu na kun?

⁶ Matut nna ngwi pyaw lu na matu, Chyum Laika kaw nna chye wa ai lam ni hpe hkan sa na matu mung ahkyak ai. Dai hpe galaw na matu, kade daram ahkyak ai hpe Yesu ndai hku tsun ai: “Ndai lam ni hpe nanhte chye nna, dai hpe hkan shatup myit yang gaw, nanhte a lu myit dai.” (Yawhan 13:17; Yaku 1:25 hpe hti u.) Wenyi lam hta ngang kang na matu hte, matut ngwi pyaw lu na matu, Yesu tsun ai dai ga hpe hkan sa ra ai. Ngwi pyaw lam n nga mat shangun ai masa lam law law hte hkrum ai shaloi, gara hku ngwi pyaw  lu na kun? Bum Ntsa Na Mungga Hta Yesu tsun wa ai lam hpe hkaja yu ga.

7. Yawn hkyen ai ni gaw gara hku nna ngwi pyaw lu ai kun?

⁷ “Yawn hkyen hkrum ai ni gaw, a lu ma ai; kaning rai nme law, shanhte shalan shabran ai hkrum na ma ra ai.” (Mahte 5:4) ‘Yawn hkyen hkrum ai wa gaw’ gara hku nna ngwi pyaw lu na kun? ngu nna nang myit na re. Yawn hkyen hkrum nga ai masha yawng hpe Yesu tsun nga ai n re. Yak la ai “hpang jahtum na nhtoi” hta hkrum ai myit ru myit tsang lam ni a majaw, yawn hkyen hkrum nga ai nhkru n kaja ai masha law law nga ai. (2 Timohti 3:1) Nhkru n kaja ai ni gaw, Yehowa a matu n myit ai sha, shanhte a matu sha myit ai. Yehowa hte hku hkau lam kaja hkra n galaw ai majaw, ngwi pyaw lam n lu ma ai. Wenyi lam hta ra kadawn nga ai hpe hkap la ai masha ni hpe Yesu tsun nga ai re. Masha law law gaw Karai Kasang hpe nyet kau nna, Karai ra sharawng ai hte maren asak n hkrung ai hpe mu ai majaw, shanhte yawn hkyen ai re. Shanhte gaw, yubak mara law la ai hpe hkam la nna, mungkan hta hkrit hpa lam ni byin nga ai hpe mung, sadi hkrup ai. Dai ni a majaw yawn hkyen nga ai ni hpe, Yehowa sadi hkrup nna, shi a Mungga hte shalan shabran ya ai. Ngwi pyaw simsa lam hte asak jaw ai.​—⁠Ezekela 5:11; 9:4 hpe hti u.

8. Myit sumnung ai ni gaw, gara hku nna ngwi pyaw lu ai kun?

⁸ “Myit sumnung ai ni gaw, a lu ma ai; kaning rai nme law, shanhte mungkan ga hpe madu lu na ma ra ai.” (Mahte 5:5) Sumnung ai myit gaw matut nna ngwi pyaw hkra, gara hku karum ya ai kun? Masha law law gaw jahte tam nna zai ai majaw, manghkang ni byin nga ai. Raitim, teng man lam hpe chye wa ai shaloi, galai shai wa nna “gawng shing-yan ningnan” hpe hpun wa ma ai. Dai majaw, shanhte gaw “matsan dum ai, sumnung ai, mai kaja ai, myit nem ai, myit gyip ai hte myit galu kaba ai” ni tai wa sai. (Kolose 3:9-12) Akyu gaw, shanhte hta simsa lam nga nna kaga ni hte mung, hku hkau lam nga wa ai majaw, ngwi pyaw nga ma ai. Shanhte gaw, mungkan ga hpe madu lu na ngu nna Karai Kasang ga sadi jaw da ai.​—⁠Shakawn 37:8-10, 29.

9. (a) Myit sumnung ai ni gaw mungkan ga hpe madu lu na ngu nna Yesu tsun ai lachyum gaw hpa rai na kun? (b) “Ding hpring ai hpe kawsi hpang kara nga ai ni” gaw, hpa majaw ngwi pyaw lu na kun?

⁹ Myit sumnung ai ni gaw, mungkan ga hpe madu lu na ngu nna Yesu tsun ai lachyum gaw hpa rai na kun? Namman chya hkrum ai ni gaw, hkawhkam hte hkinjawng ni hku nna mungkan ga hpe up hkang ai shaloi, dai sali wunli hpe lu la na re. (Shingran 20:6) Wan hku law ai masha ni gaw, sumsing lamu myit mada lam n nga tim, mungkan ga hta htani htana asak hkrung lu ai shaloi, mungkan ga hpe madu lu na re. Shanhte gaw hkum tsup mat nna ngwi pyaw lam hte simsa lam lu la na re. “Ding hpring ai hpe kawsi hpang kara nga ai ni gaw, a lu ma ai” ngu nna Yesu tsun wa ai ni gaw shanhte sha re. (Mahte 5:6) Nhkru ai lam yawng hpe Yehowa yeng seng kau ai shaloi, shanhte myit dik lu na re. (2 Petru 3:13) Mungkan nnan hta, ding hpring ai masha ni gaw ngwi pyaw nna, nhkru ai masha ni a majaw yawn hkyen hkrum sana n re.​—⁠Shakawn 37:17.

10. Matsan dum ai ngu ai lachyum gaw hpa rai kun?

¹⁰ “Matsan chye dum ai ni gaw, a lu ma ai; kaning rai nme law, shanhte matsan dum la ai hkrum na ma ra ai.” (Mahte 5:7) Matsan chye dum ai ngu ai lachyum gaw, tsawra ai, lanu lahku ai, myit tau ya ai hpe tsun ai re. Raitim, matsan dum ai myit hta hkamsha  lam hta n-ga lawm ai. Matsan dum ai ngu ai hta kaga masha ni a matu lama ma galaw ya nna karum ya ai lam mung lawm ai ngu nna Chyum Laika hta tsun da ai.

11. Samari masha ga shadawn kaw nna anhte hpa sharin la lu ai kun?

¹¹ Luka 10:30-37 hpe hti u. Yesu tsun wa ai Samari masha ga shadawn hta, matsan dum ai myit hte seng nna grai kaja ai lam langai hpe mu lu ai. Samari masha hta nga ai matsan dum myit gaw, jamjau hkrum nga ai masha hpe karum ya na matu shadut ya wa ai. Ndai ga shadawn hpe tsun ngut ai hpang, Yesu ndai hku tsun ai: “Nang mung dai zawn wa galaw u.” Dai majaw, tinang hkum tinang ndai hku san mai ai: ‘Ngai dai zawn galaw nga ai kun? Samari masha galaw ai zawn, ngai galaw ai kun? Kaga ni tsin-yam hkrum yang, karum ya lu na lam lama ma ngai galaw ai kun? Ga shadawn, nawku hpung hta nga ai asak kaba ai ni, gaida ni (sh) Yehowa hpe n nawku ai kanu kawa nga ai ma ni hpe ngai karum ya ai kun? “Myit kaji nga ai ni hpe shalan shabran” ya nga ai kun?’​—⁠1 Htesaloni 5:14; Yaku 1:27.

12. Matsan dum myit madun yang hpa majaw ngwi pyaw ai kun?

¹² Matsan dum myit madun yang, hpa majaw ngwi pyaw ai kun? Kaga ni hpe matsan dum yang, gam jaw gam ya na re. Gam jaw gam ya yang, ngwi pyaw na ngu nna Yesu tsun ai. Dai zawn galaw ai hpe Yehowa mung ra sharawng ai. (Kasa 20:35; Hebre 13:16 hpe hti u.) Matsan dum myit madun ai masha langai hpe Hkawhkam Dawi ndai hku tsun ai: “Yehowa shi hpe bau sin shabran la na wu ai, Dai mungdan hta shi apyaw sha nga lu na ra ai.” (Shakawn 41:1, 2) Kaga masha ni hpe anhte matsan dum yang, Yehowa mung anhte hpe matsan dum nna, htani htana ngwi pyaw lam jaw na re.​—⁠Yaku 2:13.

13, 14. “Myit san seng ai ni” tai na matu, hpa majaw ahkyak ai kun?

¹³ Yesu ndai hku tsun ai: “Myit san seng ai ni gaw a lu ma ai; kaning rai nme law, shanhte gaw Karai Kasang hpe mu lu na ma ru ai.” (Mahte 5:8) Myit san seng na matu, anhte a myit mang ai lam, ra marin ai lam ni gaw san seng ra ai. Dai hku galaw yang she, anhte a nawku dawjau ai lam hpe Yehowa hkap la na re.​—⁠2 Korinhtu 4:2 hpe hti u; 1 Timohti 1:5.

 ¹⁴ Myit san seng ai ni gaw, Yehowa hte hku hkau lam kaja ma ai. “Tinang a hpun palawng hkrut kau ai ni gaw, a lu ma ai” ngu nna Yehowa tsun ai. (Shingran 22:14) “Tinang a hpun palawng hkrut kau ai” ngu ai lachyum gaw hpa rai kun? Namman chya hkrum ai Hkristan ni hpe, san seng ai ni hku nna Yehowa mu mada ai lam ga shadawn hku nna tsun ai re. Shanhte hpe sumsing lamu hta n si lu sai asak Yehowa jaw nna, shanhte mung htani htana kabu pyaw lu na re. Mungkan ga hta asak hkrung na myit mada lam nga ai masha wunawng wuwa kaba hpe gaw, ding hpring ai ni hku mu mada nna shi a jinghku byin lu ai ahkaw ahkang jaw na ngu ai lachyum re. Shanhte gaw, “tinang a hpun palawng hpe Sagu Kasha a asai hta hkrut jahpraw la ai ni rai nga ma ai” ngu nna Chyum Laika hta tsun da ai.​—⁠Shingran 7:9, 13, 14.

15, 16. Myit san seng ai ni gaw Karai Kasang hpe gara hku nna mu lu na kun?

¹⁵ Yehowa ndai hku tsun ai: “Ngai e mu ai masha hkrung nga lu ai n rai.” (Pru Mat 33:20) Rai yang, myit san seng ai ni gaw, gara hku nna “Karai Kasang hpe mu lu” na kun? “Mu lu” ngu ai ga si a madung Greek ga lachyum gaw, chye na na matu shingran mu ai ngu ai lachyum mung re. Dai majaw, “Karai Kasang hpe mu lu” ai ngu ai gaw, Karai Kasang a lam hpe chye na lu nna, shi a atsam ningja ni hpe tsawra ai lachyum re. (Ehpesu 1:18) Yesu gaw, Karai Kasang a atsam ningja ni hpe htep lahti hkan sa ai majaw, ndai hku lu tsun ai: “Ngai hpe mu yu ai wa gaw, Wa hpe mu yu nu ai.”​—⁠Yawhan 14:7-9.

¹⁶ Anhte a prat hta Karai Kasang karum ya ai lam hpe mu ai shaloi hta mung, anhte “Karai Kasang hpe mu lu” ai re. (Yoba 42:5) Shi hpe sadi dung let nawku nna matut san seng nga ai ni hpe Yehowa jaw na htawm hpang myit mada lam hpe mung anhte myit maju jung (sh) “mu lu” ga ai. Namman chya hkrum ai ni gaw, sumsing lamu de hkrung rawt mat ai shaloi, Yehowa hpe gaja wa mu lu na re.​—⁠1 Yawhan 3:2.

17. Simsa lam tam ai ni gaw hpa majaw ngwi pyaw ai kun?

¹⁷ Yesu ndai hku tsun ai: “Ngwi pyaw simsa lam a matu galaw gunhpai ai ni gaw a lu ma ai.” (Mahte 5:9, JCLB) Kaga masha ni hte simsa na matu anhte shakut na nga yang, anhte ngwi pyaw na re. Sape Yaku ndai hku tsun ai: “Htingrat htinglu shachyen chye ai ni a lata hte, ding hpring lu ai asi gaw, ngwi pyaw ai hte gat nga ai.” (Yaku 3:18) Dai majaw, nawku hpung hta (sh) kun dinghku hta marai langai ngai hte n htuk hkat ai nga yang, simsa lam nga hkra galaw chye ai wa tai na matu, Yehowa kaw akyu hpyi u. Rai yang, Yehowa gaw, chyoi pra ai wenyi nang hpe jaw na re. Chyoi pra ai wenyi gaw, Hkristan atsam ningja ni madun lu hkra karum ya ai majaw, nang pyaw wa na re. Simsa lam tam na matu kade daram ahkyak ai hte seng nna Yesu ndai hku tsun ai: “Dai rai nna dai hkungri de, na a kumhpa hpe nang la sa yang, na a nhpu nnau nang hpe mara shagun ai shara lama ma nga nga ai hpe, dai shaloi jang nang dum lu wu yang gaw, hkungri a  man e na a kumhpa hpe tawn da nhtawm, na nhpu nnau hte myit jahkrum la na shawng sa nna, dai hpang e na a kumhpa hpe wa mara da u.”​—⁠Mahte 5:23, 24.

18, 19. Zingri zingrat hkrum tim pyi, Hkristan ni gaw hpa majaw ngwi pyaw lu ai kun?

¹⁸ “Nye a lam majaw, masha ni gaw nanhte hpe asawng asang di nna zingri zingrat nga ma ai hte, masu ai hku hkan let mara amyu myu shagun da myit dai shaloi e, nanhte a lu myit dai.” Yesu hpa hpe tsun mayu ai kun? Shi ndai hku tsun ai: “Kabu nna pyaw pyaw rai nga mu; kaning rai nme law, sumsing lamu hta e nanhte a shabrai kaba nga malit dai: nanhte a shawng na myihtoi ni hpe mung shanhte dai hte maren zingri zingrat di kau ma nu ai.” (Mahte 5:11, 12) Kasa ni hpe kayat nna n hkaw tsun na matu tsun ai shaloi, kasa ni gaw “kabu gara ai myit hte dai salang hpawng na pru wa ma ai.” Kayat hkrum ai majaw, shanhte pyaw na gaw n re. Raitim, Yesu a amying ningsang a majaw, “kaya hkrum na gaw, ging nga ga ai, nga nna myit la ai” majaw, shanhte pyaw lu ai re.​—⁠Kasa 5:41.

¹⁹ Dai ni na aten hta, Yehowa a mayam ni gaw, Yesu a amying ningsang a majaw zingri hkrum tim, matut nna hkamjan nga ai. (Yaku 1:2-4 hpe hti u.) Yakhkak jamjau lam hte zingri zingrat hkrum ai shaloi, anhte mung pyaw na gaw n re. Raitim, Yehowa hpe matut nna sadi dung yang, hkam sharang lu na matu ra nga ai nden marai hpe lu la na re. Henarik Donik hte shi kahpu a mabyin hpe myit yu ga. 1944 August shata hta, shan yan hpe laja lana zingri ai htawng de sa kau ai. Shan hpe zingri ai wa ndai hku tsun ai: “Shan hpe hpa hte mung n hkalem lu ai. Shan hta nga ai share shagan myit gaw, shan hpe pyaw shangun ai.” Henarik ndai hku tsun ai: “Share shagan langai tai mayu ai gaw n re. Yehowa hpe sadi dung mayu ai myit hte nden marai a majaw, mayak mahkak ni hpe tawt lai lu nna, ngwi pyaw lu ai.” “Myit rawt let akyu hpyi ai gaw Yehowa hte ni htep shangun ai. Yehowa gaw ngai hpe karum ya ai wa hku nna sakse madun wa ai.”

20. “Ngwi pyaw ai Karai Kasang” hpe nawku ai gaw hpa majaw pyaw ai kun?

²⁰ “Ngwi pyaw ai Karai Kasang” Yehowa ra sharawng ai lam hpe anhte lu da ai nga yang, zingri hkrum tim, dinghku hta ninghkap hkrum tim, machyi makaw hkrum tim, asak kung wa tim, ngwi pyaw lu na re. (1 Timohti 1:11, NW) “Masu magaw n chye ai Karai Kasang” gaw, mauhpa myit mada lam law law lu la na ngu ga sadi jaw da ai majaw mung, anhte ngwi pyaw lu ai. (Titu 1:3) Dai ga sadi ni hpring tsup wa hkra Yehowa galaw ya ai shaloi, ya aten hta anhte hkrum nga ai manghkang ni hpe dum sana n re. Hparadisu hta, anhte n lu ga shi ai ngwi pyaw lam hpe lu la nna, “angwi apyaw hta sharawng awng” lu na re.​—⁠Shakawn 37:11.