NAUNA Diana gaw, asak 80 jan rai nna, lai wa sai shaning ni hta mayak mahkak grai law hkra hkrum wa ai. Shi a madu wa gaw, Ezaima ana (Alzheimer’s disease) hkamsha nna, asak kaba ai ni rawng ai tsi rung hta n nga mat wa sai. Shi kasha lahkawng mung si mat nna, shi mung chyu mawng ana hkamsha nga ai. Raitim, nauna Diana gaw zuphpawng ni hte hkaw tsun magam hta galoi mung kabu gara let shang lawm nga ai hpe hpunau nauna ni mu lu ai.

Jon gaw, ninghtawn hpung kawan hku nna shaning 43 jan magam gun wa ai. Shi a lit hpe grai manu shadan nna, dai gaw shi a aprat re. Raitim, machyi nga ai shi a jinghku hpe yu lanu lahku ra ai majaw, ninghtawn hpung kawan magam kaw nna hkring kau ra ai. Jon hpe chye ai hpunau nauna ni gaw, zuphpawng kaba ni hta shi hte hkrum ai shaloi, shi hta galai shai ai lam n nga ai hpe sadi hkrup ma ai. Jon gaw matut nna kabu gara nga ai.

Nauna Diana hte hpunau Jon hta gara hku nna kabu gara lam nga lu ai kun? Mayak mahkak hkrum ai marai langai gaw gara hku nna ngwi pyaw lu na kun? Tinang sharawng ai magam lit hpe asum hkam kau ra ai nga yang, gara hku nna kabu gara lu na kun? Chyum Laika hta mahtai mu lu ai. ‘Ding man ai ni Yehowa hta kabu gara nga na’ ngu nna tsun da ai. (Shakawn 64:10) Agrin nga ai kabu gara lam gaw hpa re ai hpe chye da yang, dai Chyum daw hpe grau nna chye na wa na re.

Prat tup ngu na daram kabu gara shangun lu ai lam nkau nga ai. Ga shadawn, shada da tsawra nna hkungran da ai yan la langai hpe myit yu u. Kanu kawa tai wa na marai langai ngai hpe myit yu u. Shing nrai, Yehowa a magam hta lit nnan lu la ai marai langai ngai hpe myit yu u. Dai kumhpa ni yawng gaw, Yehowa kaw nna re ai majaw anhte hpe kabu gara shangun ai. Hkungran na matu, ma shaprat na matu atsam jaw da nna, uhpung hta magam gun na matu anhte hpe Yehowa lit jaw da ai.​—⁠Ningpawt 2:18, 22; Shakawn 127:3; 1 Timohti 3:1.

Raitim, lam nkau gaw kabu gara lam hpe chyahkring chyahkra sha jaw lu ai. Yawn hpa gaw, ningrum ningtau sadi n dung mat ai (sh) n nga mat ai lam re. (Ezekela 24:18; Hosea 3:1) Kashu kasha ni gaw, kanu yan kawa hte Karai Kasang a ga n madat ai majaw, shapraw kau hkrum ai baw pyi byin chye ai. Ga shadawn, Samuela a  kasha ni gaw, Yehowa hkap la ai lam hku magam n gun ai. Dawi gaw Batsheba hte shut hpyit ai majaw, dinghku hta manghkang law law hkrum wa ai. (1 Samuela 8:1-3; 2 Samuela 12:11) Dai lam ni hte hkrum ai shaloi, shanhte kabu gara lu na n re. Yawn hkyen ai hte hkra machyi ai lam ni shanhte hkrum sha ai.

Dai hte maren, anhte machyi makaw hkrum ai majaw, dinghku hpe yu lanu lahku ra ai majaw, uhpung hta galai shai ai lam ni nga ai majaw, Yehowa a magam hta laksan lit ni hpe n lu gun mat ai. Laksan magam gun wa ai kaw nna hkring kau ra ai masha law law gaw, shanhte hpe kabu gara shangun lu ai lam hpe bai marit ai ngu tsun ma ai.

Dai lam ni gaw kabu gara lam chyahkring chyahkra sha lu shangun ai hpe mu lu ai. Prat hta mayak mahkak ni hkrum tim, matut nna kabu gara lu na lam nga ai kun? Nga ai. Samuela, Dawi hte masha nkau mi gaw mayak mahkak ni hkrum tim, matut nna kabu gara lu ma ai.

Jet ai kabu gara lam gaw hpa re ai hpe Yesu chye ai. Ginding aga de n sa shi yang, shi gaw “[Yehowa] a man e, tut nawng kabu gara nga” ai ngu nna Chyum Laika hta tsun da ai. (Ga Shagawp 8:30, JCLB) Raitim, ginding aga de du wa ai shaloi, kalang lang ladu lai hkra mayak mahkak ni hkrum ai. Hpa mi raitim, Kawa a myit ra ai lam hpe galaw nna kabu gara lam lu wa ai. (Yawhan 4:34) Hpang jahtum nni nkri hkrum ra ai aten hta gaw gara hku kun? Anhte ndai hku lu hti ai: “Shi a man e ang wa ai kabu gara ai lam majaw, . . . wudang lam hpe hkam nu ai.” (Hebre 12:2) Jet ai kabu gara lam hte seng nna Yesu tsun wa ai lam lahkawng kaw nna sharin la lu ai.

Kalang mi hta sape 70 gaw, hkaw tsun sa nna Yesu hpang de kabu gara let bai wa ai. Hpa majaw nga yang, mauhpa amu ni hpe galaw lu nna, nat ni hpe pyi shaden kau lu ai majaw re. Raitim, Yesu shanhte hpe ndai hku tsun ai: “Nat ni nanhte a ga madat ma ai majaw, hkum kabu myit; nanhte a amying sumsing lamu hta ka da nga ai majaw she, kabu nga mu.” (Luka 10:1-9, 17, 20) Laksan lit ni lu ai majaw, lu la ai kabu gara lam hta na Yehowa a myi man lu na matu grau ahkyak ai.

Hpang kalang mi hta, masha hpawng hpe Yesu ga shaga nga ai shaloi, Yuda num langai gaw, Yesu a sharin achyin ai lam hpe grai ra sharawng nna, dai zawn kasha lu ai kanu gaw grai kabu na re ngu tsun ai. Raitim, Yesu ndai hku bai htang wa ai:  “Karai Kasang a mungga madat la nna, hkan nang ai ni gaw a lu ma ai.” (Luka 11:27, 28) Tinang a kashu kasha ni a majaw arawng lu ai gaw, anhte hpe pyaw shangun ai. Raitim, Yehowa a ga madat nna shi hte kaja ai hku hkau lam nga ai gaw, anhte hpe htani htana ngwi pyaw lam lu shangun ai.

Yehowa anhte hpe ra sharawng ai ngu hkamsha ai shaloi, grai kabu gara ga ai. Mayak mahkak ni hkrum ai gaw pyaw hpa n raitim, kabu gara lam gaw matut nna naw nga lu ai. Mayak mahkak ni a lapran hta sadi dung ai nga yang, kabu gara lam gaw grau nna law htam wa na re. (Roma 5:3-5) Yehowa gaw, shi hpe kamhpa ai ni hpe chyoi pra ai wenyi jaw ai. Kabu gara lam gaw chyoi pra ai wenyi a asi langai re. (Galati 5:22) Dai gaw, Shakawn Kungdawn 64:10 hta tsun da ai ndai ga hpe chye na na matu karum ya ai: ‘Ding man ai ni Yehowa hta kabu gara nga na.’

Nauna Diana hte hpunau Jon gaw, mayak mahkak ni hkrum tim, hpa majaw matut nna kabu gara lu ai lam hpe dai lam kaw nna chye lu ai. Nauna Diana ndai hku tsun ai: “Ma langai gaw kanu kawa hte arau nga lu ai zawn, ngai mung Yehowa kaw shingbyi lu ai.” Shi ndai hku mung tsun ai: “Mani sumsai myi man hte matut nna hkaw tsun lu ai atsam nga hkra ngai hpe shaman chyeju jaw ai ngu ngai hkamsha ai.” Laksan magam lik kaw nna hkring mat tim, hkaw tsun magam hta kabu gara let matut nna shang lawm lu na matu, hpunau Jon hpe hpa gaw karum ya ai kun? Shi ndai hku tsun ai: “1998 kaw nna Magam Shaman Shakyang Jawng hta sharin ya na matu lit ap hkrum ai. Tinang hkrai hkaja ai lamang hpe moi na hta grau nna galaw wa ai.” Jon hte shi a madu jan gaw, galai shai lam ni galaw na matu grau loi wa ai. Hpa majaw nga yang, shan hpe Yehowa gara kaw mi lit jaw tim, galaw na matu jin jin rai nga ai majaw re ngu nna sang lang dan ai. Jon ndai hku mung tsun ai: “Dai hku galaw wa ai majaw, myit malai n lu ai.”

Shakawn Kungdawn 64:10 hta tsun da ai ga gaw, teng ai hpe masha law law tatut chye wa sai. Ga shadawn langai hku nna, Amerikan Behtela hta shaning 30 jan magam gun wa ai yan la langai a lam hpe myit yu ga. Shan gaw, laksan ning shawng magam gun na matu, lit shatsam hkrum ai. Shan ndai hku tsun ai: “Nang ra sharawng ai lama ma hpe sum kau yang, yawn hkye na re.” Raitim, “ayan na gaw yawn hkyen nga na n re.” Shan gaw, nawku hpung hte arau hkaw tsun magam hta kalang ta shang lawm ai. Shan ndai hku mung tsun ai: “Lak san lam ni a matu an akyu hpyi ai. Akyu hpyi ga a mahtai lu la ai gaw, an hpe n-gun lu shangun nna kabu gara shangun ai. An du ai hte kade nna shi yang, nawku hpung kaw nna nkau gaw ningshawng galaw hpang ai. Shaman chyeju hku nna mung, rawt jat nga ai Chyum ga sharin lahkawng lu la ai.”

Ayan na kabu gara nga na matu gaw n loi ai. Yawn hkyen ai aten ni mung nga na re. Raitim, Shakawn Kungdawn 64:10 hta mu lu ai ga ni hte Yehowa gaw anhte hpe n-gun jaw ai. Anhte myit daw nna hpa mi hkrum nga tim, matut nna sadi dung ai nga yang, “Yehowa hta kabu gara nga” lu na re. Yehowa a ga sadi re ai “sumsing lamu ningnan ginding aga ningnan” byin wa na aten hpe anhte myit mada nga ga ai. Dai shaloi, anhte yawng hkum tsup mat na re. Karai a amyu masha ni gaw, Karai hpan da ai lam hte lajang da ya ai lam ni yawng a majaw, “tut nawng kabu gara sharawng awng” lu na re.​—⁠Esaia 65:17, 18.

Dai aten hpe shingran yu u. Hkum tsup ai hkam kaja lam lu la nna, n-gun atsam hpring tup hte shani shagu yup rawt wa na re. Lai wa sai aten hta yawn hkyen hkrum wa tim, hkra machyi lam gaw nga sana n re. “Shawng na lam ni hpe dum na mung n rai, myit sumru yu na mung n rai” ngu nna Yehowa ga sadi jaw da ai. Anhte tsawra ai si mat sai ni hpe bai hkap tau lu na re. Asak 12 ning ma hpe Yesu bai jahkrung ya ai shaloi, ma a kanu yan kawa gaw, “nachying mau mahka mat ma ai” zawn, anhte mung hkamsha na re. (Marku 5:42) Dai hpang, ginding aga ntsa hta nga ai masha yawng gaw, dingman ai ni tai wa nna, htani htana “Yehowa hta kabu gara” nga lu na re.