1, 2. Prat hta hpa lam galaw na hte seng nna lata ra ai shaloi Hpan Madu a ga hpe madat ai gaw hpa majaw hpaji rawng ai lam rai kun? (Sumhpa shawng na sumla hpe yu u.)

NANG gaw ramma langai rai yang, htawm hpang hte seng ai hpaji jaw ga ni grai law hkra lu la na re. Madang tsaw hpaji hkaja na matu (sh) gumhpraw law law lu shangun ai bungli galaw na matu, jawng sara ni hte kaga ni gaw nang hpe hpaji jaw na re. Raitim, Yehowa gaw dai hte n bung ai hku hpaji jaw ai. Tinang a aprat hpe madi shadaw lu na matu, jawng lung nga ai aten hta nang hpe shakut shangun mayu ai. (Kolose 3:23, 24) Raitim, na a htawm hpang prat hpe akyu shabyin ya lu ai ahkyak ai dawdan lam ni hpe, ramma prat hta jahkrat ra na hpe mung, Yehowa chye ai. Dai majaw, ndai hpang jahtum nhtoi ni hta, Yehowa myit pyaw hkra asak hkrung hkawm sa lu na matu, ra ai npawt tara ni hpe mung shi lajang da ya ai.​—⁠Mahte 24:14.

² Yawng mayawng hpe Yehowa chye ai lam dum u. Htawm hpang hta hpa byin wa na hpe shi chye nna, jahtum galoi du na hpe mung tup hkrak chye ai. (Esaia 46:10; Mahte 24:3, 36) Nang hpe mung Yehowa chye ai. Gara lam gaw nang hpe ngwi  pyaw shangun nna, gara lam gaw yawn shangun na hpe Yehowa chye ai. Masha ni a hpaji jaw ga gaw kaja na zawn raitim, Karai a Mungga hta madung n tawn ai nga yang, jet ai hpaji byeng-ya rai na n re.​—⁠Ga Shagawp 19:21.

3, 4. N kaja ai hpaji jaw ga hpe madat ai majaw Adam yan Ewa hte shan a kashu kasha ni gara hku hkra machyi ai kun?

³ Moi aten kaw nna n kaja ai hpaji jaw ga nga wa ai. Satan gaw, shawng nnan n kaja ai hku hpaji jaw ai wa re. Adam yan Ewa gaw, gara hku asak hkrung ra na hte seng nna tinang nan dawdan na nga yang, grau nna pyaw na ngu, Ewa hpe Satan tsun ai. (Ningpawt 3:1-6) Satan gaw tingkyeng akyu tam ai wa re. Adam yan Ewa hte hpawn, shan a kashu kasha ni gaw, Yehowa hpe n re ai sha, shi a ga madat nna shi hpe nawku wa na matu ra sharawng ai. Shinggyim masha ni a matu, Satan galaw ya ai lam hpa mung n nga ai. Shanhte hta nga ai yawng mayawng gaw, Yehowa jaw da ai re. Adam a matu Ewa hpe jaw da nna, Ewa a matu Adam hpe jaw da ai. Tsawm htap la ai sun hta nga shangun nna, hkum tsup ai hkum hkrang hte htani htana asak hkrung lu na re.

⁴ Yawn hpa gaw, Adam yan Ewa Karai a ga n madat wa ai. Dai hku nna, asak Madu hte hku hkau lam hpe shan yan dawm kau ai. Akyu gaw yawn hpa hkrai re. Nampan langai hpe hpun kaw nna di kau ai zawn, Adam yan Ewa mung asak kung wa nna si ra mat ai. Shan a kashu kasha yawng jamjau hkrum ai. (Roma 5:12) Dai ni aten na masha law malawng mung, Karai Kasang tsun ai hpe nyet kau nna, tinang ra sharawng ai hpe galaw nga ma ai. (Ehpesu 2:1-3) Akyu gaw hpa rai na kun? Yehowa hpe ninghkap ai ni hta hpaji byeng-ya n nga ai ngu nna Chyum Laika hta tsun da ai.​—⁠Ga Shagawp 21:30.

5. Masha ni hte seng nna Karai Kasang hpa hpe kam ai kun? Shi dai hku kam ai gaw tara rap ra ai kun?

⁵ Ramma ni hte hpawn, masha nkau gaw shi a lam chye mayu nna shi hpe nawku mayu na hpe Yehowa kam ai. (Shakawn 103:17, 18; 110:3) Dai ramma ni gaw, Yehowa a matu grai manu dan ai ni re. Dai hta nang mung lawm ai kun? Karai Kasang kaw nna “mai kaja ai” lam law law hpe nang hkamsha nna, nang pyaw nga na re. (Shakawn 103:5 hpe hti u; Ga Shagawp 10:22) Shaman chyeju mali hpe hkaja yu ga. Dai lam ni gaw, wenyi malu masha, kaja ai kanawn manang ni, lachyum nga ai bandung ni hte jet ai lawt lu lam ni re.

6. Wenyi lam hpe hpa majaw myit maju jung ra ai kun? Karum shingtau lam a matu Yehowa hpa ni lajang da ya ai kun?

⁶ Dusat ni hta wenyi lam n ra ai majaw, shanhte a Hpan Madu hpe chye ra ai ngu nna mung n hkamsha ai. Raitim, anhte gaw chye ra ai ngu nna hkamsha ga ai. (Mahte 4:4) Karai Kasang a ga anhte madat yang, hpaji byeng-ya, zai byeng-ya hte ngwi pyaw lam hkamsha lu na re. “Wenyi hta matsan mayan rai nga ai ni gaw, a lu ma ai” ngu nna Yesu tsun wa ai. (Mahte 5:3) Karai Kasang gaw, anhte a makam masham hpe shangang shakang ya na matu, Chyum Laika jaw da ai. “Sadi ai hte myitsu ai mayam” hpe akyu jashawn nna mung, laili laika ni lajang da ya ai. (Mahte 24:45) Dai laili laika ni hpe wenyi nshat ngu nna shaga ai. Hpa majaw nga yang, makam masham hpe n-gun ja shangun nna, Yehowa hte anhte a hku hkau lam hpe mung, ngang kang shangun ai majaw re. Manu dan ai wenyi lusha amyu myu hpe anhte ra sharawng ga ai.​—⁠Esaia 65:13, 14.

7. Karai Kasang jaw ai wenyi lusha gaw nang hpe gara hku karum ya ai kun?

 ⁷ Wenyi lusha gaw nang hpe hpaji byeng-ya hte atsawm sha myit mang lu ai atsam jaw lu ai. Dai atsam ni gaw, nang hpe lam amyu myu kaw nna makawp maga ya lu ai. (Ga Shagawp 2:10-14 hpe hti u.) Ga shadawn, Hpan Madu n nga ai (sh) gumhpraw hte arung arai ni gaw nang hpe ngwi pyaw shangun ai, ngu ai masu ga ni hpe ginhka lu hkra, dai atsam ningja ni gaw karum ya lu ai. Nang hpe hkra machyi shangun ai ra marin ai myit hte akyang lailen ni hpe mung, koi lu hkra karum ya lu ai. Dai majaw, nyan hpaji nga wa na matu hte atsawm sha myit mang chye na matu, galaw lu ai lam yawng hpe galaw u. Rai yang, Yehowa gaw nang hpe tsawra nna, awng dang shangun mayu ai hpe nang nan chye wa na re.​—⁠Shakawn 34:8; Esaia 48:17, 18.

8. Ya aten hta Yehowa hte ni htep hkra hpa majaw galaw ra ai kun? Dai hku galaw ai gaw htawm hpang hta gara hku akyu lu la na kun?

⁸ Kade nna yang, Satan mungkan gaw jahten kau hkrum sana re. Yehowa gaw anhte hpe makawp maga ya nna, shani shagu sha na malu masha hte hpawn, anhte ra rawng ai lam yawng hpe madi shadaw ya na re. (Habaku 3:2, 12-19) Dai majaw, ya aten gaw Yehowa hte ni htep hkra galaw nna, shi hpe kamhpa ai lam ngang kang hkra, galaw ra na aten re. (2 Petru 2:9) Dai lam ni hpe nang galaw yang, makau grup-yin hta hpa mi byin wa tim, Dawi zawn sha shimlum ai ngu hkamsha lu na re. Shi ndai hku tsun ai: “Nye a man e ngai Yehowa hpe tut tut tawn da na nngai, Nye a hkra maga e shi a nga nga ai majaw, ngai n shamu na nngai.”​—⁠Shakawn 16:8.

9. (a) Yawhan 6:44 hku nna nga yang Yehowa hpa galaw ai kun? (b) Sakse Hkam shada da hkrum ai shaloi laklai ai lam gaw hpa rai na kun?

⁹ Teng man lam kaw nna n re ai marai langai ngai hte shawng nnan hkrum ai shaloi, shi a lam nang kade daram chye ai kun? Shi a amying, hkrang nsam hpe nang chye tim, shi a lam hpe gaw, atsawm chye na n re. Raitim, teng man lam kaw nna marai langai ngai hte shawng nnan hkrum ai shaloi gaw dai hku n re. Yehowa hpe shi tsawra ai lam nang chye ai. Shi hta nga ai kaja ai lama ma hpe Yehowa mu  nna, shi a dinghku masha langai byin wa na matu, saw shaga da ai hpe nang chye ai. (Yawhan 6:44 hpe hti u.) Gara shara kaw na raitim, gara hku nga kaba wa tim, shi hte seng nna nang grai law hkra chye nna, shi mung na a lam grai law hkra chye ai.

10, 11. Yehowa a amyu masha ni hta hpa lam ni bung ai kun? Dai lam gaw nang hpe gara hku akyu shabyin ya lu ai kun?

¹⁰ Ga shadawn, shada da gaw, teng man ai lam re ai “san seng ai ga” langai hpe sha shaga ai hpe alawan sadi hkrup ai. (Zehpani 3:9, NW) Tsun mayu ai gaw, nan lahkawng yan Karai Kasang hpe kam sham nna, Karai a tsang madang hte maren asak hkrung ai. Htawm hpang hte seng nna myit mada lam mung bung ai. Dai lam ni gaw, shada da kamhpa nna htani htana hku hkau lu na kanawn manang hpe lu shangun ai.

¹¹ Dai majaw, Yehowa hpe nang nawku yang, kaja htum manang lu sai ngu tsun lu na re. Shada da n hkrum ga shi yang pyi, mungkan ting hta na a manang ni nga taw sai. Yehowa a amyu masha ni hta lai nna, manu dan ai kumhpa hpe lu la da ai kaga kadai naw nga na kun?

12. Lachyum nga ai gara bandung ni hpe nang jahkrat mai ai kun?

¹² Hpaji Ningli 11:9–12:1 hpe hti u. Nang du mayu ai wenyi bandung ni nga ai kun? Chyum Laika shani shagu hti na matu, grau kaja ai mahtai jaw na matu (sh) zuphpawng ni hta lit ni gun hpai na matu, bandung ni jahkrat da na re. Shing nrai, hkaw tsun magam hta Chyum Laika hpe grau nna tang du hkra akyu jashawn na matu, shakut nga ai mung rai na re. Nang gaw rawt jat galu kaba nga ai ngu hkamsha ai shaloi (sh) marai langai ngai dai hku tsun ai shaloi, gara hku hkamsha ai kun? Teng sha pyaw na re. Hpa majaw kun? Yesu galaw wa ai zawn, Yehowa galaw shangun mayu ai lam ni hpe nang galaw nga ai majaw re.​—⁠Shakawn 40:8; Ga Shagawp 27:11.

13. Mungkan a bandung hkan ai hta na Karai a magam gun ai gaw gara hku nna grau kaja ai kun?

¹³ Yehowa hpe magam gun ai hta nang myit maju jung ai shaloi, prat hta lachyum nga nna ngwi pyaw lu ai bungli hpe nang galaw nga ai re. Pawlu ndai hku hpaji jaw da ai: “Nanhte gun hpai ai amu gaw dai Madu hta e kaman lila n rai nga ai dum chye nga let, ngang ngang kang kang, dakring dalang nga nga nna, dai Madu a bungli hta tutnawng e tsam mari shakut sharang nga nga mu law.” (1 Korinhtu 15:58) Raitim, masha ni gaw, gumhpraw lu na matu, mying gumhkawng na matu, ndai mungkan a bandung hta myit maju jung ma ai. Dai gaw jet ai ngwi pyaw lam n lu shangun ai. Shanhte awng dang nga tim pyi, lama ma ra taw ai zawn hkamsha ai. (Luka 9:25) Hkawhkam Shawlumon a mabyin kaw nna anhte sharin la lu ai.​—⁠Roma 15:4.

14. Shawlumon a chyam yu ai lam kaw nna anhte hpa sharin la lu ai kun?

¹⁴ Asak hkrung wa ai masha ni hta atsam kaba htum, lusu dik htum re ai Shawlumon gaw, chyam yu ai lam langai galaw wa ai. Shi ndai hku tsun ai: “Sa rit, ngwi ngawn ai hte ngai nang hpe chyam yu di ga; nang mai kaja ai lam mu hkrup na ndai.” (Hpaji 2:1-10) Dai majaw Shawlumon gaw, hkik hkam ai nta ni, nampan sun ni hte shi ra marin ai yawng hpe galaw wa ai. Shi myit dik nna pyaw wa ai kun? Shi galaw wa ai lam ni hpe bai n htang yu ai shaloi, “nlang hte gaw kaman lila” re ngu shi tsun wa ai. “Akyu hpa mung n nga sai” ngu nna mung tsun wa ai. (Hpaji 2:11) Shawlumon a chyam yu ai lam kaw nna nang sharin la lu na kun?

15. Hpa majaw makam masham ra ai kun? Shakawn Kungdawn 32:8 kaw nna sharin la wa sai hte maren makam masham gaw nang hpe gara hku karum ya ai kun?

 ¹⁵ Masha nkau gaw, tinang galaw shut ai lam ni hte lu la wa ai n kaja ai akyu ni kaw nna sharin la ma ai. Nang hpe gaw Yehowa dai zawn n byin shangun mayu ai. Shi a ga madat nna hkan sa shangun mayu ai. Dai hku galaw na matu makam masham ra ai. Dai makam masham gaw, galoi mung nang hpe myit malai lu shangun na n re. Ngut nna, “Karai Kasang a mying nsang a matu” nang sak jaw wa ai lam ni hpe, Yehowa galoi mung n malap kau ai. (Hebre 6:10) Dai majaw, makam masham ngang kang na matu shakut shaja u. Rai yang, prat hta kaja ai lam ni hpe lata lu nna, sumsing lamu na Kawa gaw na a matu kaja htum byin shangun mayu ai hpe, nang chye wa na re.​—⁠Shakawn 32:8 hpe hti u.

16. Lawt lu ai lam hpe hpa majaw manu shadan ging ai kun? Hpaji rawng let gara hku akyu jashawn mai na kun?

¹⁶ “Madu a Wenyi shanu ai shara hta shanglawt ahkang mung nga nga ai” ngu nna Pawlu ka wa ai. (2 Korinhtu 3:17, JCLB) Lawt lu ai lam hpe Yehowa tsawra nna, nang hpe mung lawt lu ai lam hpe tsawra hkra shi hpan da ai. Raitim, na a lawt lu ai lam hpe hpaji rawng let akyu jashawn shangun mayu ai. Dai gaw nang hpe makawp maga ya ai. Ramma nkau gaw, nse nsa sumla yu ai, hpye ai amu galaw ai, asak shoihpa nga ai ginsup lam ni hta lawm ai (sh) nanghpam tsi hte tsa chyaru hpe shut ai hku jailang ai. Dai lam ni gaw, shawng nnan hta pyaw nna myit lawm na zawn raitim, n kaja ai akyu ni sha lu shangun ai. Ga shadawn, ana zinli kap wa ai, tsa ya kani ya tai wa ai, si pyi si ra ai. (Galati 6:7, 8) Dai lam ni hpe galaw nga ai ramma ni gaw, lawt lu ai lam lu taw ai ngu shadu chye ai. Raitim, dai gaw n teng ai.​—⁠Titu 3:3.

17, 18. (a) Karai Kasang a ga madat ai gaw anhte hpe gara hku nna lawt lu shangun ai kun? (b) Adam yan Ewa gaw dai ni aten na masha ni hta grau nna gara hku lawt lu wa ai kun?

¹⁷ Yehowa a ga madat mara ai gaw, anhte a matu akyu nga ai. Hkam kaja lam hpe madi shadaw ya nna, jet ai lawt lu lam lu shangun ai. (Shakawn 19:7-11) Karai Kasang a hkum tsup ai tara ni hte maren hkan sa na matu lata ai gaw, na a lawt lu ai lam hpe hpaji rawng ai hku, akyu jashawn nga ai re. Bai nna, nang gaw lit la chye ai masha langai re ai lam, Karai Kasang hte kanu kawa ni hpe madun nga ai re. Kanu kawa ni gaw nang hpe grau kam wa nna, lawt lu lam mung grau nna jaw wa na re. Kade n na yang, sadi dung ai mayam ni yawng hpe hkum tsup ai lawt lu lam jaw na ngu nna, Yehowa ga sadi jaw da ai. Dai lawt lu lam hpe, “Karai Kasang a kashu kasha ni a pru lawt wa ngu ai hpung shingkang” ngu nna Chyum Laika hta tsun da ai.​—⁠Roma 8:21.

¹⁸ Adam yan Ewa lu wa ai lawt lu lam rai nga ai. Eden sun hta, shanhte hpe Karai Kasang hkum pat da ai lam langai sha nga ai. Hpun langai kaw nna namsi hpe n sha na matu re. (Ningpawt 2:9, 17) Dai tara a majaw, Karai Kasang gaw n rap ra ai (sh) tara grai ja ai ngu nna nang myit na kun? Myit na n re. Shinggyim masha ni gaw, tara grai law hkra jahkrat da nna, dai tara ni hpe hkan sa na matu  shadut ma ai. Raitim, Yehowa gaw, Adam yan Ewa hpe tara langai sha jaw da ai.

19. Lawt lu ai lam lu la na matu Yehowa hte Yesu gaw hpa lam ni sharin ya ai kun?

¹⁹ Yehowa gaw anhte hpe grai hpaji rawng ai hku kanawn mazum ai. Tara grai law hkra hpe jaw na malai, tsawra myit ngu ai tara hpe hkan sa na matu, myit galu let sharin ya ai. Npawt tara ni hte maren hkan sa na matu hte n kaja ai hpe n ju na matu anhte hpe sharin ya ai. (Roma 12:9) Bum Ntsa Na Mungga hta, masha ni gaw hpa majaw n kaja ai lam ni galaw ai hpe chye na hkra, Yesu tsun dan wa ai. (Mahte 5:27, 28) Mungkan nnan hta, Karai Mungdan a Hkawhkam Yesu gaw, jaw ai shut ai hte seng nna, shi mu mada ai hku mu mada lu hkra, sharin ya na re. (Hebre 1:9) Hkum tsup ai hkum hkrang hte myit mang ai lam lu la hkra mung, karum ya na re. Yubak a majaw jamjau n hkrum sana aten, n kaja ai lam ni galaw na matu gunglau n hkrum sana aten gaw gara hku rai nga na hpe shingran yu u. Hpang jahtum hta gaw, Yehowa ga sadi jaw da ai hte maren, “pru lawt wa ngu ai hpung shingkang” hpe lu la na re.

20. (a) Lawt lu lam hpe Yehowa gara hku lang wa ai kun? (b) Yehowa hpe gara hku kasi la mai na kun?

²⁰ Mungkan nnan hta, anhte a lawt lu lam gaw shadawn sharam sha naw rai na re. Gara hku nna kun? Karai Kasang hte masha shada da hpe matut tsawra nga ra na hku nna re. Tsawra myit hte galaw hkawm sa ai gaw, Yehowa hpe anhte kasi la nga ai re. Yehowa gaw tsep kawp lawt lu lam nga tim, shi galaw ai lam yawng hpe tsawra myit hte galaw na matu shi lata ai. Dai hta anhte hpe kanawn mazum ai lam mung lawm ai. (1 Yawhan 4:7, 8) Dai majaw, Karai Kasang hpe anhte kasi la na nga yang, jet ai lawt lu lam lu la na re.

21. (a) Yehowa hte seng nna Dawi gara hku hkamsha ai kun? (b) Hpang na sumhpa hta hpa lam hkaja lu na kun?

²¹ Nang hpe Yehowa jaw ai kaja ai lam yawng a matu chyeju dum ai kun? Wenyi lusha ni, kaja ai manang ni, lachyum nga ai bandung ni, htawm hpang hta hkum tsup ai lawt lu lam hte kaga mauhpa kumhpa ni hpe Yehowa jaw da ai. (Shakawn 103:5) Shakawn Kungdawn 16:11 hta “nang ngai hpe asak hkrung ai lam madun ya na ndai; Na a man e kabu gara htum nga ai: Na a hkra lata hta pyaw ai lam tut tut a nga nga ai law” ngu ai Dawi a akyu hpyi ga hte maren nang mung hkamsha na re. Hpang na sumhpa hta, Shakawn Kungdawn 16 hta lawm ai manu dan ai teng man lam ni hpe hkaja mat na re. Kaja htum asak aprat hpe gara hku lu la mai na lam chye hkra karum ya mat na re.