KAGA ni anhte hpe matsan dum myit madun yang, anhte grai pyaw ga ai. Anhte hpe lanu lahku nga ai ngu hkamsha shangun ai. Kaga ni matsan dum myit madun yang, anhte chyeju dum ai hte maren, anhte mung matsan dum chye na matu gara hku sharin la lu na kun?

Matsan dum myit rawng ai wa gaw, kaga ni hpe lanu lahku nna, tsun ai hte maren tatut mung galaw ya ai. Shi gaw, si mani ai ga tsun ai daram sha n re. Kaga ni hpe tsawra nna kaga ni a hkamsha lam hpe chye na ya ai majaw, matsan dum myit hte kanawn mazum ai. Matsan dum myit gaw Karai a chyoi pra ai wenyi a asi langai re. (Galati 5:22, 23) Yehowa gaw, anhte hpe dai atsam ningja nga shangun mayu ai. Dai majaw, shi hte shi a kasha madun wa ai matsan dum myit hpe gara hku hkan sa mai na lam yu yu ga.

Yehowa gaw, “chyeju malap kau ai ni hte, n hkru n hkra re ai ni” hte hpawn, yawng mayawng hpe matsan dum myit madun ai. (Luka 6:35) Ga shadawn, “n kaja ai ni hte kaja ai ni a ntsa e, shi a jan hpe shi pru shangun nga ai rai nna, ding hpring ai ni hte n ding n hpring ai ni a ntsa e, marang jahtu ya mu ai.” (Mahte 5:45) Yehowa gaw Hpan Madu re ai hpe n kam ai masha ni pyi, Yehowa a matsan dum myit kaw nna akyu hkamsha nna, prat hta ngwi pyaw lam nkau lu la ma ai.

Adam yan Ewa hpe galaw ya wa ai lam kaw nna, Yehowa a kaja htum matsan dum myit hpe mu lu ai. Shan yan mara galaw ai hpang, “shan gaw lakum lap chyawi matut nna tinang a matu dangpai galaw ma ai.” Raitim, Edin sun a shinggan hta gaw, shan hpe grau nna makawp maga ya ai hpun palawng ra na re. Hpa majaw nga yang, aga gaw dingnye lu ai majaw, “aju hte atsing” hpring tup rai nga ai hpe Yehowa chye ai majaw re. Dai majaw, Yehowa gaw matsan dum myit hte “shanhpyi hpun palawng galaw nna shan hpe shabu jahpun” ya ai.​—⁠Ningpawt 3:7, 17, 18, 21.

Yehowa gaw, “n kaja ai ni hte kaja ai ni” yawng hpe, matsan dum myit madun ai. Raitim, lak san hku nna shi hpe sadi dung ai mayam ni hpe, matsan dum myit grau madun ai. Ga shadawn, myihtoi Zehkaria aten hta, Israela ni gaw Yerusalem hta nawku htingnu gawgap ai lamang hpe jahkring kau ai majaw, lamu kasa langai grai myit tsang wa ai. Lamu kasa tsun ai ga hpe Yehowa madat ya nna, “mai kaja, ngwi pyaw ga hte” bai mahtai jaw ai. (Zehkaria 1:12, 13) Myihtoi Elia hpe mung, dai hte maren Yehowa tsun shaga wa ai. Myihtoi wa gaw grai myit daw nna, shi hkrai rai nga ai shaloi, shi asak hpe dawm la kau ya na matu Yehowa kaw hpyi shawn ai. Elia a hkamsha lam hpe Yehowa chye na ya nna, n-gun jaw na matu lamu kasa langai hpe shangun dat ai. Shi langai hkrai sha n re ai hpe myihtoi wa chye na matu mung karum ya wa ai. Magam lit hpe matut gun hpai lu hkra, Elia hpe Yehowa matsan dum myit hte madi shadaw ya wa ai. (1 Hkawhkam 19:1-18) Yehowa a mayam ni yawng hta, Yehowa a matsan dum myit hpe kaja htum kasi la lu ai wa nga ai kun?

Yesu ginding aga ntsa hta nga ai shaloi, shi a matsan dum myit hpe masha ni mu lu ai. Mazut ai lam n nga ai. Shi galaw shangun mayu ai hpe galaw na matu, kaga ni hpe atik anang n galaw ai. Matsan dum myit hte masha ni hpe ndai hku tsun ai: “Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai. . . . nye a kandang hpai loi ai.” (Mahte 11:28-30) Shi matsan dum myit madun ai majaw, masha ni gaw shi sa ai  shara shagu de hkan nang ai. Matsan dum myit a majaw Yesu gaw, malu masha jaw sha ai, shamai shatsai ya nna, shi Kawa a lam hpe “law law wa” sharin achyin ya ai.​—⁠Marku 6:34; Mahte 14:14; 15:32-38.

Masha ni a hkamsha lam hpe Yesu chye na ya nna, matsan dum myit hte myit tau ya let kanawn mazum wa ai. Shi a matu nau n manu ai aten hta raitim, shi hpang de sa ai masha yawng hpe matsan dum myit hte karum ya ai. (Luka 9:10, 11) Sai htaw ana hkamsha ai num langai a lam hpe myit yu u. Mai tsai mayu ai majaw, Yesu a palawng hpe ahtawk dat ai. Raitim, Mawshe a tara hku nga yang, shi n san seng ai majaw, dai hku n mai galaw ai. (Jaw Jau 15:25-28) Yesu gara hku bai htang ai kun? Masin pawt let n tsun shaga wa ai. Shi hkrit nga ai hpe Yesu mu nna, 12 ning tup machyi hkrum nga ai majaw, matsan dum wa ai. Yesu ndai hku tsun ai: “Shayi sha e, na a kam sham ai gaw nang hpe shamai ya nit dai: ngwi pyaw ai hte wa u: na a atsu atsam mai wa nu ga.” (Marku 5:25-34) Yesu gaw teng sha matsan dum ai wa re.

Anhte bawngban wa sai hte maren, kaga ni hpe matsan dum ai nga yang, tatut karum ya na re. Dai lam gaw kade daram ahkyak ai hte seng nna, kaja ai Samari masha ga shadawn hpe Yesu tsun ai lam kaw nna chye lu ai. Yuda masha langai gaw, damya hkrum nna kayat hkrum ai. Ganoi noi si sayang she, lam makau kaw kabai da hkrum ai. Samari masha ni hte Yuda masha ni gaw shada da n ju ma ai. Raitim, Samari masha langai gaw dai lam kaw nna lai wa ai shaloi, damya hkrum ai wa hpe mu nna, matsan dum mat ai. Matsan dum myit gaw, damya hkrum ai wa hpe karum ya na matu shadut ya wa ai. Shi a nma hpe kashin ya nna, manam nta langai mi de woi mat wa ai. Samari masha gaw, Yuda masha hpe yu lanu lahku ya na matu, nta madu hpe karum hpyi nna, ra ang ai lam yawng hpe galaw ya na matu gumhpraw pyi jaw da ya ai.​—⁠Luka 10:29-37.

Matsan dum myit gaw, n-gun jaw na matu, myit tau ya na matu anhte hpe shadut ya ai. Matsan dum myit hta, tsun ai sha n-ga, tatut galaw ya ai lam mung lawm ai. Chyum Laika hta ndai hku tsun da ai: ‘Myit ru ai gaw na a ngwi pyaw lam hpe hpya jahten lu nga ai.’ (Ga Shagawp 12:25, JCLB) Matsan dum myit hte mai kaja ai lam gaw, kaga ni hpe n-gun jaw ga tsun na matu, anhte hpe shadut ya ai. N-gun jaw ga anhte tsun yang, shanhte ngwi pyaw lu na re. * Matsan dum myit hte tsun shaga ai ga ni gaw, shanhte hpe lanu lahku ai lam madun ai rai nna, shanhte a prat hta hkrum ai manghkang ni hpe hkam sharang lu hkra karum ya ai.​—⁠Ga Shagawp 16:24.

Karai Kasang gaw, shi a hkrang bung sumla hte maren anhte hpe hpan tawn da ai majaw, matsan dum myit madun lu ai atsam anhte yawng hta nga ga ai. (Ningpawt 1:27) Ga shadawn, Roma de kasa Pawlu hpe shaga sa ra na Roma hpyen du Yuli gaw, Sidon mare hta “Pawlu hpe matsan dum nna, shi a jinghku ni kaw sa jahkrum na hte galaw daw hkam sha na matu, ahkang jaw wu ai.” (Kasa 27:3) Pawlu hte kaga ni gaw bu hkawm ai hkrun lam hta, sanghpaw hten mat ai shaloi, Melite masha ni gaw, shanhte hpe “grai wa matsan dum” ai majaw, wan wut nna lum hkra pyi galaw ya ai. (Kasa 28:1, 2) Dai masha ni gaw kaja ai lam galaw wa ai re. Raitim, Yehowa a myit shapyaw ya na matu, masa lam kaja yang she matsan dum myit madun ai n re ai sha, aten shagu madun ra ai.

Matsan dum myit gaw anhte a atsam ningja langai rai na matu hte prat hkrun lam hta galoi mung madun na matu, Yehowa ra sharawng ai. Dai majaw, matsan dum myit hpe “dagraw” da na matu shi tsun ai re. (Kolose 3:12) Raitim, aten shagu matsan dum myit madun na matu gaw n loi ai. Hpa majaw kun? Anhte gaw, kaya chye ai, tinang hkum tinang nau n kam ai (sh) tingkyeng myit loi nga ai majaw rai na re. Shing nrai, n kaja ai hku kanawn mazum ai ni hpe matsan dum myit madun na matu yak chye ai. Raitim, chyoi pra ai wenyi lu na matu akyu hpyi nna, Yehowa hpe kasi la na nga yang, matsan dum myit madun chye hkra Yehowa karum ya na re.​—⁠1 Korinhtu 2:12.

Matsan dum myit grau nna nga hkra gara hku galaw na kun? Tinang hkum tinang ndai hku san yu u: ‘Kaga ni a hkamsha lam hpe atsawm madat ya nna  chye na hkra shakut ai kun? Karum shingtau ra nga ai ni hpe ngai sadi hkrup ai kun? Jinghku jingyu n re ai (sh) hkau ai manang n re ai marai langai ngai hpe matsan dum myit madun wa ai hpang jahtum lang gaw galoi rai kun?’ Anhte a makau grup-yin na masha ni, laksan hku nna nawku hpung hta nga ai masha ni a lam grau chye wa hkra shakut na matu bandung jahkrat u. Dai hku nna, shanhte hkrum ai mayak mahkak ni hte shanhte a ra kadawn ai lam ni hpe nang sadi hkrup wa na re. Nang hpe matsan dum myit madun shangun mayu ai hte maren, kaga ni hpe shakut nna madun u. (Mahte 7:12) Matsan dum myit madun lu hkra Yehowa kaw karum hpyi nna, anhte shakut shaja ai nga yang Yehowa shaman chyeju jaw na re.​—⁠Luka 11:13.

Kasa Pawlu gaw, shi hpe kaja ai magam gun langai byin shangun ai lam ni hpe jahpan galaw da ai shaloi, matsan dum ai lam mung lawm ai. (2 Korinhtu 6:3-6, JCLB) Pawlu hpe masha ni ra sharawng ai gaw, shanhte hpe matsan dum myit hte kanawn mazum nna, lanu lahku ai majaw re. (Kasa 28:30, 31) Dai hte maren, anhte mung matsan dum myit madun yang, kaga ni gaw teng man ai tara hpe grau nna chye mayu wa na re. Anhte a ntsa n kaja ai ni hte hpawn, masha yawng hpe matsan dum myit madun yang, shanhte a myit masin hkra nna, galai shai wa chye ai. (Roma 12:20) Chyum Laika hte seng ai teng man lam hpe chye mayu ai myit pyi nga wa na re.

Hparadisu hta, masha yawng gaw shada da matsan dum myit madun na re. Hkrung rawt wa ai masha ni gaw, matsan dum myit hte kanawn mazum hkrum na re. Nkau mi na matu gaw, shawng nnan lang hkrum ga ai rai na re. Dai lam gaw, shanhte mung kaga ni hpe matsan dum myit bai madun na matu shadut ya na re. Kaga ni hpe matsan dum n chye ai ni hte n kam karum ya ai ni gaw, Karai a Mungdan npu hta nga lu na n re. Tsawra myit hte matsan dum chye ai ni sha Hparadisu hta htani htana nga lu na re. (Shakawn 37:9-11) Shim lum nna ngwi pyaw simsa ai mungkan byin nga na re. Dai aten garai n du shi ai laman hta pyi, anhte gaw matsan dum myit madun ai majaw, akyu hkamsha lu na re. Gara hku nna kun?

Chyum Laika hta ndai hku tsun da ai: “Matsan dum chye ai wa gaw, shi hkum hpe lanu lahku nga ai.” (Ga Shagawp 11:17) Matsan dum chye ai wa hpe masha ni ra sharawng nna, shanhte mung shi hpe matsan dum myit bai madun ai. Yesu ndai hku tsun ai: “Nanhte hteng ya ai dang hte, nanhte hpe bai hteng ya na ma rin dai.” (Luka 6:38) Dai majaw, matsan dum chye ai wa gaw, manang kaja tam loi nna, matut hku hkau lu ai.

Kasa Pawlu gaw, Ehpesu nawku hpung hpe ndai hku tsun ai: “Nanhte shada da mai kaja ai, matsan dum ai myit madun hkat nna, . . . shada da a mara raw dat kau nga mu.” (Ehpesu 4:32) Hpunau nauna yawng gaw, tsawra matsan dum myit hpe madun yang, nawku hpung gaw ngang kang nna, kahkyin gumdin wa na re. Anhte gaw, hpunau nauna ni hpe mara tam nna, shanhte hpe shatan nhkan tsun na n re. Shing nrai, mani hpa tsun ai hku nna mung kaga ni hpe hkra machyi hkra galaw na n re. De a malai, masha ni hpe karum shingtau ya lu nna n-gun jaw lu ai ga ni hpe galoi mung tsun ging ai. (Ga Shagawp 12:18) Dai zawn galaw yang, nawku hpung gaw Yehowa hpe kabu gara let nawku dawjau lu na re.

Anhte hkaja wa sai hte maren, matsan dum myit ngu ai gaw, tsun ai ga hte galaw ai lam hta mu lu ai atsam ningja langai re. Anhte matsan dum myit madun ai shaloi, tsawra myit nga nna, gam jaw gam ya ai Yehowa Karai Kasang hpe kasi la nga ai re. (Ehpesu 5:1) Dai hku galaw yang, nawku hpung gaw grau ngang kang wa nna, shi hpe mung kaga ni nawku mayu wa hkra shadut ya lu na re. Dai majaw, anhte galaw lu ai lam yawng hpe galaw nga ga. Rai yang, Yehowa Sakse ni hpe, matsan dum chye ai ni hku nna masha ni mu wa na re.