“Na A Mying Ningsang Hpe Ngai Shanhte E Shachye Shachyang Ma Se Ai”

“Mungkan ga na nang ngai e ap ya ai masha ni hpe, na a amying ningsang ngai shadan ya se ai; . . . Na a mying ningsang hpe ngai shanhte e shachye shachyang ma se ai.”​—YAWHAN 17:​6, 26.

Hpa Lachyum Kun?: Yesu gaw hkaw tsun bungli hta Karai a mying hpe akyu jashawn ai hku nna, masha ni chye hkra galaw wa ai. Chyum Laika hti shagu, galoi mung galaw wa ai hte maren, Karai a mying shingteng hpe akyu jashawn wa na gaw teng sha re. (Luka 4:​16-​21) Shi a sape ni hpe mung, “Wa e, Na mying ningsang chyoi pra nga lit ga” ngu akyu hpyi na matu sharin ya wa ai.​—Luka 11:2.

Tsaban Langai Na Hkristan Ni Gara Hku Galaw Wa Ai Kun?: “Karai Kasang gaw maigan amyu ni hta na, shi a amying ningsang a matu, masha amyu mi hpe shaw la” ai ngu nna Yerusalem kaw na myitsu salang ni hpe, kasa Petru tsun wa ai. (Kasa 15:14) Kasa ni hte Hkristan ni gaw “Madu a mying ningsang hpe gang shaga ai masha kadai mung, hkye hkrang la ai kaw du na ra ai” ngu nna hkaw tsun ai. (Kasa 2:​21; Roma 10:13) Dai sha n-ga, shanhte ka wa ai Chyum Laika ni hta mung, Karai Kasang a mying hpe ka shalawm da ai. Hkristu paw pru nna shaning 300 daram hta ka ngut wa ai Yuda tara ginchyum (The Tosefta) hta, Hkristan Chyum Laika ni hpe ninghkap ai ni wan nat jahten ai hte seng nna ndai hku tsun da ai: “Ewun-geli hpung (Evangelists) shapraw ai laika buk ni hte Minim ni a laika buk ni [Ju Hkristan rai na masa nga ai] gaw wan nat jahten hkrum ai. Wan nat kau ai laika ni hta Karai Kasang a amying hpe madun dan ai lam ni mung lawm mat ai.”

Dai Ni Aten Hta Dai Zawn Kadai Ni Galaw Nga Ai Kun? Amerikan Mungdan, Hkristu Hpung Kawngsi kaw na matsun ai ahkang hte shapraw da ai ga gale chyum (Revised Standard Version) a ga nhpaw hta ndai hku tsun da ai: “Kaga Karai ni nga ai majaw, langai sha re ai Karai Kasang hpe shanhte hte ginhka dan na matu ra ai zawn, amying shingteng hpe lang ai gaw Hkristan prat garai n du shi yang Ju ni a prat hta hkring mat ai sha n-ga, mungkan ting na Hkristan hpung ni a kamsham lam hte mung tsep kawp n seng mat sai.” Dai majaw, Karai Kasang a amying shara hta “MADU” ngu nna malai bang kau ma ai. Kade n na shi ai aten hta, sara daw ni hpe Kahtawlik hpung ginjaw gaw ndai hku matsun wa ai: “Mahkawn laika buk hte akyu hpyi laika buk ni hta Karai Kasang a mying re ai YHWH * ngu ai Hebre ga si 4 hpe n lang ra sai zawn, nsen shapru na mung n hti ra sai.”

Dai ni aten hta kadai ni gaw Karai Kasang a amying shingteng hpe masha yawng chye hkra lang nga ai kun? Kajit-satan mung kaw na ramma Sage gaw Karai Kasang a amying hpe Yehowa (Jehovah) ngu madun da ai sumla hkrung langai yu wa ai. Dai hpang 10 ning daram Karai Kasang a mying hpe n na lu mat ai. Amerikan de Sage htawt mat ai hpang Yehowa Sakse hkristan lahkawng shi nta de du wa nna, Karai Kasang a mying hpe Chyum Laika kaw na hpaw dan ai. Yehowa ngu ai mying hpe lang ai hpung langai hpe mu dat ai majaw Sage grai kabu mat ai. Ga htai chyum langai (Webster’s Third New International Dictionary) hta “Yehowa Karai Kasang” hpe “Yehowa Sakse ni sha hkap la nna nawku ai tsaw htum ai hpara” ngu lachyum hpaw da ai gaw myit lawm hpa re.

[Lawu Matsing]