“Nye A Ga Hta Agrin Nga” U

“Nanhte nye a ga hta agrin nga myit yang gaw, nye a sape teng teng nanhte rai nga myit dai: teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai.”​​—YAWHAN 8:​31, 32.

Hpa Lachyum Kun?: Yesu a “ga” ngu ai gaw shi a sharin achyin ai lam ni rai nna, dai gaw Yehowa kaw na sa ai re. Dai majaw, Yesu gaw “Ngai kaning ngu sharin shaga na gaw, ngai hpe shangun dat ai, nye Wa e matsun jaw dat ni ai” ngu tsun wa ai. (Yawhan 12:49) Sumsing lamu hta nga ai Yehowa Karai hpang Yesu akyu hpyi ai shaloi, “Na a mung ga gaw, teng man ai lam rai nga lit dai” ngu nna hpyi wa ai. Yesu gaw shi a sharin achyin ai lam ni hpe madi shadaw na matu, Karai a Mungga hpe lakap wa ai. (Yawhan 17:17; Mahte 4:4, 7, 10) Dai majaw, jet ai Hkristan ni gaw Yesu a “ga hta agrin nga” ra ai. Tsun mayu ai gaw Yesu zawn sha Chyum Laika hpe “teng man ai” tara hku hkap la nna, shanhte a makam masham hte ngasat ngasa ni mung Chyum Laika hpe sha madung ai.

Tsaban Langai Na Hkristan Ni Gara Hku Galaw Sa Wa Ai Kun?: Chyum Laika law malawng hpe ka wa ai kasa Pawlu mung Yesu zawn sha, Chyum Laika hpe manu shadan wa ai. “Karai Kasang e shung ya ai Chyum Laika shagu gaw, . . .akyu rawng nga ai” ngu shi ka wa ai. (2 Timohti 3:17) Hkristan ni hpe sharin achyin ya na matu lit jaw hkrum ai la ni gaw “tengman nna kam mai ai Karai a Mungga hpe ngang ngang jum” da na matu ra ai. (Titu 1:​7, 9, The Amplified Bible) Tsaban langai na Hkristan ni gaw “Hkristu a hkang ai tara hte n bung ai, mungkan ga a hkang ai tara hte masha a matsun maroi ga hkan ai zai byeng-ya hte lila rai nga ai hkalem hkalau ga hte, kadai mung nanhte hpe n hkalau lu” na matu shadut hkrum wa ai.​—Kolose 2:8.

Dai Ni Aten Hta Kadai Ni Gaw Dai Hte Maren Galaw Nga Ai Kun?: Kahtawlik ni a laika buk (Vatican’s Dogmatic Constitution) hta ndai hku tsun da ai: “Kahtawlik ni a kamsham ai lam ni gaw, Chyum Laika hta mung, htunghking ni hta mung npawt tawn da ai. Dai majaw, htunghking lailen ni hpe Chyum Laika zawn sha, maren mara manu shadan ma ai.” Kaneda mung, Torento mare na Hkristan magam gun num langai a ga hpe magazine langai (Maclean’s) na sumhpa langai hta ndai hku tsun da ai: “Chyum Laika hta lawm ai Yesu a sharin achyin ai lam ni a majaw, grai kaja ai anhte a ningmu ni gaw majoi jahten hkrum ai. Lai wa sai shaning hkying lahkawng hta tsun wa ai Yesu a ga ni hpe hpa majaw hkan sa taw ra na ma.”

Yehowa Sakse Hkristan ni hte seng nna Ga Htai Chyum Langai (New Catholic Encyclopedia) hta ndai hku tsun da ai: “Shanhte a makam masham hte arawn alai ni a ru npawt gaw, Chyum Laika re ngu na shanhte masat da ai.” Ga shadawn, Kaneda mung hta num langai gaw la langai hpe shi gaw Yehowa Sakse ngu shachyen ai shaloi, dai la gaw “nang lang da ai Chyum Laika hpe yu dat ai hte, nang kadai re ai hpe ngai chye ginhka ai” ngu tsun ai.