Nye a dai daw buga gaw, Jaman Gumsan Magam Mungdan, Sat-soni mare a kahtawng langai hta re. Anhte a nta masha ni gaw, langai hte langai tsawra nna hku hkau ai. Nu yan wa gaw akyang lailen kaja hkra sharin shaga ya ai. Dai aten hta, Jaman Gumsan Magam Mungdan gaw, Kumyunit mungdan re. Dai majaw, Sat-soni mare kaw na masha law malawng a matu, nawku htung gaw n ahkyak ai. Nye matu mung Karai ngu ai n nga ai. Karai nga ai hpe n kam ai sharin achyin lam hte Kumyunit sharin achyin lam ni gaw, asak 18 ning du hkra ngai hpe shingkang ka-up da ai.

Kumyunit sharin achyin lam hpe hpa majaw ngai ra sharawng wa ai kun? Masha yawng gaw maren sha re ngu ai lam hpe ra sharawng ai majaw re. Masha yawng gaw maren mara lu ging ai. Rai yang she, matsan ai ni hte lusu ai ni a lapran grai gang mat ai baw nga sana n re ngu ngai shadu ai. Dai majaw, Kumyunit ramma hpung hta ngai shang kau ai. Asak 14 ning hta, kabai kau sai maisau ni hpe bai akyu jashawn ai grup-yin shingra hkang zing ai bungli hta grai na hkra galaw wa ai. Awng Wa mare na ahkang aya nga ai ni gaw, ngai hpe grai chyeju dum ai majaw kumhpa jaw wa ai. Ramma raitim, mung masa lam galaw ai hta mying grai kaba ai masha nkau hte pyi hkau wa ai. Nye a ban dung gaw jaw ai, nye a htawm hpang gaw grai kaja taw ai ngu hkamsha ai.

Hpang de, nye a myit mang lam ni gaw akajawng sha hten run mat ai. 1989 hta Barlin shakum hte Sinpraw Urawpa a Kumyunit hpung hten run mat ai. Hkrit kajawng hpa langai hpang langai hkrum wa ai. Jaman Gumsan Magam Mungdan hta n tara ai lam ni nga taw ai hpe chye dat ai. Ga shadawn, Kumyunit sharin achyin lam hpe n hkap la ai ni hpe, kaja ai mung masha ni n re ngu na sawn la ma ai. Dai gara hku mai byin na? Kumyunit ni gaw masha shagu hpe maren sha re ngu sawn la da ai n re i? Kumyunit sharin achyin lam gaw hkalem ai lam langai kun? Ngai myit grai shuk mat ai.

Dai majaw, yungwi hpaji hpe myit maju jung wa ai. Myuzik (music) jawng lung na ahkang lu ai majaw, dai kaw na she dakkasu lung na, ngut yang yungwi, sumla soi ai hpaji ni hte sha kan bau bungli galaw na ngu myit wa ai. Ngut na, ma prat hta sharin la wa ai akyang lailen tsang madang ni hpe mung n hkan sa mat sai. Ya ngai myit lawm ai gaw, pyaw pyaw nga na, sumtsaw tawn na matu sha re. Raitim, yungwi, sumla soi ai hte wanglu wanglang nga ai prat hkrun lam gaw nye a myitru myit tsang lam ni hpe n shayawm ya ai. Ngai soi da ai sumla ni hpe yu dat yang pyi, hkrit hpa lam ni chyu sha re. Htawm hpang gara hku rai na kun? Prat a yaw shada lam gaw hpa kun?

Ngai chye mayu ai mahtai hpe lu dat ai majaw grai mau mat ai. Myuzik jawng lung ai lana mi hta, htawm hpang hte seng nna bawng ban nga ai jawng ma ni a lapran hta ngai mung shang dung ai. Yehowa Sakse re ai Mandi * ngu ai jawng ma gaw “Andringyet, prat hte htawm hpang a lam nang chye mayu ai hpe Chyum Laika hta tam yu dat u” ngu ngai hpe hpaji jaw ai.

Nau n kam tim, Chyum Laika hta mahtai tam yu na matu daw dan kau ai. Mandi gaw Daniela daw kaba 2 hpe hti shangun ai. Ngai hti yu nna grai mau mat ai. Ya na ban prat du hkra seng ang nga ai mungkan uphkang du ni, asuya ni a lam tau hkrau tsun da ai she rai nga ai. Mandi gaw htawm hpang hte seng ai myihtoi ga ni hpe mung madun ai. Hpang jahtum gaw, ngai chye mayu ai mahtai ni hpe tam mu mat sai. Ndai myihtoi ga ni hpe kadai ka ai kun? Kadai wa mi htawm hpang hte seng nna dai daram tup hkrak lu tsun ai kun? Karai nga ai ngu ai gaw rai mi rai taw na kun?

Mandi gaw Hawt hte Injalika ngu ai Sakse Hkam yan la hte shachyen ya ai. Chyum Laika lam chye na wa hkra ngai hpe shanhte karum ya ai. Yehowa Sakse ni gaw, Karai a amying Yehowa hpe ahkyak shatai nna galoi mung lang ai langai sha re ai hpung re ai hpe ngai kalang ta chye na wa ai. (Shakawn 83:17; Mahte 6:9) Yehowa Karai Kasang gaw shinggyim masha ni hpe tsawm htap la ai mungkan ga ntsa htani htana asak hkrung na matu ahkaw ahkang jaw da ai lam chye wa ai. “Yehowa hpe myit mada ai ni, lamu ga hpe madu lu na” ngu Shakawn Kungdawn 37:9 hta tsun da ai. Chyum Laika hta lawm ai Karai a tsang madang ni hpe hkan sa ai ni yawng, dai ahkaw ahkang lu na ngu ai hpe ngai grai ra ai.

Raitim, Chyum Laika tsang madang ni hte maren nga na matu ngai grai shakut wa ra ai. Awng dang ai yungwi ninghkring, sumla soi sara re ai majaw, grai arawng la taw ai re. Dai majaw, shagrit shanem myit nga hkra shawng shakut ai. Akyang hten ai prat hkrun lam hpe kau da na matu grai yak wa ai. Chyum Laika tsun ai hte maren dang lu ai daram shakut nna asak hkrung mayu ai ni hpe, myit galu ya ai, tsawra myit madun nna chyena ya ai majaw Yehowa hpe grai chyeju dum ai.

Karai nga ai hpe n kam ai sharin achyin lam hte Kumyunit sharin achyin lam ni gaw asak 18 ning du hkra ngai hpe shingkang ka-up wa ai. Dai hpang Chyum Laika gaw nye prat hpe galai shai kau ya ai. Chye wa ai lam ni a majaw, myit mada lam nga wa ai. Htawm hpang a matu sha myit n tsang nga sai. 1919 hta, Yehowa Sakse langai hku na hkalup hkam la ai. Dai hpang Tabita ngu ai hkristan nauna langai hpe hkungran la ai. Chyum Laika a lam masha ni chye wa hkra, aten lu ai daram anhte karum ya ai. Ngai zawn sha Kumyunit sharin achyin lam hte Karai nga ai hpe n kam ai sharin achyin lam ni a shingkang ka-up hkrum nga ai masha law law hte galoi mung hkrum ai. Yehowa hpe anhte gara hku chye wa ai lam shanhte hpe tsun dan lu ai majaw grai kabu ai.

Ngai Yehowa Sakse ni hte kanawn hpang wa ai shaloi, anu awa ni tsang wa ma ai. Raitim, Sakse Hkam ni hte kanawn ai majaw, ngai masha kaja byin wa ai hpe shanhte sadi hkrup ai. Ya nga yang, nu yan wa mung Chyum Laika hti nga sai. Yehowa Sakse ni a zuphpawng ni hpe lung nga sai.

Dingku num, dinghku la ni hte seng ai Chyum Laika hpaji jaw ga hpe dang lu ai made hkan sa ai majaw, anhte a dinghku ngwi pyaw nga ai. Ga shadawn, shada da sadi dung u ngu ai hpaji jaw ga hpe hkan sa ai majaw, dinghku ngang grin ai.​—Hebre 13:4.

Dai sha n-ga, hkrit hkrit hte asak hkrung nga ra ai, htawm hpang hpe myit nna tsang nga ai lam ni n nga sai. Teng sha simsa nna kahkyin gumding ai mungkan grup dinghku kaw na nta masha langai zawn hkam sha ai. Ndai dinghku hta shada da maren sha kanawn mazum ai. Ngai myit mada wa ai gaw ndai zawn prat re.