Mungkan ting na masha ni gaw, ladu lai kahtet wa ai dam hte de a majaw matut byin wa ai, sawng dik ai du hkra ladaw ni hpe hkamsha nga ai. Lawu na shiga ni hpe sadi yu u:

•   “Mungkan ting na kahtet shadang ni hpe jahpan la wa ai gaw, 174 ning rai sai. June shata gaw, shaning ni laman kahtet shadang tsaw dik htum shata re.”—Amyusha Hka Hte Seng Ai Lam Hte Nbung Shim Hparan Lajang, Amerikan Munghpawng Mungdan Hpaga Dap, July 13, 2023.

•   “Itali, Saping, Pyintit, Jamani, Polan, Tsitsali zunlawng hte Sadiniya zunlawng ni hta, kahtet shadang 48°C du hkra rawt wa chye ai. Urawpa hta kahtet dik htum rai wa na masa nga ai.”—Urawpa Lamu Hpungtang Ejensi, July 13, 2023.

•   “Mungkan ga grau kahtet wa ai hte maren, marang chyahkring hkring htu wa na, marang grau kaba wa na, hka tung kaba ai lam ni grau sawng wa na masa nga ai hpe, sawn maram da ai.”—Mungkan Lamu Marang Hpung A Lamu Marang Maram Dap, hka, hkyen tawng sawk sagawn hpung matsun du Tsatephpan Ulanbruk, July 17, 2023.

 Du hkra ladaw grau sawng wa ai shiga ni hpe na ai shaloi, myit tsang ai kun? Ndai ahkyak ai lam hte seng nna, Chyum Laika hpa tsun da ai kun?

 Re. Mungkan ting kahtet shadang rawt ai, du hkra ladaw grai sawng wa ai lam ni gaw, anhte a prat hte seng nna Chyum myihtoi ga tsun da ai hte maren rai nga ai. Ga shadawn, “hkrithpa hte lamik kumla kaba” ni hpe anhte mu lu na lam Yesu tau hkrau tsun wa ai. (Luka 21:11) Shinggyim masha a majaw byin wa ai, mungkan ting kahtet shadang rawt ai lam a majaw, mungkan hten mat na kun? ngu nna masha ni myit tsang nga ai.

 N hten ai. Karai Kasang gaw, mungkan ga hpe anhte htani htana nga na matu hpan da ya ai. Dai majaw, shinggyim masha ni a majaw mungkan ga hten mat ai hpe, yu nga na n re. (Shakawn 115:16; Hpaji 1:4) “Lamu ga jahten shabyak kau ai ni hpe bai jahten shabyak kau na” nga nna mung ga sadi jaw da ai.—Shingran 11:18.

 Karai Kasang gaw, mungkan ga hpe shingra tara tsin-yam ni kaw na makawp maga ya lu ai. Makawp maga ya na ngu nna mung Chyum Laika tsun ai.

•   “Karai Kasang gaw nbung laru zim shangun ai. Hka leng ni hpe zim mat shangun ai.” (Shakawn 107:29, NWT) Karai Kasang gaw, shingra tara ni hpe hkang lu ai zawn, du hkra ladaw sawng ai lam ni hte hpawn, shingra tara hte seng ai manghkang ni yawng hpe mung, hparan ya lu ai.

•   “Karai Kasang gaw, mungkan ga hpe lanu lahku ai. Ga sau ni hpe jahpring nna, nai mam law law shabyin ya ai.” (Shakawn 65:9, NWT) Karai a shaman chyeju a majaw, mungkan ga gaw hparadisu byin wa na.

 Shingra tara ni bai kaja wa na ngu ai, Chyum Laika ga sadi ni a lam chye mayu yang, “Mungkan Ga Hpe Kadai Hkye Na?” (Myen) ngu ai sumhpa hpe hti yu u.