COVID-19 a majaw masha wan 6.27 daram si mat ai ngu, May 23, 2022 hta Mungkan Hkamja Dap (WHO) kaw na tsun ai. Raitim, May 5, 2022 hta shana ai shiga langai hta gaw, WHO kaw na sawn la ai si ai jahpan hta grau law ai. Ngut nna, 2020 hte 2021 laman hta, “dingtawk (sh) dingtawk n re ai hku lu la ai jahpan hku nga yang, COVID-19 kap bra ana a majaw si mat ai gaw, . . . sawn la ai hti hkum wan 14.9 daram re ai” ngu nna mung tsun ai. Dai zawn yawn hpa mabyin hte seng nna Chyum Laika hta tsun da ai lam nga ai kun?

•    “Hpang jahtum na nhtoi ni” hta, hkrit hpa kap bra “ana zinli” ni byin wa na ngu Yesu tau hkrau tsun da ai.​—Luka 21:11; 2 Timohti 3:1.

 Yesu tau hkrau tsun da ai lam ni dai ni byin taw sai. Grau chye lu hkra, “‘Hpang Jahtum Na Nhtoi’ (sh) ‘Jahtum Aten’ Na Lamik Kumla Gaw Hpa Rai Kun?” (Myen) ngu ai sumhpa hpe hti yu u.

•    “Shalan shabran lam amyu myu a Karai Kasang gaw, . . . yakhkak jamjau lam amyu myu hkrum ai shaloi shalan shabran ya ai.”​—2 Korinhtu 1:3, 4, NWT.

 Tsawra ai ni si mat ai hpe hkrum ga ai masha law law gaw, Chyum Laika kaw na shalan shabran lam lu la ma ai. Grau chye lu hkra, “Yawn Hkyen Ai Lam Hpe Hparan Lu Hkra Ya Galaw Lu Ai Lam” (Myen) hte “Yawn Hkyen Ai Ni A Matu Kaja Htum Karum Shingtau Lam” (Myen) ngu ai sumhpa ni hpe hti yu u.

•    “Na a mungdan du wa ru ga; Lamu tang hta, na a myit dik nga ai hte maren, ga ntsa e mung, dik lit ga law.”​—Mahte 6:10.

 Kade n na yang, shinggyim masha ni gaw, “ngai machyi nga nngai” ngu n tsun ra hkra, “Karai Kasang a mungdan” gaw galaw ya sana re. (Marku 1:14, 15; Esaia 33:24) Dai sumsing asuya hte seng ai lam, hpa ni galaw ya sana ngu ai lam ni hpe chye lu hkra, Karai A Mungdan Ngu Ai Gaw Hpa Rai Ta? ngu ai video hpe yu u.

 Chyum Laika hta lawm ai mauhpa ga sadi ni hte hpaji rawng ai hpaji jaw ga ni kaw na akyu lu mai ai Chyum Laika hta tsun da ai lam hpe grau chye lu hkra, nang hte na nta masha ni hpe saw shaga mayu ai.