Dai Ni Aten Lusha Hku Hku Ai Hte Seng Nna Chyum Laika Hta Hpa Tsun Da Ai Kun?
“Kaw si hpang gara ai ni n nga sai.” Shinggyim masha ni a kaba htum manghkang re ai lusha hku hku ai lam hpe hparan ya na ngu nna, mungkan a ningbaw ni myit mada let dai ga hpe tsun wa ai re. a Raitim, mungkan hta lusha hku hku ai lam n nga ai aten du wa na kun? Chyum Laika hta hpa tsun da ai kun?
Dai ni aten lusha hku hku ai hte seng nna Chyum Laika hta tau hkrau tsun da
“Hpang jahtum na nhtoi ni” ngu shaga ai anhte a prat hta, lusha hku hku ai lam byin wa na ngu Chyum Laika hta tau hkrau tsun da ai. (2 Timohti 3:1) Ndai lusha hku hku ai lam gaw, Karai Kasang hte n seng ai raitim, dai lam hte seng nna sadi jaw da ai. (Yaku 1:13) Chyum myihtoi ga lahkawng hpe sadi yu u.
“Hku hku ai . . . shara kaga kaga hta e byin wa na ra ai.” (Mahte 24:7) Dai Chyum myihtoi ga gaw, shara law law hta lusha hku hku ai lam byin na hpe tau hkrau tsun nga ai re. Malu masha htuk shapraw ai lam hpe sawk sagawn ai masha ni a jahpan langai hta ndai hku tsun da ai: “Lusha hku hku ai hte seng ai mungkan a masa, hkamja lam hte malu masha taw ai lam gaw grau sawng wa ai.” b Mungdan law law kaw na, wan hku law ai masha ni gaw ra kadawn ai malu masha ni hpe n lu ma ai. Yawn hpa gaw, dai lam a majaw masha law law asak si sum ma ai.
“Yu u, gumra achyang nga nga ai; dai hta jawn ai wa gaw shi a lata hta joi lang nga ai.” (Shingran 6:5) Ndai myihtoi ga hta ga shadawn gumra hte gumra jawn ai wa gaw, hpang jahtum na nhtoi ni a lusha hku hku ai lam hpe tsun mayu ai re. c Gumra jawn ai wa a lata hta joi nga ai. Lusha ni hpe shadawn sharam hte sha shen ya lu ai ngu ai lachyum re. Gumra jawn ai wa pru wa ai shaloi, nsen langai hpe mung na lu ai. Lusha manu grai rawt wa nna, malu masha ni hpe lahpawt lama n galaw na matu sadi jaw ai ga re. (Shingran 6:6) Dai ga ni gaw, dai ni aten na mungkan grup lusha taw ai manghkang hpe asan sha madun dan nga ai. Ya aten hta, wan hkying hku law ai masha ni gaw, n-gun lu shangun ai malu masha ni hpe n lu la ma ai, n lu mari ma ai.
Lusha hku hku ai lam gara hku mat mat na kun?
Anhte a mungkan ga gaw, masha yawng a matu malu masha law hkra sha n-ga, jan hkra shapraw ya nga ai ngu hpaji du ni tsun ai. Rai yang, hpa majaw lusha hku hku ai manghkang byin nga ai kun? Dai manghkang ni hpe anhte a Hpan Madu Yehowa d hparan ya na lam Chyum Laika hta gara hku tsun da ai kun?
Manghkang: Masha ni kaw si hpang gara nga ai gaw rap ra lam n nga ai hpaga lam, matsan ai lam ni a majaw re. Dai lam ni hpe masha asuya ni n yeng seng kau ya lu ai.
Hparan lu ai lam: N hkum tsup ai masha asuya ni a shara hta, hkum tsup ai asuya re ai Karai A Mungdan malai shang wa sana re. (Daniela 2:44; Mahte 6:10) Dai ni aten hta, matsan ai ni law law gaw shat da mi sha na matu pyi grai shakut nga ra ai. Karai A Mungdan uphkang ai aten hta gaw masa lam ni galai shai mat na re. Karai Mungdan a Hkawhkam Yesu Hkristu a lam Chyum Laika hta ndai hku tsun da ai: “Kaning rai nme law, shaga nga ai matsan ai wa hte, Nrum ntau n lu ai nni nkri hkrum ai wa hpe, shi mawai Ia na ra ai. . . . Mungdan na bum ni a pungding du hkra, nai mam paw wa” na.—Shakawn 72:12, 16.
Manghkang: Majan a majaw, hten za ai lam ni byin wa ai, hpaga bungli ni hta manghkang byin wa ai. Malu masha htuk shabra na matu yak wa ai (sh) hkring mat ai.
Hparan lu ai lam: “Ga ting hta na hpyen majan [Yehowa] jasim kau wu ai; Ndan pala hpe shi daw kau nna, Ri hpe kahtum kadaw di kau wu ai: Hpyen leng ni hpe wan hte nat kau mu ai.” (Shakawn 46:9) Karai Kasang gaw majan laknak ni, majan byin wa hkra galaw ai ni hpe jahten kau na re. Majan n nga mat yang, masha shagu lusha ni hpe aloi hte sha lu la na re. Chyum Laika hta ndai hku ga sadi jaw da ai: “Ding man ai ni awng wa mu ga, . . . ngwi kaba rai nga lu u ga.”—Shakawn 72:7.
Manghkang: Grai sawng ai lamu marang masa hte shingra tara tsin-yam ni a majaw, nai mam ni hten nna rem da ai dusat ni si ai.
Hparan lu ai lam: Karai Kasang gaw shingra tara hpe hkang da na. Lamu marang kaja yang hkai lu hkai sha ai lam mung kaja na re. Chyum Laika hta ndai hku tsun da ai: “[Yehowa] gaw nbung laru hpe, bung li sha shatai dat nna, hka leng ni sim mat ma ai. . . . zaibru jang hpe hka hpung-ya, Hkraw ai shara hpe hka hpaw ai shara shatai nna, Kawsi ai ni hpe dai yang e nga shangun mu ai. . . . Shanhte yi galaw nna tsabyi sun hkai da mu ai, Nsi naisi hpe mung, shu da mu ai.”—Shakawn 107:29, 35-37.
Manghkang: Lawhpa ai ni hte akyang hten ai ni gaw, shoihpa nga ai malu masha ni hpe htuk shapraw ma ai. Ra kadawn ai ni hpang de malu masha ni n du ai mung shanhte a majaw re.
Hparan lu ai lam: Karai A Mungdan gaw n dinghpring ai ni, akyang hten ai ni yawng hpe yeng seng kau na re. (Shakawn 37:10, 11; Esaia 61:8) Yehowa Karai Kasang gaw ‘Nni nkri hkrum ai ni hpe tara dara ya mu ai, Hku hku hkrum ai ni hpe lusha shahpa jaw mu ai’ ngu Chyum Laika hta tsun da ai.—Shakawn 146:7.
Manghkang: Shaning shagu malu masha htam 3 hta na htam mi gaw majoi byin mat ai.
Hparan lu ai lam: Karai A Mungdan hta malu masha hpe atsawm hparan lajang lu na. Mungkan ntsa hta Yesu nga wa ai shaloi, malu masha ni hpe lahpawt lama n di wa ai. Ga shadawn, masha 5,000 jan hpe mauhpa lam hte Yesu jaw sha ngut ai hpang, sape ni hpe ndai hku tsun ai: “Hpa mung n mat u ga, ngam ai ahkyep alep ni hpe hkan hta la mu.”—Yawhan 6:5-13.
Karai A Mungdan gaw, hku hku ai lam byin shangun ai lam ni hpe yeng seng kau ya sana re ai majaw, masha yawng n-gun lu shangun ai malu masha ni nhpaw n ya lu la sana re. (Esaia 25:6) Karai A Mungdan gaw dai ni hpe galoi galaw ya na kun? Kahtap chye mayu yang, “Karai Kasang A Mungdan Gaw Mungkan Ga Hpe Gara Aten Hta Uphkang Na Kun?” (Myen) sumhpa hpe yu u.
a 2015 ning hta Mungkan Wunpawng Hpung Shang yawng gaw, 2030 Matut Bawngring Rawt Jat Galu Kaba Wa Na masing hpe hkap la nna hkan sa ai.
b The Food and Agriculture Organization of hte United Nations, hte International Fund for Agricultural Development, hte United Nations Children’s Fund, hte United Nations World Food Programme, and hte World Health Organization ni a tang shawn ai lam.
c Shingran Laika kaw na gumra jawn ai marai 4 a lam grau chye mayu yang, “Gumra Jawn Ai Marai Mali—Shanhte Gaw Kadai Ni Kun?” (Myen) sumhpa hpe yu u.
d Yehowa ngu ai gaw, Karai Kasang a amying shingteng re. (Shakawn 83:17) “Yehowa Gaw Kadai Rai Kun?” ngu ai sumhpa hpe yu u.
You May Also Like
ESSENTIAL BIBLE TEACHINGS
Karai A Mungdan Ngu Ai Gaw Hpa Rai Ta?
Yesu a magam hta Karai Kasang a Mungdan a lam grau nna htawn tsun wa ai. Karai Kasang a Mungdan du wa na matu tsaban law law kaw nna masha ni akyu hpyi wa ma ai.
