2022, November 20 hta, COP27 Mungkan Wunpawng Hpung (UN) A Du Hkra Ladaw Galai Shai Ai Hte Seng Ai Bawngban Hpawng ngut mat ai. Dai zuphpawng sa lung ai ningbaw ni hte hpaji du ni gaw, matsan ai mungdan ni du hkra ladaw tsin-yam hkrum ai hpe hparan lu hkra, ja gumhpraw karum ya na matu myit hkrum wa ai. Raitim, dai manghkang hpe tsep kawp hparan lu na n re ngu masha law law sawn la ai.

•   2022, November 19 hta, UN a ninggawn amu madu kaba Antoniyu Gutaret ndai hku tsun ai: “Du hkra ladaw tsin-yam a majaw yakhkak hkrum nga ai ni hpe karum na matu, alu gumhpraw san tawn da na matu dawdan ai hpe ngai grai kabu ai. Raitim, dai daram hte sha n mai byin shi ai . . . anhte a mungkan ga gaw shoihpa naw nga nga ai.”

•   “Mungkan ga gaw kade n na yang, grai sawng ai du hkra ladaw tsin-yam hte hkrum wa na masa nga ai.”​—Meri Robinsan, Aiyalan gumsan magam hte UN Shinggyim Ahkaw Ahkang Hte Seng Ai Komishin Daju usa, November 20, 2022.

 Ramma ni gaw, laksan hku nna mungkan ga a htawm hpang hte seng nna myit tsang nga ma ai. Raitim, mungdan ni gaw du hkra ladaw galai shai ai lam hpe hparan lu hkra shakut na ngu ai ga sadi hte maren galaw lu na kun? Chyum Laika hta hpa tsun da ai kun?

 Mungdan ni shakut shaja nna galaw ai raitim, du hkra ladaw tsin-yam hpe hparan ai hte seng nna awng dang lam gaw, shadawn sharam sha rai na re ngu Chyum Laika hta tsun da ai. Hpa majaw kun? Lam lahkawng hpe yu yu ga:

•   “Magaw ai hpe malan lu ai n rai; yawm ai hpe hti shalawm lu ai n rai.”​—Hpaji Ningli 1:15.

   Lachyum: Shinggyim masha ni gaw, tinang hkrai uphkang lu ai atsam n nga ai majaw, asuya ni mung galaw lu ai atsam shadawn sharam sha nga ai. (Yeremia 10:23) Mungdan ni kahkyin gumdin let kade daram shakut shaja tim, mungkan manghkang ni hpe hparan lu na n re.

•   “Masha ni gaw, tinang hkum hpe tsaw ra ai ni, gumhpraw marin ai ni . . . kaja lam hpe n dawng ai ni” rai na mara ai.​—2 Timohti 3:2, 3.

   Lachyum: Dai ni aten na masha law law gaw, tingkyeng myit rawng ai ni, grau kaja hkra rau jawm galaw mayu ai myit n nga ai ni rai na ngu Chyum Laika hta tup hkrak tsun da ai.

 Raitim, mungkan ga a htawm hpang gaw, shinggyim asuya ni a ga sadi hta n madung ai. Atsam hpring ai Yesu Hkristu hpe mungkan Uphkang Madu hku nna Karai Kasang lajang da ya ai. Shi hte seng nna Chyum Laika hta ndai hku tsun da ai:

•   “Shi a lahpa ntsa e up ai ahkang mara nga na rai nna, shi a amying hpe, Mauhpa wa, Hpaji daw ai wa, Daru Magam Karai Wa, Htani htana Kawa, Ngwi pyaw Madu, ngu nna shamying na mu ai.”​—Esaia 9:5.

 Yesu gaw Karai Mungdan (sh) sumsing asuya a Hkawhkam re. (Mahte 6:10) Shi hta n-gun atsam, nyan hpaji, mungkan hte shinggyim masha ni hpe lanu lahku ya mayu ai myit nga ai. (Shakawn 72:12, 16) Shi a uphkang ai npu hta dai sumsing asuya gaw, “lamu ga jahten shabyak kau ai ni hpe bai jahten shabyak kau” nna, ndai mungkan ga hpe bai gram lajang na re.​—Shingran 11:18; Esaia 35:1, 7.

 Du hkra ladaw galai shai wa ai hpe kaja htum hparan ya lu ai lam hte seng nna grau chye mayu yang, “Du Hkra Ladaw Galai Shai Ai Lam Hte Anhte A Htawm Hpang​—Chyum Laika Hta Hpa Tsun Da Ai Kun?” (Myen) sumhpa hpe hti u.