Mungkan ting hta, hkrit hpa hka kaba tsin-yam hpe masha law law hkrum sha nga ai. Ndai shiga ni hpe yu yu u:

•   “Miwa mung a mare kaba kaw, shaning 140 laman, laja lana marang kaba htu wa ai. Bat Kru Ya hte Bat Masum Ya laman, 29.3 lekma (744.8 ml) htu wa ai majaw, . . . mare ting hka kaba mat ai.”—AP Shiga, August 2, 2023.

•   “Japan mungdan dingda daw hta, Hkanun nbung laru byin hpang ai, 2 ya ngu na shani, Bat Mali Ya shani hta nbung hte marang grai sawng ai majaw, yawm htum marai 2 asak si sum wa ai. . . . Nbung laru a majaw nam maling hte bum ni law ai, Htaiwan mungdan ka-ang daw hta, lekma 2 (0.6 m) du hkra marang htu na lam sawn maram da ma ai.”—Deutsche Welle Shiga Dap, August 3, 2023.

•   “Kaneda mungdan sinpraw maga, Atlantik panglai hkingau ginra hta, 50 ning laman, sawng dik htum marang kaba htu ai majaw, [Noba Skosha hta] Bat Kru Ya hte Laban Ya kaw hka kaba ai lam byin wa ai.”—BBC Shiga, July 24, 2023.

 Dai zawn mabyin ni hte seng nna, Chyum Laika hta hpa tsun da ai kun?

 Anhte gaw, “hpang jahtum na nhtoi ni” hta asak hkrung nga ai ngu Chyum Laika hta tsun da ai. (2 Timohti 3:1) Anhte a aten hta, ‘hkrithpa lamik kumla’ (sh) hkrit hpa mabyin ni mu lu na ngu Yesu tau hkrau tsun da ai. (Luka 21:11) Duhkra ladaw galai shai ai lam a majaw, shingra tara tsin-yam ni gaw, kalang ta byin wa ai, grau byin wa ai, grau sawng wa ai.

 Gaja wa nga yang, dai ni aten hta byin nga ai hkrit hpa mabyin ni gaw, anhte a myit mada lam hpe grau htoi tu shangun ai ngu Chyum Laika hta tsun da ai. Hpa majaw kun? Yesu ndai hku tsun da ai: “Dai lam ni byin hpang wa ai hpe nanhte mu myit yang, Karai Kasang a mungdan du ra ai hpe, chye na nga mu.”—Luka 21:31; Mahte 24:3.

 Ya hkrum nga ai mabyin ni gaw, Karai a Mungdan du ni sai hpe madun nga ai. Kade n na yang, Karai a mungdan gaw, hka a matut manoi mabyin hte hpawn, shingra tara ni hpe tsep kawp hkang ya sana re.—Yoba 36:27, 28; Shakawn 107:29.

 Karai a Mungdan gaw, shingra tara hpe bai kaja hkra gara hku galaw ya na ngu ai hpe grau chye mayu yang, “Mungkan Hpe Kadai Hkye La Na Kun?” (Myen) sumhpa hpe hti yu u.