2022 shaning laman, mungkan ting hpyen majan jai jarik gaw, Amerikan Dola 2.24 trillion du hkra nga wa ai. Jai jarik law malawng gaw, Yukaring majan a majaw re. Stokhum Mungdan Ga Daga Simsa Lam Sawk Sagawn Dap (SIPRI) gaw, 2023, April hta lawu na shiga hpe ndau shana wa ai:

•   2022 laman, Urawpa a hpyen majan jai jarik gaw, “tsa lam shadang 13 jat mat ai. Katsi majan ngut ai aten kaw nna jai dik htum shaning re.”

•   2022 laman “sawn maram lu ai daram, Rasha mungdan a hpyen majan jai jarik gaw, tsa lam shadang 9.2 jat wa ai majaw, jai dik htum mungdan hku nna nambat 5 kaw nna nambat 3 de du wa ai.”

•   Amerikan mungdan gaw, hpyen majan jai jarik law dik htum mungdan hku nna matut tsap nga ai. “Mungkan ting na hpyen majan jai jarik yawng a tsa lam shadang 39” gaw, Amerikan mungdan kaw na re.”

 “Kade n na shi ai shaning ni laman, mungkan ting na hpyen majan jai jarik gaw, matut jat nga dingyang re. Atsawm tup hkrak n chye lu ai mungkan hta, anhte asak hkrung nga ai ngu ai madi madun lam re” ngu SIPRI a ningtau laika ka sara Dr. Nan Tiyan tsun ai.

 Ya prat, mungkan a n-gun ja ai mungdan ni lapran manghkang ni grau law wa na ngu, Chyum Laika hta tau hkrau tsun da ai zawn, simsa lam lu mai ai langai sha re ai myit mada lam hpe mung tsun da ai.

•   Anhte gaw, “hpang jahtum na aten” hta asak hkrung nga ai ngu Chyum Laika hta tau hkrau tsun da ai.—Daniela 8:19.

•   Ndai aten hta, mungkan daru magam ni gaw shada da shingjawng hkat na ngu, Daniela Laika hta tau hkrau tsun da ai. Dai mungkan daru magam ni gaw, shingkang ka-up lu hkra shada da “htim gasat” na (sh) shingjawng hkat na re. Dai zawn shingjawng ai lam hta “hpu ai baw” (sh) ja gumhpraw law law jailang ai mung lawm ai.—Daniela 11:40, 42, 43.

 Ndai myit lawm hpa Chyum myihtoi ga hpe grau chye mayu yang, Hpring Tsup Ngut Sai Myihtoi Ga—Daniela Daw Kaba 11 video (Myen) hpe yu u.

•   Shinggyim asuya ni hpe Karai Kasang yeng seng kau na lam Chyum Laika hta tsun da ai. “Karai Kasang gaw, prat dingsa e n hten n mat ai mungdan de da nna, de a ahkang aya gaw maigan amyu a lata hta galoi mung shang lu na, n rai: dai gaw ya tsun ai mungdan ni yawng hpe, agrawp shamyit kau nna, dai nan htani htana a grin nga na ra ai.”—Daniela 2:44.

•   Shinggyim masha ni n lu galaw ai htani htana grin ai jet ai simsa lam hpe, kade n na yang Yehowa a Karai Kasang galaw ya sana re. Gara hku nna kun? Shi a sumsing Mungdan asuya gaw, laknak hte dawsa lam yawng hpe jahtum kau ya sana re.—Shakawn 46:8, 9.

 Karai A Mungdan galaw ya na lam ni hte seng nna grau chye na matu “Karai A Mungdan Hta ‘Simsa Lam Law Htam’ Shangun” (Myen) sumhpa hpe hti u.