Kade n na shi yang, mungkan ningbaw ni, hpungtang hpaji du ni hte ladat hpaji du ni gaw, jak bawnu (AI) a akyu jaw ai lam hpe sha n-ga, dai ladat hpaji hpe shut ai hku lang ai majaw, byin wa na shoihpa ni hpe mung sawn maram tsun wa ai.

•    “AI gaw, dai ni aten hta, madang tsaw dik htum ladat hpaji ni kaw na langai re. AI gaw, masha ni a prat hpe rawt jat wa shangun lu tim, . . . maga mi hta gaw, shimlum lam hte seng nna jahkrit shama lam ni grau law wa chye ai, shiggyim ahkaw ahkang hte tinang a shimlum lam, dimokresi asuya ntsa tawn ai mung masha ni a kam ai myit mung hkra machyi wa chye ai.”—Kamala Harris, Amerikan ningtau gumsan magam, 2023, May 4.

•    “Jak bawnu (AI) a majaw, hkamja lam hte seng ai ladat hpaji ni hta rawt jat shangun lu ai zawn, hkum hkrang hte myit masin hpe mung hkra machyi shangun wa lu ai” ngu sarawun Frederik Federspiel gaw 2023, May 9 hta dip shapraw ai shi laika langai (BMJ Global Health) a a sumhpa hta ka wa ai.

•    “Masha ni gaw, shut ai shiga ni hpe shabra na matu, AI hpe akyu jashawn nga ai. Kade n na yang, AI a majaw bungli sum mat ai ni byin wa chye ai. Htawm hpang hta, AI a majaw, shinggyim masha yawng ruyak jam jau hkrum wa chye ai ngu ladat hpaji du ni myit tsang nga ai.”—2023, May 1 hta shapraw ai The New York Times shi laika.

 AI hpe akyu jashawn ai gaw, kaja ai kun? n kaja ai kun? ngu ai hpe aten gaw mahtai jaw mat na re. Chyum Laika hta hpa tsun da ai kun?

 Ladat hpaji ni gin shalat ai lam hpe, kaja ai lam hta sha akyu jashawn na re ngu masha ni hpa majaw tup hkrak n lu tsun ai kun? Hpa majaw re ai lam Chyum Laika hta tsun da ai.

1.  1. Myit kaja ai masha ni pyi, tinang a majaw byin wa na n kaja ai akyu ni hpe tau hkrau n mu lu ai.

   •    “Masha myit ai hte maren, tinang lam malang nga ti mung, De a jahtum gaw, si ai kaw byawn rai nga ai.”—Ga Shagawp 14:12.

2.  2. Kaga masha ni hpe n lu hkang ai majaw mung, tinang galaw da ai hpe kaja ai lam hta rai rai, n kaja ai lam hta rai rai lang mat chye ai.

   •    “Dai hta kaga, ngai shachyen ngut sai amu ni hpe, nye hpang e du na ra ai wa a matu htawng da ya ang ai majaw, jan a npu e ngai galaw ai magam bungli mahkra hpe ngai n dawng nngai: dai wa gaw hpaji rawng na kun, angawk ai wa tai na kun, kadai chye lu a ta? Rai ti mung, jan a npu e nye a hpaji byeng-ya hte ngai shangut ai magam bungli mahkra a ntsa e shi up na ra ai: dai mung kaman lila hkrai rai nga ai.”—Hpaji Ningli 2:18, 19.

 Dai zawn ung ang shangun ai lam ni a majaw shinggyim masha ni gaw, Hpan Madu a lam matsun ra ai.

 Shinggyim masha ni a majaw raitim, masha ni gin shalat ai ladat hpaji a majaw raitim, mungkan ga hte shinggyim masha ni htenza mat ai du hkra, Hpan Madu gaw ahkang jaw na n re.

•    “Ginding aga chyawm gaw, dinggrin a nga nga ai.”—Hpaji Ningli 1:4.

•    “Ding hpring ai ni gaw dai mungdan hpe madu lu nna, Dai hta e nan nawng e nga nga lu na ma ra ai.”—Shakawn 37:29.

 Hpan Madu gaw, Chyum Laika hku nna, htawm hpang hta ngwi pyaw simsa lam lu shangun ai lam matsun jaw ai. Chyum Laika hta tsun da ai hpe grau chye mayu yang, “Shimlum Ai Htawm Hpang A Matu Lam Matsun Nga Ai Kun?” (Myen) hte “Jet Ai Htawm Hpang Myit Mada Lam” (Myen) sumhpa ni hpe hti u.