Yukaring majan hte duhkra ladaw galai shai ai lam a majaw, mungkan ting hta malu masha lu na matu, garan na matu yakhkak wa ai. Grau nna gaw, bawngring taw nga ai mungdan ni hta, kan lahpa mi a matu, grau shakut shaja galaw ra wa ai.

•    “Mung masa lam n zim ai, duhkra ladaw galai shai ai, myihprap wan hte jak sau manu rawt ai hte kaga lam ni a majaw, malu masha galaw shapraw na matu, lata de du na matu yakhkak wa ai.”—UN A Ninggawn Amu Madu Kaba, Antoniyu Gutaret, July 17, 2023.

•    “Nai mam sa ai myit hkrum laika kaw na Rasha pru mat ai majaw, mungkan malu masha manghkang grau sawng wa ai. Dai majaw, shang gumhpaw n law ai mungdan ni hta, grau nna Ahprika Dingdung hte Sinpraw Ka-ang mungdan ni hta malu masha jahpu gaw, grai rawt wa na masa nga ai hpe hpaji du ni maram da ma ai.”—Atalayar.com, July 23, 2023.

 Malu masha manghkang hte htawm hpang a lam Chyum Laika hta hpa tsun da ai kun?

•    Yesu ndai hku tau hkrau tsun wa ai: “Amyu mi hte amyu mi, mung mi hte mung mi shada da gumlau hkat na ma ra ai: hku hku ai . . . byin wa na ra ai.”—Mahte 24:7.

•    Shingran Laika hta gumra jawn ai marai mali a lam tsun da ai. Gumra jawn ai marai langai gaw, majan hpe ga shadawn tsun ai. Hpang kaw hkan wa ai gumra jawn ai wa gaw, hku hku ai hpe ga shadawn tsun ai. Malu masha ni hpe sharam sha ra na aten, grai manu jahpu jaw nna mari ra na aten re. “Ngai yu yang, yu u, gumra achyang nga nga ai; dai hta jawn ai wa gaw shi a lata hta joi lang nga ai rai nna, . . . Hkaulan mam bye mi na gumhpraw lap mi, mukyaw mam bye masum na gumhpraw lap mi, ging nga ai; . . . nga nna nsen tsun pru ai gaw, ngai na nngai.”—Shingran 6:5, 6.

 Malu masha manghkang a majaw, dai Chyum Laika myihtoi ga ni gaw, “hpang jahtum na nhtoi” ngu Chyum Laika tsun ai, dai ni aten hta hpring tsup taw nga ai. (2 Timohti 3:1) “Hpang jahtum na nhtoi” a lam, Shingran Laika kaw na gumra jawn ai marai mali a lam hpe, grau chye mayu yang, Mungkan Gaw 1914 Kaw Na Galai Shai Nga Sai video hpe yu u. “Gumra Jawn Ai Marai Mali—Shanhte Kadai Ni Kun?” (Myen) sumhpa hpe hti u.

•    Malu masha gun rai manu rawt ai, malu masha taw ai zawn re ai, yakhkak ai masa ni hpe gara hku hparan lu ai hte seng nna, Chyum Laika hta tatut hpaji jaw ga ni lawm ai. Hpaji jaw ga nkau mi hpe “Shang Gumhpraw Loi Mi Hte Matut Nga Lu Ai Lam” (Myen) sumhpa hpe hti yu u.

•    Masa lam ni grau kaja wa na ngu Chyum Laika hta myit mada lam jaw da ai. “Bum ni a pungding du hkra, nai mam paw wa” na aten, masha shagu hkru hkru kat kat sha lu na aten du wa na ngu, ga sadi jaw da ai. (Shakawn 72:16) Ndai htawm hpang myit mada lam hte ndai myit mada lam byin wa na hpe, hpa majaw kam mai ai lam grau chye mayu yang, “Jet Ai Htawm Hpang Myit Mada Lam” (Myen) sumhpa hpe hti yu u.