Mungkan ting hta, mung masa lam a majaw myit garan ai lam ni byin nga ai. 2022 Pyu, Sawk Sagawn Dap a jahpan (Pew Research Center) hku nga yang, “mungdan 19 hpe maram yu ai shaloi, asak hpring sai masha tsa lam shadang 65% gaw mung masa pati amyu myu hpe, madi shadaw ya ai ni a lapran hta grai sawng ai myit n hkrum ai lam ni nga ai” ngu tsun ai.

 Na a buga ginra hta mung dai zawn myit garan ai lam ni grai sawng wa ai hpe sadi hkrup ai kun? Hpa majaw kun? Hparan lu na ladat nga ai kun? Chyum Laika hta tsun da ai hpe yu yu ga.

 “Hpang jahtum na nhtoi ni” ngu tsun da ai dai ni aten hta, masha law law hta kahkyin gumdin ai lam hpe jahten ai myit jasat ni nga wa na lam, Chyum Laika hta tau hkrau tsun da ai.

•    “Hpang jahtum na nhtoi ni hta e, yak la ai aten du na ra ai, chye nga u; kaning rai nme law, masha ni gaw, tinang hkum hpe tsaw ra ai ni, . . . masin n si hkraw ai ni” rai na.—2 Timohti 3:1-3.

 Asuya ni awng dang wa hkra, mung masha law law shakut madi shadaw ya ai raitim, tang du ai lam n nga ai. Masha a ningmu n bung hkat ai majaw, manghkang ni hpe rau jawm hparan na matu gaw n mai byin na re. Moi kaw nna Chyum Laika hta tsun da ai hte maren byin nga ai.

•    “Masha shada uphkang ai gaw, hkra machyi ai lam ni sha byin shangun ai.”—Hpaji 8:9, NWT.

 Raitim, dai ni aten na mung masa a majaw, myit garan nga ai lam hpe hparan ya lu ai asuya hpe woi awn na Wa a lam Chyum Laika hta tsun da ai.

 Atsam hpring ai ningbaw, Yesu Hkristu a lam Chyum Laika hta tsun da ai. Yesu gaw masha amyu baw yawng hpe kahkyin gumdin, simsa shangun mayu ai. Dai zawn galaw lu ai hpung atsam hte ahkang aya mung nga ai.

•    “Shi a aprat e ding man ai ni awng wa mu ga, Shata mat mat ai du hkra ngwi kaba rai nga lu u ga.”—Shakawn 72:7.

•    “Masha amyu shagu shi hpe daw nga” na.—Shakawn 72:11.

 Yesu gaw kaja htum ningbaw re. Hpa majaw nga yang, shi gaw shinggyim masha ni hpe lanu lahku ai, karum ya mayu ai. Laksan hku nna, n tara ai hku kanawn mazum hkrum ai ni hpe re.

•    “Shaga nga ai matsan ai wa hte, Nrum ntau n lu ai nni nkri hkrum ai wa hpe, shi mawai la na ra ai. Hti n mai ni hte, matsan mayan ni hpe shi matsan dum nna, Matsan mayan ni a myit masin hpe hkye hkrang la na nu ai. Zingri zingrat hte dip sha ai kaw na, shi shanhte a asak hpe shaw la nna, Shanhte a asai gaw shi a myi hta hpu la nga na ma lu ai.”—Shakawn 72:12-14.

 Yesu woi awn na Karai Kasang a Mungdan asuya a lam grau hkaja yu u. Shi a uphkang ai lam kaw nna gara hku akyu lu mai ai, gara hku madi shadaw ya mai ai lam ni hpe kahtap hkaja yu u.

•    Karai A Mungdan Ngu Ai Gaw Hpa Rai Ta? ngu ai video hpe yu u.

•    “Karai Kasang A Mungdan—Akyang Hten Ai Lam N Nga Ai Asuya” (Inglik) sumhpa hpe hti u.