November 20 kaw nna December 18 du hkra galaw ai FIFA Mungkan Gawdin Shingjawng Poi hpe, masha wan hkying 5 daram yu na re ngu sawn maram da ma ai. Dai zawn ginsup poi lamang ni gaw, yu ai ni hpe kahkyin gumdin shangun ai sha n-ga, kaga akyu law law mung jaw ya ai ngu, masha law law hkamsha ai.

•   “Ginsup poi gaw, mungkan hpe galai shai ya lu ai atsam nga ai. Myit sharawt ya lu ai atsam nga ai. Shinggyim masha ni hpe kaja htum kahkyin gumdin ya lu ai atsam mung nga ai.”​—Nesan Mandela, Dingda Ahprika gumsan magam usa.

•   “Gawdin gaw, masha ni hpe shada da tsawra shangun ai, kahkyin gumdin shangun ai, myit mada lam, ngwi pyaw lam, myit rawt ai lam ni hkamsha shangun ai.”​—Jiyanni Inhpantinu, FIFA ningbaw kaba. a

 Mungkan Gawdin Shingjawng Poi (sh) kaga ginsup lam ni gaw, dai zawn ahkyak ai lam ni hpe shabyin ya lu ai kun? Simsa lam hte kahkyin gumdin lam a matu, myit mada lam lama ma naw nga ai kun?

 Dai ning na Mungkan Gawdin Shingjawng Poi gaw, ginsup poi daram sha n re. Shinggyim ahkaw ahkang, amyu ginhka ai lam, hpaga lam ni hte hpawn, masha nga pra lam, mung masa lam ni hta myit n hkrum ai lam ni byin wa ai.

 Dai pyi, masha law law gaw Mungkan Gawdin Shingjawng Poi zawn re ai, mungdan ga daga ginsup poi lamang ni gaw, ngwi pyaw lam jaw lu ai ngu hkamsha nga dingyang re. Raitim, dai ginsup poi ni gaw masha ni lu mayu ai, ngang grin ai kahkyin gumdin lam hpe n jaw lu ai. De a malai, Chyum Laika hta na “hpang jahtum na nhtoi ni” hta mu lu na, ginhka ai myit jasat hte arawn alai ni hpe, shanhte ayan madun nga ai.​—2 Timohti 3:1-5.

 Chyum Laika hta, mungkan kahkyin gumdin lam a matu jet ai myit mada lam lawm ai. “Karai Kasang mungdan” re ai sumsing asuya a npu hta mungkan ting na masha yawng kahkyin gumdin wa na ngu, ga sadi jaw da ai.​—Luka 4:43; Mahte 6:10.

 Mungdan A Hkawhkam, Yesu Hkristu gaw mungkan ting simsa wa hkra galaw ya na ngu ga sadi jaw da ai. Chyum Laika hta ndai hku tsun da ai:

•   “Shi a aprat e ding man ai ni awng wa mu ga, Shata mat mat ai du hkra ngwi kaba rai nga lu u ga.”​—Shakawn 72:7.”

•   ‘Shaga nga ai matsan ai wa . . . hpe, shi mawai la na ra ai. . . . Zingri zingrat hte dip sha ai kaw na, shi shanhte a asak hpe shaw la na.’​—Shakawn 72:12, 14.

 Dai ni aten hta pyi, mungdan 239 kaw na wan hku law ai masha ni gaw, Yesu a sharin achyin lam a majaw kahkyin gumdin nga sai. N ju n dawng ai lam ni hpe jahkring kau ra ai lam, shanhte sharin la wa ai. Grau chye mayu yang, “N Ju N Dawng Ai Lam Hpe Awng Dang Lu” (Myen) ngu ai sumhpa hpe hti yu u.