Mungkan ting hta, masha law law gaw namlaw namlap sha sha ai prat hkrun lam hpe lani hte lani myit lawm wa ai.

•   “Namlaw namlap sha sha ai prat hkrun lam ngu ai gaw, malu masha, bu hpun palawng, kaga lam ni a matu dusat ni hpe jailang ai (sh) shoihpa jaw ai lam ni hpe koi ai ngu ai myit mang lam, nga sat nga sa hpe tsun ai re.”—Namlaw Namlap Sha Sha Ai Uhpung.

 Dusat ni hpe matsan dum ai majaw, namlaw namlap sha sha ai prat hkrun lam hpe lata ai ni nga ai. Makau grupyin hpe hkang zing mayu ai majaw, hkamja lam a majaw, makam masham lam ni a majaw lata ai ni mung nga ai.

•   “Namlaw namlap sha sha ai prat hkrun lam hpe laklai shangun ai lam gaw, mungkan grau kaja wa na matu marai langai hpra shang lawm galaw lu ai ladat, hkam la ai lam, lailen hku nna mu mada ai lam re.”—Britannica Ga Htai Chyum.

 Namlaw namlap sha sha ai prat hkrun lam gaw, mungkan a htawm hpang masa hpe grau kaja shangun ai kun? Chyum Laika hta hpa tsun da ai kun?

 Anhte a Hpan Madu Yehowa Karai Kasang a gaw, shinggyim masha hpe dusat ni hta grau ai ngu mu mada ai. Dusat ni a ntsa up na ahkang mung jaw da ai ngu Chyum Laika hta tsun da ai. (Ningpawt 1:27, 28) Hpang de, dusat ni hpe sha na ahkang jaw dat ai. (Ningpawt 9:3) Raitim, dusat ni hpe zingri ai hpe gaw n hkap la ai.—Ga Shagawp 12:10.

 Chyum Laika hta tsun da ai hte maren, shan sha na, n sha na hpe tinang nan dawdan ra ai. b Shan sha ai, n sha ai gaw, Karai a ningmu hta anhte hpe grau kaja ai masha byin shangun ai n re. (1 Korinhtu 8:8) Kaga masha ni shan sha na matu lata ai hte seng nna mung anhte mara n shagun ging ai.—Roma 14:3.

 Anhte a malu masha, nga sat nga sa a majaw, mungkan a manghkang ni hpe n hparan lu ai ngu Chyum Laika hta tsun da ai. Manghkang law malawng byin ai lam gaw, mungkan a mung masa lam, masha nga pra lam, hpaga lam ni a majaw re. Dai ni hpe shinggyim masha kadai mung n lu hparan ai. Chyum Laika hta ndai hku tsun da ai:

•   “Magaw ai hpe malan lu ai n rai.”—Hpaji 1:15.

 Hpan Madu gaw, shinggyim masha ni a manghkang hpe hparan ya na re. Gara hku hparan ya na ngu ai hpe Chyum Laika hta, ga shadawn ni hte ka da ai.

•   “Sumsing lamu ningnan, ginding aga ningnan, ngai mu nngai; shawng na lamu hte shawng na aga gaw lai mat wa sai: nammukdara mung dai kaw nna n nga sai.”—Shingran 21:1.

 “Shawng na lamu” ngu ai masha uphkang lam hta, “sumsing lamu ningnan” ngu ai Karai a uphkang lam hte galai kau sana re. Karai a Mungdan gaw, “shawng na aga” ngu ai nhkru ai masha ni hpe yeng seng kau nna, “ginding aga ningnan” ngu ai Karai a uphkang lam npu hta nga mayu ai masha ni hpe uphkang na re.

 Karai Mungdan a uphkang lam npu hta, masha ni gaw, makau grupyin hpe hkang zing na matu, dusat ni hte simsa let rau nga na matu sharin la na re.—Esaia 11:6-9.