MATUT MAJA NGA MU!
Hpyen Hprawng Hprawng—Masha Wan Hku Yukaring Kaw Na Hprawng
2022, February 24 hta Rasha gaw Yukaring hpe shang gasat ai. Dai majaw, masha wan hku gaw shoihpa nga nna, mungdan kaw na alawan hprawng na matu shakut ma ai. a
“Bawm kapaw ai. Grai hkrit kajawng ai hpe ga si hte pyi n chye tsun sai. Wan leng daru kaw hprawng shingbyi mai ai hpe anhte chye dat ai. Nga ma-nga tawn kau da ra ai. Htingpa langai hta sha, ra ai laili laika ni, tsi mawan ni, hka bu hte muk loi mi lawm mat ai. Bawm kapaw yang n hkra machyi hkra, nga ma-nga tawn kau da ra ai. Wan leng daru kaw sa shingbyi ra mat ai.”—Natalia, Yukaring Hakit Mare.
“Majan byin na ngu n shadu wa ai. Mare hta kapaw ai nsen na dat ai. Chyinghka ni ashun mat ai. Ra ai arung arai la nna ngai hprawng na matu dawdan kau ai. Jahpawt hkying 8 hta ngai nta kaw na pru wa ai. Wan leng jawn nna Lubru mare de sa ai. Dai kaw na mawdaw jawn nna Polan mungdan de sa ai.”—Nadija, Yukaring Hakit Mare.
Ndai sumhpa hta
Hpyen hprawng hprawng ai ni gara kaw myit mada lam tam mai na?
Hpyen hprawng hprawng ai ni hpe Chyum Laika gaw karum ya lu ai kun?
Hpa majaw hpyen hprawng hprawng ra ai?
Rasha hpyen dap gaw Yukaring hpe shang gasat ai majaw hpyen hprawng hprawng ra mat ai. Hpa majaw hpyen hprawng hprawng ra ai hpe grau nna chye na hkra, Chyum Laika gaw karum ya ai:
Shinggyim asuya ni gaw mung masha ni ra kadawn ai lam hpe n lu madi shadaw ya ai. Asuya ni gaw law malawng hku na masha ni hpe hkang na matu, n tara ai hku kanawn mazum na matu shanhte a ahkang aya hpe lang ma ai.—Hpaji Ningli 4:1; 8:9.
Nat Satan gaw, mungkan ga hpe uphkang nga ai. Nhkru ai lam ni hpe shi shingkang ka-up da ai hte seng nna, Chyum Laika hta ndai hku tsun da ai: “Mungkan ting gaw dai n hkru ai wa hta e lup mat wa ai.”—Yawhan 14:30; 1 Yawhan 5:19.
Shinggyim masha ni hta manghkang hkrum nga ai gaw, shaning tsa lam hku rai sai. Chyum Laika hta tau hkrau tsun da ai ndai zawn aten hta anhte asak hkrung nga ai: “Hpang jahtum na nhtoi ni hta e, yak la ai aten du na ra ai.” (2 Timohti 3:1) Ngut nna gaw, majan, shingra tara tsin-yam, hku hku ai, ana ahkya law ai lam ni byin na re. Masha ni mung tinang nta hpe kau da ra ai.—Luka 21:10, 11.
Hpyen hprawng hprawng ai ni gara kaw myit mada lam tam mai na?
Anhte a Hpan Madu Karai Kasang Yehowa b gaw, Hpyen hprawng hprawng ai ni hte tinang a dum nta hpe kau da ra ai ni hpe, tsawra nna matsan dum ai lam Chyum Laika hta tsun da ai. (Tara Jahprang 10:18) Karai Kasang a Mungdan ngu ai shi a sumsing asuya gaw, shinggyim asuya ni a shara hta malai shang nna, hpyen hprawng hprawng ra ai manghkang hpe hparan ya na ngu ga sadi jaw da ai. (Daniela 2:44; Mahte 6:10) Yehowa gaw shi a Mungdan hpe akyu jashawn nna Satan Nat hpe yeng seng kau na re. (Roma 16:20) Mungdan gaw mungkan ting hpe uphkang na re. Lamu ga jarit manghkang ni n nga hkra karum ya na re. Shinggyim masha yawng gaw, zinlum ai nta masha ni rai na re. Kadai mung nta hpe kau da ra sana n re. Chyum Laika hta ndai hku ga sadi jaw da ai: “Langai hte langai tinang a tsabyi ru hte, tinang a lakum hpun nhpang hkan e dung nga nna, shanhte hpe jahkrit shama na wa, kadai n nga ai: kaning rai nme law, Zaw nawng zaw wa up ai Yehowa a n-gup dai lam tsun nga ai.”—Mihka 4:4.
Hpyen hprawng hprawng ai manghkang n nga hkra, Karai a Mungdan sha galaw ya lu ai. Hpyen hprawng hprawng ra ai manghkang ni n nga hkra, Yehowa gaw Karai a Mungdan hpe akyu jashawn mat na re. Ga shadawn nkau hpe yu yu ga:
Majan. “Ga ting hta na hpyen majan [Yehowa] jasim kau wu ai.” (Shakawn 46:9) Manghkang ni hpe Yehowa gara hku hparan ya na hte seng nna chye na matu “Mungkan Simsa Lam Gara Hku Lu La Na Kun?” ngu ai sumhpa hpe hti yu u.
Zingri zingrat hte dip lu dip sha ai. ‘Zingri zingrat hte dip sha ai kaw na, [Yehowa] shanhte a asak hpe shaw la na.’ (Shakawn 72:14) Masha ni gaw n kaja ai myit jasat hpe gara hku galai shai lu ai hte seng nna chye na matu “N Ju N Dawng Ai Lam Hpe Awng Dang Lu” (Myen) ngu ai sumhpa hpe hti yu u.
Matsan ai. “Shaga nga ai matsan ai wa . . . hpe, shi mawai la na ra ai.” (Shakawn 72:12) Karai Kasang gaw, matsan ai lam hpe gara hku hparan ya na lam chye lu hkra, “Rap Ra Ai Hpaga Bungli Nga Na Kun?” (Myen) ngu ai sumhpa hpe hti yu u.
Lu sha taw ai. ‘Mungdan na bum ni a pungding du hkra, nai mam paw wa na.’ (Shakawn 72:16) Kadai mung kawsi hpang gara n hkrum hkra Karai Kasang galaw ya na lam chye lu hkra, “Kawsi Hpang Gara Ai Lam N Nga Ai Mungkan?” (English) ngu ai sumhpa hpe hti yu u.
Hpyen hprawng hprawng ai ni hpe Chyum Laika gaw karum ya lu ai kun?
Karum ya lu ai. Htawm hpang myit mada lam nga hkra karum ya lu ai hta n-ga, ya aten shanhte hkrum nga ai manghkang ni hte seng nna mung karum ya lu ai.
Chyum Laika npawt tara: “Nyan tang ai wa gaw na mana kam nga ai; Myit su ai wa chyawm gaw tinang sa wa ai lam gawn yu nga ai.”—Ga Shagawp 14:15.
Lachyum: Shoihpa byin chye ai masa lam ni hpe myit da na nga yang, tinang hkum tinang makawp maga lu na re. Nhkru ai masha ni gaw, mahkrum madup n nga ai ni, shimlum lam n lu ai ngu hkamsha nga ai shanhte a shara na hpyen hprawng ni hpe madung tawn chye ai hpe sadi yu u.
Chyum Laika npawt tara: “Lu sha hte hpun palawng lu nga ga yang gaw, anhte dai hte myit dik nga ga.”—1 Timohti 6:8.
Lachyum: Arung arai ni hpe myit maju hkum jung. Nga ai hte sha myit dik yang nang grau pyaw wa na re.
Chyum Laika npawt tara: “Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu.”—Mahte 7:12.
Lachyum: Myit galu nna tsawra myit nga u. Ndai atsam ningja ni nga yang, shara nnan hta nga ai ni a hkungga ai lam hte hkap la ai lam lu na matu grau loi wa na re.
Chyum Laika npawt tara: “N kaja ai a majaw, n kaja ai hku kadai hpe mung hkum tai mu.”—Roma 12:17.
Lachyum: N tara ai hku kanawn mazum hkrum ai shaloi, matai bai htang ai du hkra masin hkum pawt. Dai gaw masa lam hpe grau sha sawng wa shangun na re.
Chyum Laika npawt tara: “Ngai hpe n-gun lagaw shaja ya ai wa a majaw, lam shagu hpe ngai hkam lu nngai.”—Hpilipi 4:13.
Lachyum: Na a prat hta Karai Kasang hpe ahkyak shatai nna shi kaw akyu hpyi u. Manghkang ni hpe hparan lu na matu n-gun atsam shi jaw na re.
Chyum Laika npawt tara: “Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu. Shaloi chye chyang ai nyan yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai.”—Hpilipi 4:6, 7.
Lachyum: Gara zawn masa mi hkrum wa tim, myit simsa hkra karum ya na matu Karai Kasang kaw hpyi shawn u. “Hpilipi 4:6, 7—‘Hpa Lam Hta Mung Myit Hkum Ru Hkum Tsang Myit’” ngu ai sumhpa hpe hti u.
a Kapaw ai lam ni byin ngut ai hpang, ndai masa gaw, grai ahkyak ai masa hta du nga ai ngu UN Hpyen Hprawng Hte Seng Ai Tsaw Htum Ai Rung (UNHCR) tsun ai. 12 ya laman hta, hpyen hprawng wan 2 jan gaw, Yukaring a grup yin mungdan ni de hprawng mat ma ai. Kaga wan mi gaw, shanhte a dum nta ni hpe kau da nna, Yukaring a kaga shara ni de hprawng mat wa ai.
b Yehowa ngu ai gaw Karai Kasang a amying re. (Shakawn 83:17) “Yehowa Gaw Kadai Rai Kun?” ngu ai sumhpa hpe yu u.
You May Also Like
ESSENTIAL BIBLE TEACHINGS
Karai A Mungdan Ngu Ai Gaw Hpa Rai Ta?
Yesu a magam hta Karai Kasang a Mungdan a lam grau nna htawn tsun wa ai. Karai Kasang a Mungdan du wa na matu tsaban law law kaw nna masha ni akyu hpyi wa ma ai.
CHYUM LAIKA GA SAN NI A MAHTAI
Mungkan Ga Gaw Jahten Hkrum Na Kun?
Chyum Laika tsun ai hpe chye yang nang grai mau mat na re.
CHYUM LAIKA GA SAN NI A MAHTAI
Mungkan Simsa Lam Lu Na Matu Hpa Majaw Yak Nga Ai Kun?
Mungkan simsa lam lu na matu shinggyim masha ni shakut ai lam ni gaw ya du hkra awng dang lam n nga ai. Hpa majaw dai zawn byin ai lam amyu myu hpe yu yu ga.
CHYUM LAIKA SHARIN YA AI LAM NI
Chyum Laika Hkaja Lamang Hpe Chyam Yu U
Langai hpra san san Chyum Laika hkaja ai lamang hpe hpyi shawn u.
