“COVID-19 kap bra ana hte du hkra ladaw galai shai ai lam ni a majaw, mungkan ting hta lusha ra kadawn nga ai. Ya nga yang, Yukaring majan a majaw, mungkan ting lusha hku hku ai madang de du mat shangun ai” ngu ahkang aya kaba ai marai 75 jan tsun ai hpe, Mungkan Wunpawng Hpung Shimlum Kongsi (United Nations Security Council) gaw 2022, May 19 hta na lu ai. Bai nna, magazin langai (The Economist) hta mung “majan gaw mungkan hpe manghkang law law byin shangun ai sha n-ga, masha law law hpe lusha shakyet shangun ai” ngu tsun ai. Dai zawn lusha hku hku ai lam gaw, anhte a aten hta byin wa na ngu Chyum Laika hta tau hkrau tsun da ai. Raitim, dai hpe hparan na matu karum shingtau lam ni mung lajang da ya ai.

•    Yesu ndai hku myihtoi htoi da ai: “Amyu mi hte amyu mi, mung mi hte mung mi shada da gumlau hkat na ma ra ai: hku hku ai . . . byin wa na ra ai.”​—Mahte 24:7.

•    Shingran Laika hta, ga shadawn gumra jawn ai marai 4 a lam tsun da ai. Dai gumra jawn ai ni kaw na langai gaw, majan hpe malai tsun ai. Shi a hpang na gumra jawn ai wa gaw, hku hku ai hpe malai tsun ai. Lusha lu la na matu grai yak nna, lusha manu hpe mung manu mana jaw ra na aten hpe tsun ai re. “Shaloi ngai yu dat yang, gumra chyang langai mi nga nga ai. Dai hta jawn ai wa gaw, shi a lata hta joi langai mi lang da wu ai. . . . nsen langai mi hpe ngai na nngai. Dai nsen gaw, “Hkaulan n-gu bye mi hpe lani mi bungli galaw shabrai hku jaw ra ai; muk-yaw n-gu bye masum hpe lani mi a bungli galaw shabrai hku jaw ra ai.”​—Shingran 6:5, 6, JCLB.

 Hku hku ai hte seng ai Chyum Laika myihtoi ga ni gaw, “hpang jahtum na nhtoi ni” ngu Chyum Laika hta tsun da ai, dai ni aten hta hpring tsup taw nga ai. (2 Timohti 3:1) “Hpang jahtum na nhtoi ni” hte Shingran Laika hta lawm ai gumra jawn ai marai 4 a lam hpe grau chye lu hkra, Mungkan Gaw 1914 Kaw Na Galai Shai Nga Sai ngu ai video hpe yu u.“Gumra Jawn Ai Marai Mali​—Shanhte Gaw Kadai Ni Kun?” ngu ai sumhpa hpe hti u.

•    Lusha manu hpu wa ai (sh) lusha hku hku ai lam hte hpawn, yakhkak ai masa ni hpe hparan lu hkra, karum ya lu ai tatut re ai hpaji jaw ga ni Chyum Laika hta lawm ai. “Ja Gumhpraw Loi Mi Hte Asak Hkrung Lu Ai Lam” ngu ai sumhpa hta lawm ai ga shadawn nkau hpe yu yu u.

•    Chyum Laika hta, grau kaja ai masa ni byin wa na ngu ai myit mada lam anhte hpe jaw da ai. “Mungdan na bum ni a pungding du hkra, nai mam paw wa nna” masha yawng lusha hkru hkru kat kat sha lu na aten du wa na ngu ga sadi jaw da ai. (Shakawn 72:16) Htawm hpang hte seng ai Chyum Laika myit mada lam hte dai hpe hpa majaw kam mai ai lam hte seng nna grau chye lu hkra, “Jet Ai Htawm Hpang Myit Mada Lam” ngu ai sumhpa hpe hti yu u.