Denmak mungdan, Kopinhegin mare kaw nna deng 40 daram tsan ai shara hta nga ai Hobak mare na Yehowa Sakse ni a Skendinebia ginjaw garan rung kaw 2019, July hta Chyum Laika madun gawk nnan hpe hpaw wa ai. Madun gawk a madung lam gaw “Skendinebia hta Karai Kasang a amying nsang hte Chyum Laika” ngu ai lam re.

Madun gawk hta grai taw nna laklai ai moi na Chyum Laika ni hpe Denmak amyu ga, Hparo amyu ga, Gringlan amyu ga, Aislan amyu ga, Nawwe amyu ga, Sami amyu ga, Swidin amyu ga ni hte madun da ya ai. Dai shara hta Chyum Laika 50 jan hpe madun da ai.

Laklai htum langai gaw, 1541 hta shawng nna shapraw ai Gusta Basa Chyum Laika re. Skendinebia hta nga ai amyu ga yawng hta na, dai Chyum Laika gaw hkum hkra lawm ai shawng nnan na Chyum Laika re. Gusta Basa Chyum Laika gaw Swidin amyu ga a gayan hte gasi ni a matu tsang madang byin wa ai. Dai Chyum Laika gaw hpang shaning 300 du hkra, kaga Swidin amyu ga Chyum Laika a matu madung tsang madang rai wa ai.

1550 na Hkristan III Chyum Laika gaw madun da ai ni kaw na grai taw ai kaga madung Chyum Laika re. Dai gaw Denmak hta shawng nnan na hkum hkra lawm ai Chyum Laika re. Hkristan III Chyum Laika gaw Denmak amyu ga a matu tsang madang langai hku nna karum ya wa nna, Urawpa a dingdung maga na dam lada la ai shara hta akyu grai shabyin ya wa ai.

Skendinebia ginjaw garan rung na Erik Jogensen ndai hku tsun ai: “Ndai Chyum Laika madun gawk nnan gaw, Skendinebia hta tsaban shaning ni laman Karai a Mungga hte shi a hkik hkam ai amying Yehowa hpe grai hkungga lara ai lam byin shangun ai.”