Perit kaw nna deng 62 daram tsan ai shara hta nga ai Lubia mare kaw na Yehowa Sakse ni a Pyintit ginjaw garan rung hta Chyum Laika madun gawk langai hpe 2019, July 25 ya shani hta hpaw wa ai. Madun gawk a madung lam gaw, “Pyintit hta Karai Kasang a amying nsang hte Chyum Laika” ngu ai lam re.

Madun gawk hta grai taw nna ahkyak ai Pyintit amyu ga Chyum Laika ni hpe madun da ai. Laklai htum Chyum Laika langai gaw, “La Baibe Di Saria” ngu nna mung masha ni chye da ai 1539 hta shapraw da ai Oliwantan Pyintit Chyum Laika re. Oliwantan Chyum Laika gaw, Pyintit Chyum Laika ni hta Protetstin ni ga gale da ai shawng nnan na Chyum Laika re. Chyum Laika madung amyu ga ni kaw nna, Pyintit amyu ga hku ga gale da ai shawng nnan na Chyum Laika mung re. Dai Chyum Laika gaw, 1537 hta shapraw da ai Inglik Mahte Chyum Laika, Inglik Geneva Chyum Laika hte Pyintit Geneva Chyum Laika ni hte hpawn, hpang de bai shapraw ai Chyum Laika ni hpe mung, grai madi shadaw ya ai. Madun da ai kaga madung Chyum Laika ni hta, 1541 hta shapraw ai 3 lang ngu na Zet Lahpe Deda Pyintit Chyum Laika, 1541 hta shapraw ai Latin Pintachyut hte Perit kaw na laika dip shapraw ai wa Robat Etiyan dip shapraw ai 1545 ning na Latin Chyum Laika hte Laiyun mare kaw na laika dip shapraw ai wa Yan Di Duyan dip shapraw ai 1557 Pyintit Chyum Laika ni lawm ai.

Oliwantan, Latin Pintachyut, Etiyan a Latin Chyum Laika hte Yan Di Duyan Chyum Laika yawng hta Karai Kasang a amying Yehowa lawm ai. Dai Chyum Laika ni gaw New York, Warwick hta na mungkan ginjaw rung hta nga ai madun gawk hta alu jaw da ai Chyum Laika ni re. Dai Chyum Laika ni hpe Pyintit ginjaw garan rung hta mahkawng da ai Chyum Laika ni hte arau madun wa ai.

Madun gawk dap kaw na Eriki Hpawt ndai hku tsun ai: “Pyintit ginjaw garan rung hta nga ai Chyum Laika madun gawk gaw myit lawm hpa Pyintit Chyum Laika labau ni hpe madun dan ai. Chyum Laika hta Karai Kasang a amying Yehowa lawm ai ngu ai hpe mung madun dan ai. Mungkan ting na madun gawk ni hta madun na matu, grai taw nna myit lawm hpa Chyum Laika ni hpe anhte matut nna tam nga ga ai.”