Shadu ai lam: Yehowa Sakse Ni gaw, Hkristan n re ai majaw Easter poi n-galaw ai re.

 Teng man ai lam: Yesu Hkristu gaw, anhte a matu Hkye Hkrang La Ai Madu re ngu anhte kam ai. Yesu a “hkang hta hkan nang lu” na matu, dang lu ai daram anhte shakut ai.​—1 Petru 2:21; Luka 2:11.

 Shadu ai lam: Yesu si ai kaw na bai hkrung ai ngu, Yehowa Sakse Ni n kam ai.

 Teng man ai lam: Yesu bai hkrung rawt ai hpe anhte kam ai. Dai gaw, hkristan makam masham a matu, madung lam langai re ngu hkap la nna, hkaw tsun bungli hta mung, ahkyak shatai nna tsun dan ga ai.​—1 Korinhtu 15:3, 4, 12-15.

 Shadu ai lam: Sakse hpung na ma ni, Easter poi kaw na ngwi pyaw lam n hkam sha nga ai hpe shanhte a kanu kawa ni hpa zawn n nawn ma ai.

 Teng man ai lam: Anhte a ma ni hpe anhte grai tsawra ga ai. Shanhte hpe shaman shakyang ya na hte ngwi pyaw lam lu na matu, dang lu ai daram shakut ga ai.​—Titu 2:4.

•   Easter poi gaw, Chyum Laika hta madung da ai poi n re.

•   Yesu gaw bai hkrung rawt ai nhtoi hpe n re ai sha, shi si ai nhtoi hpe myit dum na matu tsun da ai. Anhte ni gaw shaning shagu, Chyum Laika a shata hti laika hte maren, Yesu si ai hpe myit dum poi galaw ai.​—Luka 22:19, 20.

•   Easter poi htung lai ni gaw, moi prat na myu nli kaja ai hte seng ai nawku htung ni kaw na yu hkrat wa ai. Dai majaw, Karai Kasang hkap la na n re ngu anhte kam ai. Karai Kasang gaw, “shi hpe hkrai daw jau” na matu anhte hpe hpyi shawn da ai. Shi n ra ai htung lai ni lawm ai nawku lam hpe nhkap la ai.​—Luka 4:8; 1 Hkawhkam 18:21.

 Easter poi n-galaw na matu daw dan ai gaw, Chyum Laika hta madung la da ai ngu anhte kam ai. Masha a htung lai ni hpe hkan na malai, “hpaji madung hte chye ginghka ai myit rawng” na matu Chyum Laika hta tsun da ai. (Ga Shagawp 3:21; Mahte 15:3) Easter poi hte seng nna kaga masha ni san wa yang, anhte a kam sham lam hpe tsun dan ai. Raitim, Easter poi galaw na matu, kaga masha ni lata la ai hpe, n-gawn nsawn n di ai.​—1 Petru 3:15.