Yehowa Sakse ni gaw Chyum Laika hkaja ai shaloi, ga gale Chyum amyu myu hpe akyu jashawn ai. Raitim, Mungkan Nnan Ga Gale Chyum Laika hpe tinang a amyu ga hte nga yang gaw, dai hpe grau ra sharawng ai. Hpa majaw nga yang, dai Chyum Laika hta Karai Kasang a amying hpe bang da ai, tup hkrak jaw ai majaw re. Asan sha chye na loi ai.

•   Karai Kasang a amying hpe bang da ai. Chyum Laika hpe dip shapraw ai masha nkau gaw, Chyum Laika a Madu hpe n shagrau ma ai. Ga shadawn, ga gale Chyum langai hta dai ga gale Chyum Laika paw pru wa na matu madi shadaw ya ai marai 70 a amying jahpan hpe madun da ai. Raitim, Chyum Laika a Madu re ai Yehowa Karai Kasang a amying hpe gaw, dai ga gale Chyum Laika hta n ka bang da ai.

   Mungkan Nnan Ga Gale Chyum Laika chyawm gaw madung Chyum Laika kaw Karai Kasang a amying lawm ai shara hta bang da ya ai. Dai majaw, dai ga gale Chyum kaw Karai Kasang a amying hkying hku lawm ai. Raitim, dip shapraw ai ni a amying hpe gaw dai ga gale Chyum hta n bang da ai.

•   Tup hkrak jaw ai lam. Ga gale Chyum Laika yawng gaw, madung Chyum Laika hta lawm ai hku tup hkrak ga n gale ya ma ai. Ga shadawn, ga gale Chyum Laika langai hta, Mahte 7:​13 hpe ndai hku ga gale da ai: “Dai gyip ai chyinghka hku shang mu, hpa majaw nga yang, ngarai mung de hkrang ai chyinghka lam gaw dam lada rai nna loi nga ai majaw dai hta shang mat wa ai ni law la ma ai.” Raitim, “ngarai” ngu shanhte ka da ai shara hta, madung Chyum Laika hta gaw “hten bya” ngu ai ga si hpe lang da ai. Hpa majaw nga yang, ga gale ai ni gaw, n hkru n kaja ai masha ni hpe ngarai wan hta htani htana zingri hkrum ai ngu kamsham ai majaw re. Raitim, dai ningmu gaw Chyum Laika tsun ai hku n re ai. Mungkan Nnan Ga Gale Chyum Laika hta gaw, ndai hku tup hkrak ga gale da ai: “Dai gyip ai chyinghka hku shang mu, hpa majaw nga yang, hten bya ai de hkrang ai chyinghka lam gaw dam lada rai nna loi nga ai majaw, dai hta shang mat wa ai ni law la ma ai.”

•   Asan sha chye na ai. Kaja ai ga gale Chyum ngu ai gaw, tup hkrak jaw ai sha n-ga, asan sha mung chye na ra ai. Ndai ga shadawn hpe yu yu u. Ga si hku lachyum la yang “wenyi prut nga mu” ngu lachyum nga ai ga yan hpe Roma 12:11 hta kasa Pawlu ka wa ai. Dai ga yan hpe ding tawk ga gale yang, n chye na ai majaw Mungkan Nnan Ga Gale Chyum Laika hta “wenyi hta myit rawt nga mu” nga nna chye na loi hkra ga gale da ya ai.

 Mungkan Nnan Ga Gale Chyum Laika gaw, Karai Kasang a amying hpe lang ai, tup hkrak jaw ai, asan sha chye na loi ai sha n-ga, laklai ai lam langai naw nga ai. Manu jahpu n jaw ra ai sha garan jaw ya ai. Dai majaw, gumhpraw n lu ai ni hte hpawn, wan hku law ai masha ni gaw, tinang a amyu ga hku Chyum Laika hpe lu hti nga ma ai.