Anhte a makam masham hpe Chyum Laika hta sha madung tawn ai. Dai majaw, Chyum Laika hpe grau chye na wa ai shaloi, anhte kam sham da ai lam nkau hpe sharai na matu mung ra wa ai. a

 Dai hku galai shai ai gaw “ding hpring ai ni a lam chyawm gaw, jahpawt nhtoi hte bung nga ai; Dai gaw nhtoi leng hkra ahtoi ahkung wa nga ai” nga nna Ga Shakawp 4:18 hta lawm ai Chyum Laika npawt tara hte hkrak sha re. Jan law wa ai shaloi makau grupyin hpe dan dan leng leng mu wa ai zawn, Karai Kasang mung shi masat da ai aten hta, Chyum Laika teng man lam ni hpe grau chye na wa hkra galaw ya ai. (1 Petru 1:10-12) Chyum Laika hta tau hkrau myihtoi da ai hte maren “amu htum ai aten” laman hta, grau nna chye na wa hkra, Karai Kasang galaw nga ai.​—Daniela 12:4.

 Dai hku sharai ai lam ni galaw ai gaw mau na lam, myit shuk na lam n re. Moi aten na Karai Kasang hpe nawku ai ni gaw shut ai hku sawn la ai lam, myit mada ai lam ni nga wa nna, shanhte a ningmu hpe sharai na matu ra wa ai lam ni nga ga ai.

•  ● Mawshe gaw Karai Kasang masat da ai aten garai ndu shi ai shaning 40 jau nna, Israela ni hpe hkye la na wa hku nna, shi hkum shi sawn la wa ai.​—Kasa 7:23-25, 30, 35.

•  ● Kasa ni mung Meshia si ai lam hte bai hkrung rawt ai lam hte seng nna tau hkrau myihtoi da ai lam ni hpe n chye na wa ai.​—Esaia 53:8-12; Mahte 16:21-23.

•  ● Moi prat na Hkristan nkau mi mung “Madu a shani” du wa na aten hte seng nna, shut ai hku sawn la wa ma ai.​—2 Htesaloni 2:1, 2.

 Karai Kasang gaw shanhte chye na shut ai lam ni hpe sharai ya wa ai. Dai zawn sha, matut nna galaw ya na matu anhte akyu hpyi ai.​—Yaku 1:5.