Makoi mayang poi hte seng ai anhte a mu mada lam gaw Chyum Laika hta madung tawn ai. Nkau mi hpe lawu kaw madun da ai:

•   Tinang tsawra ai marai langai ngai si mat yang yawn hkyen ma ai. Yesu a sape ni mung shanhte tsawra ai masha ni si mat ai shaloi yawn hkyen ma ai. (Yawhan 11:33-35, 38; Kasa 8:2; 9:39) Raitim, dai shaloi garu gaji marawn nna poi galaw ai aten ngu n myit la ai. (Hpaji Ningli 3:1, 4; 7:1-4) Dai hku galaw na malai myit tau ya ai lam madun ra ai aten ngu nna mu mada ai.​—Roma 12:15.

•   Si Mat Ai Masha Gaw Hpa Mung N Chye Sai. Yehowa Sakse ni gaw amyu, htunghking, shing du labau gara hku nga tim, si mat ai masha ni gaw shara ra kaw asak hkrung nga nna masha ni ntsa shingkang ka-up lu ai ngu ai Chyum Laika hta n lawm ai htung ni hpe koi yen ma ai. (Hpaji 9:5, 6, 10) Dai htung ni hta, masha si ai nta kaw shana tup n yup ai sha sa sin ai, makoi mayang lamang hte myit dum poi hpe grai hkik hkam ai hku galaw ai, si mat ai wa a matu hkungga nawng ya ai, si ai masha hte matut mahkai ai, si ai masha a matu akyu hpyi ya ai, gaida shing nrai shingkra hku nna ngam nga ai ningrum ningtau galaw ra ai htung ni lawm ai. Chyum Laika hta “Kaga lak lak rai wa mu, . . . Awu asin re ai hpe hkum hkra mu” nga nna tsun da ai. Dai ga hpe madat ai hku nna Yehowa Sakse ni gaw dai zawn htung ni hpe koi yen ma ai.​— 2 Korinhtu 6:17.

•   Si Mat Ai Masha Ni A Matu Myit Mada Lam Nga Ai. Kade n na yang, si mat ai ni bai hkrung rawt wa nna si hkrung si htan mung n nga ai aten du wa sana nga nna Chyum Laika hta tsun da ai. (Kasa 24:15; Shingran 2:14) Shawng nnan na Hkristan ni gaw dai myit mada lam nga ai majaw, ladu lai yawn hkyen ai lam n byin wa ai. Anhte mung dai myit mada lam nga ai majaw ladu lai yawn hkyen ai lam n nga ai.​—1 Htesaloni 4:13.

•   Masha Ni Yu Kaba Hkra N Galaw Na Matu Chyum Laika Hta Tsun Da Ai. (Ga Shagawp 11:2) Makoi mayang poi gaw kade daram arawng nga ai, lusu ai hpe shakawng na aten n re. (1 Yawhan 2:16) Makoi mayang poi kaw masha ni yu kaba hkra shangwi shapyaw ai, grai manu hpu ai da-u ni hpe lang ai, ladu lai bu hpun mawn sumli ai lam ni anhte n galaw ga ai.

•   Makoi mayang poi hte seng nna anhte hkap la ai lam hpe kaga ni mung hkap la ra na nga nna anhte atik anang n galaw ga ai. Ndai lam hta: “Anhte langai hte langai, tinang dai tinang lam a jahpan, Karai Kasang kaw dan na ra ga ai” ngu ai Chyum Laika lam matsun hpe hkan sa ga ai. (Roma 14:12) Raitim, ahkaw ahkang lu na nga yang gaw, anhte a makam masham hpe “sumnung ai hte hkrit kamyin ai myit” hte shakut nna sanglang dan ai.​—1 Petru 3:15.

 Shara: Makoi mayang poi hpe Yehowa Sakse ni a Nawku Htingnu, nta, makoi mayang galaw ai shara, lup wa kawng zawn re ai gara shara hta raitim, gara kaw galaw na hpe ngam nga ai nta masha ni sha dawdan ai.

 Makoi mayang Lamang: Si hkrung si htang hte bai hkrung rawt na hte seng ai Chyum Laika tara hpe madung nna ngam nga ai nta masha ni hpe shalan ya ai mungga htawn ya ai. (Yawhan 11:25; Roma 5:12; 2 Petru 3:13) Mungga htawn ai shaloi si mat ai masha a kaja ai atsam ningja ni hpe tsun dan ai. N-gun lu shangun ai shi a sadi dung ai lam ni lawm na re.​—2 Samuela 1:17-27.

 Chyum Daw ni hpe madung da ai mahkawn langai hpe mahkawn mai ai. (Kolose 3:16) Makoi mayang lamang hpe shalan shabran ya ai akyu hpyi ga hte hpungdim dat ai.​—Hpilipi 4:6, 7.

 Alu gumhpraw: Makoi mayang poi sha n ga, gara nawku lamang hta rai tim, alu hta ai lam n nga ai. Anhte a zuphpawng ni hta mung alu hta ai lam n nga ai.​—Mahte 10:8.

 Sa du shang lawm ai lam: Nawku Htingnu hta galaw ai makoi mayang lamang hpe Yehowa Sakse n re ai ni mung sa du shang lawm mai ai. Anhte a zuphpawng ni zawn sha, makoi mayang lamang hpe masha yawng sa lung mai ai.

 Sakse Hkam langai hpra gaw Chyum Laika hpe madung da nna shaman da ai myit nsam hte tinang nan dawdan ra ai. (1 Timohti 1:19) Raitim, Chyum Laika hte n htan shai ai hku nawku nna galaw ai lamang ni hta gaw n lawm ma ai.​—2 Korinhtu 6:14-17.