N teng n man ai hku tsun ai ga, jahpoi asawng ai ga ni hpe bai hkum htang mu ngu ai Chyum Laika hpaji jaw ga hpe Yehowa Sakse ni hkan sa ma ai. Ga shadawn, Chyum Laika hta ndai hku tsun da ai: ‘n kaw n law re ai wa hpe shadum shahprang ai wa, aroi arip hkrum sha na.’ (Ga Shagawp 9:7, 8; 26:4) N teng n man ai hku mara shagun ai ni a majaw ga law hkat taw na malai, Karai Kasang myit ra ai hpe sha galaw na matu, anhte myit maju jung ma ai.​—Shakawn 119:69.

 Raitim, ‘atsin sha nga ai aten hte, ga tsun na aten nga ai’ nga nna Chyum Laika hta tsun da ai. (Hpaji 3:7) Dai majaw, myit madung hte teng man ai tara lam chye mayu ai ni hpe gaw anhte ni tsun dan ga ai. Raitim, majoi ga law hkat na lam hpe gaw anhte ni koi gam ga ai. Anhte gaw Yesu hte tsa ban langai na Hkristan ni a sharin achyin ai kasi ningli hpe hkan sa ai.

•   Yesu gaw munggyi Pilat a man hta n teng n man ai hku tsun hkrum ai shaloi, ga hkaw mi mung bai n tsun wa ai. (Mahte 27:11-14; 1 Petru 2:21-23) Dai zawn sha, shi hpe lu lai sha lai ai wa nga nna n teng n man ai hku tsun ai shaloi mung hpa n tsun wa ai. “Hpaji byeng-ya chyawm gaw, shi a amu bungli hta awlaw ai hkrum nga ai” ngu ai hte maren, Yesu gaw galaw hkawm sa ai lam hku nna, masha ni tsun ai ga re ai n re ai hpe sakse madun wa ai. (Mahte 11:19) Raitim, masa hku hkan nna ra wa yang gaw, n teng n man ai hku tsun nga ai ni hpe nden marai rawng let gwi gwi bai tsun shaga ai.​—Mahte 15:1-3; Marku 3:22-30.

   Yesu gaw shi hpang hkan ai ni hpe n teng n man ai hku mara shagun hkrum yang, myit n daw na matu sharin ya wa ai. Shi ndai hku tsun ai: “Nye a lam majaw, masha ni gaw nanhte hpe asawng asang di nna zingri zingrat nga ma ai hte, masu ai hku hkan let mara amyu myu shagun da myit dai shaloi e, nanhte a lu myit dai.” (Mahte 5:11, 12) Dai hku mara shagun hkrum ai majaw, sakse hkam na matu ahkaw ahkang lu wa yang, “nanhte a gumlau maga na ni nlang, n hkap htang lu hkra, ngai nanhte hpe n-gup ga hte hpaji jaw na made ai” nga nna mung Yesu ga sadi jaw wa ai.​—Luka 21:12-15.

•   Kasa Pawlu gaw, anhte hpe ninghkap ai ni tsun ai “akyu n rawng ai hte kaman lila sha rai nga ai” ga ni a majaw, akyu n nga ai ga law hkat ai lam hpe koi na matu n-gun jaw wa ai.​—Titu 3:9; Roma 16:17, 18.

•   Kasa Petru gaw makam masham hpe dang di lu ai daram makawp maga na matu, Hkristan ni hpe n-gun jaw ai. (1 Petru 3:15) N-gup ga hta na galaw hkawm sa ai lam gaw grau nna akyu nga ai hpe shi chye ai. Dai majaw, “kaja ai bungli shachyen let, myit n gring ai ni a n chye n chyang ai ga hpe nanhte jasim lu na” nga nna shi ka wa ai.​—1 Petru 2:12-15.