Tsa ban langai kaw na Hkristan ni a kasi ningli hpe hkan nna, Yehowa Sakse ni gaw sara ni hte hpung masha ni hku nna garan ginhka da ai lam n nga ai. Hkalup hkam da ai Sakse Hkam yawng gaw hpung magam gun ni rai nna, hkaw tsun magam hte sharin achyin ai lam ni hta arau shang lawm nga ga ai. Sakse Hkam 100 daram nga yang, hpung langai hku nna hpawng de ya ai. Hpung shagu hta chyoi pra ai wenyi hte aya tang da ai kung hpan ai la ni gaw “Hpung salang” shing nrai myitsu salang ni hku nna magam gun ma ai. (Titu 1:5) Shanhte ni gaw manu jahpu n la ai sha magam gun ya ai.