Yehowa Sakse Ni gaw, shangai poi n galaw ai. Hpa majaw nga yang, dai zawn poi galaw ai hpe Karai Kasang n ra ai ngu kam sham ai majaw re. Chyum Liaka hta, shangai poi n galaw na matu, tup hkrak matsun da ai lam n nga ai. Raitim, Karai Kasang a ningmu hpe chye na na matu, Chyum laika gaw karum ya ai. Ndai lam mali hte Chyum ga matsun ni, gara hku matut mahkai ai lam hti yu ga.

1.   Shangai poi gaw shut ai nawku htung na sa wa ai. Masha langai a shangai nhtoi hta, “nat ni hte n hkru ai wenyi ni gaw shi hpe dingbai dingna jaw chye ai. Manang ni a akyu hpyi ga ni gaw, shi hpe makawp maga ya lu ai” ngu kam sham ai majaw shangai poi galaw ai re ngu, Funk & Wagnalls Standard Dictionary of Folklore, Mythology, and Legend, laika buk hta madun da ai. Moi na shangai poi ni hta, “gumhpan hpaji gaw, masha langai a hpang byin na hpe sawn maram na matu ahkyak ai. Moi na htung hku nga yang, shangai poi hta shatu ai wan shadaw ni gaw, akyu hpyi ga ni hpe laklai ai hku nna hpring tsup ya ai” ngu The Lore of Birthdays laika buk hta mung, tsun da ai.

    Raitim, mandan hpaji, shaba wawt hpaji, minla hte shaga ai “shing rai galaw” ai hpe Chyum Laika hta asawng jahpoi da ai. (Tara Jahprang 18:14; Galati 5:19-21) Moi na Babelon masha ni hpe, Karai Kasang ari jaw ai lam langai gaw, shaba wawt ai majaw re. (Esaia 47:11-15) Yehowa Sakse Ni gaw, htung hking ni a n pawt hpe, ahkri ahkrai sawk sagawn ai baw gaw n galaw ai. Raitim, Chyum Laika hta asan sha tsun ai ga ni hpe gaw hkan sa ai.

2.   Moi na Hkristan ni gaw shangai poi n galaw ai. “Shangai poi galaw ai gaw, shut ai htung kaw na sa ai ngu, moi na Hkristan ni hkam la ai” lam World Book Encyclopedia laika buk hta tsun da ai. Yesu nan sharin ya wa ai, kasa ni hte sape ni gaw, dai ni Hkristan ni yawng, hkan sa na kasi hpe madun wa ai lam Chyum Laika hta mu lu ai.​—2 Htesaloni 3:6.

3.   Hkristan ni galaw ra na poi langai gaw, Yesu si ai myit dum poi rai nna, shangai poi n re. (Luka 22:17-20) Yesu a myit dum poi hpe galaw ai gaw, mauhpa n re. Hpa majaw nga yang, “si ninghtoi gaw, shangai wa ai nhtoi hta grau kaja nga ai” ngu Chyum Laika hta tsun da ai. (Hpaji Ningli 7:1) Yesu si ai aten hta, Karai Kasang man hta mying kaja lu wa ai. Dai majaw, Yesu si ai nhtoi gaw, shangai nhtoi hta grau ahkyak wa ai.​—Hebre 1:4.

4.   Karai Kasang a mayam ni shangai poi galaw ai hpe Chyum Laika hta n mu ai. Chyum Laika hta, shangai poi a lam tsun na matu malap kau ai kun? N re ai. Hpa majaw nga yang, Karai hpe n nawku ai masha lahkawng a shangai poi galaw ai lam tsun da ai. Raitim, dai poi lahkawng hta n kaja ai lam ni byin wa ai.​—Ningpawt 40:20-22; Marku 6:21-29.

 Kaja ai kanu kawa ni zawn, Sakse ni mung shanhte a kasha ni hpe tsawra ai lam shaning tup madun ai. Dai hta shanhte hpe, kumhpa mari ya ai, rau kanawn mazum ai ni lawm ai. Shinggyim masha a ra rawng ai ni hpe, tinang a myit hte galaw ya ai Karai a kaja ai kasi hpe, Sakse Ni shakut hkan sa nga ai. (Mahte 7:11) Dai majaw, Sakse Ni a kasha ni gaw, lama ma sum ai ngu, n hkam sha ai hpe n dai ga ni kaw nna chye lu ai.

•   “N myit mada ai aten hta kumhpa langai lu ai shaloi, grai pyaw ai.”​—Asak 12 ning, Tammy.

•   “Shangai nhtoi hta kumhpa n lu tim, nu yan wa gaw, kaga aten hta mari ya ai. N myit mada ai sha, kumhpa lu ai hpe ngai ra ai.”​—Asak 11 ning, Gregory.

•   “Kik-muk lahkawng masum hte mahkawn langai mahkawn, minit 10 daram hte parti galaw lu na kun? Kaja wa pyaw ai parti ngu ai gaw, gara hku re ai hpe chye mayu yang, anhte nta sa yu rit le.”​—Asak 6 ning, Eric.