Yehowa Sakse Ni gaw, tsin-yam tsindam hkrum ai ni hpe karum ya ai. Anhte gaw, Yehowa Sakse Ni hpe sha n ga, kaga masha ni hpe mung, ndai Chyum Laika matsun hte maren, tatut karum ya ai. “Dai re ai majaw, aten ladaw naw pra nga yang, anhte masha nlang hte hpe mai kaja ai amu galaw nga ga, rai ti mung, makam masham a dinghku na ni hpe, grau nna galaw nga ga.” (Galati 6:10) Tsin-yam hkrum nga ai ni, grai ra kadawn nga ai myit n-gun sha n ga, nawku daw jaw ai hte seng ai lam ni hpe mung karum ya ai.​—2 Korinhtu 1:3, 4.

 Tsin-yam hkrum ai buga na hpung salang ni gaw, nawku hpung hta nga ai ni yawng, shim lum lam nga n nga, shanhte ra kadawn nga ai ni hpe chye na matu, matut mahkai ai. Ngut jang, salang ni gaw chye lu ai shiga hte, galaw nga ai hkye mawai lam ni hpe Yehowa Sakse Ni a ginjaw garan rung de shana ai.

 Dai buga na nawku hpung ni gaw, ra kadawn nga ai ni hpe, n lu karum ai nga yang, Yehowa Sakse Ni a Uphkang Hpung gaw ra ai ni hpe lajang ya ai. Ndai lamang gaw, tsa ban langai na Hkristan ni hku hku ai ten hta, shada da karum shingtau ai lamang hte bung ai. (1 Korinhtu 16:1-4) Hkye mawai bungli hpe hparan na matu, dai mungdan a ginjaw garan rung gaw, Hkye Mawai Komiti hpe lajang ya ai. Kaga buga hta nga ai Yehowa Sakse Ni mung, shanhte a aten hte arung arai ni hpe jailang nna, tsawra myit hte karum ya ma ai.​—Ga Shagawp 17:17.

 Yehowa Sakse Ni a ginjaw garan rung de jaw ai alu ni hpe, kaga lam ni sha n ga, hkye mawai lamang a matu mung jailang ai. (Kasa 11:27-30; 2 Korinhtu 8:13-15) Hkye mawai bungli hpe, shabrai n jaw ra ai shawang myit hte magam gun ai ni nga ai majaw, alu ni hpe hkye mawai lamang hta sha, jailang ai. Alu gumhpraw ni hpe, akyu nga hkra jailang ai.​—2 Korinhtu 8:20.