Re ai. Lawu kaw tsun da ai lam ni a majaw anhte ni gaw Hkristan ni rai ga ai:

•   Yesu Hkristu a sharin achyin ya ai lam ni hte kasi ningli hpe anhte shakut nna hkan sa ga ai.​—1 Petru 2:21.

•   “Anhte hkye hkrang la kaw du lu na matu, sumsing lamu a npu, shinggyim masha ni hta jaw ya ai amying ningsang shaje, kanang mung n nga sai” ngu ai hte maren, Yesu hku nna sha hkye hkrang la hkrum na hpe anhte kamsham ga ai.​—Kasa 4:12.

•   Yehowa Sakse byin wa ai masha ni gaw, Yesu a amying hta hkalup hkam la ma ai.​—Mahte 28:18, 19.

•   Yesu a amying hpe gang nna anhte akyu hpyi ai.​—Yawhan 15:16.

•   Yesu gaw masha yawng hpe uphkang na matu, ahkaw ahkang nga ai wa, woi awn ai Baw re ngu nna anhte kamsham ai.​—1 Korinhtu 11:3.

 Raitim, kaga Hkristan nawku hpung ni hte n bung ai lam ni gaw nga ai. Ga shadawn, Yesu gaw masum raitim langai Karai (Trinity) hta na adaw achyen n re ai sha, Karai Kasang a Kasha re ai lam Chyum Laika hta tsun da ai hte maren anhte kam ga ai. (Marku 12:29) Masha si yang wenyi n si ai ngu ai hpe anhte n kam ai. Karai Kasang gaw masha hpe ngarai hta htani htana zinri ai hpe mung n kam ai. Nawku htung lamang ni hta woi awn nga ai ni gaw, kaga masha ni hta grau na matu janmau ni lu da ra ai hpe mung anhte n hkap la ai.​—Hpaji 9:5; Ezekela 18:4; Mahte 23:8-10.