Yehowa Sakse ni re ai anhte ni gaw, Hkristan prat hkrun lam hpe shakut nna hkan sa nga ga ai. Gara hku asak hkrung ra na hte seng ai lam Yesu sharin ya wa nna, shi a sape ni mung tatut hkan sa wa ai. Ndai sumhpa hta anhte madung kamsham ai lam ni hpe, kadun dawk sanglang da ya ai.

1.   Karai Kasang. Anhte ni gaw Yehowa Karai Kasang hpe nawku ai. Shi chyu sha teng man nna Chyahtum Chyalai N-gun Rawng Ai Hpan Madu Karai Kasang re. (Shakawn 83:17; Shingran 4:11) Shi gaw Abraham, Mawshe hte Yesu ni a Karai Kasang rai nga ai.​—Pru Mat 3:6; 32:11; Yawhan 20:17.

2.   Chyum Laika. Chyum Laika gaw, shinggyim masha ni hpe Karai Kasang jaw ai shiga re ai lam anhte hkap la ga ai. (Yawhan 17:17; 2 Timohti 3:17) Anhte a makam masham hpe “Ga Shaka Dingsa” hta sha n-ga, “Ga Shaka Ningnan” hta mung madung tawn ai. Laika 66 lawm ai Chyum Laika buk ting hpe anhte hkap la ai. Nawku htung hte seng ai hpaji du Sara Jason D BeDuhn ndai hku tsun ai: Yehowa Sakse ni a “makam masham hte galaw hkawm sa ai lam ni gaw, Chyum Laika hta sha madung tawn ma ai. Chyum Laika hta hpa lam ni lawm ging ai nga nna daw dan ai lam n nga ai.” a

    Anhte ni gaw Chyum Laika buk ting hpe hkap la tim, ga si hpe dingtawk lachyum hpaw kamsham ai ni (fundamentalists) chyawm gaw n re. Chyum Laika kaw na Chyum daw nkau mi hpe ga shadawn hku nna ka da ai majaw, dingtawk lachyum n mai la ai ngu anhte hkam la ai.​—Shingran 1:1.

3.   Yesu. Yesu a kasi ningli hte shi sharin achyin ya ai hpe anhte ni hkan sa ai. Shi gaw Karai Kasang A Kasha rai nna, anhte a Hkye La Madu re ai lam hkap la nna shi hpe shagrau ga ai. (Mahte 20:28; Kasa 5:31) Dai majaw, anhte ni gaw Hkristan ni re. (Kasa 11:26) Chyum Laika kaw nna anhte chye lu ai gaw Chyahtum Chyalai N-gun Rawng Ai Karai Kasang gaw Yesu n re. Masum Raitim Langai Karai (Trinity) ngu ai lam hpe Chyum Laika hta madi shadaw da ai lam n nga ai.​—Yawhan 14:28.

4.   Karai Kasang A Mungdan. Ndai mungdan gaw, sumsing lamu kaw teng sha nga ai asuya langai re. Hkristan ni a myit masin hta byin nga ai masa n re. Dai mungdan gaw masha asuya ni a shara hta malai shang nna, ginding aga hte seng ai Karai Kasang a yaw shada lam ni hpe hpring tsup hkra galaw ya na re. (Daniela 2:44; Mahte 6:9, 10) “Hpang jahtum na nhtoi” hta anhte asak hkrung nga ai hpe Chyum Laika myihtoi ga ni gaw madun dan nga ai majaw, kade nna yang dai lam byin wa sana re.​—2 Timohti 3:1-5; Mahte 24:3-14.

    Yesu gaw sumsing lamu hta nga ai Karai Kasang Mungdan a Hkawhkam re. 1914 kaw nna shi uphkang hpang sai.​—Shingran 11:15.

5.   Hkye Hkrang La Ai Lam. Yesu a gawng malai jahpu a majaw, yubak hte si ai kaw nna lawt lu ai re. (Mahte 20:28; Kasa 4:12) Gawng malai jahpu kaw nna akyu lu la na matu, Yesu hpe kamsham ai sha n-ga, prat hpe galai shai ra nna hkalup mung hkam ra ai. (Mahte 28:19, 20; Yawhan 3:16; Kasa 3:19, 20) Makam masham nga ai hpe magam bungli hte sakse madun ra ai. (Yaku 2:24, 26) Raitim, hkye hkrang la hkrum ai gaw, magam bungli a majaw n re ai sha, “Karai Kasang a chyeju” a majaw re.​—Galati 2:16, 21.

6.   Sumsing Lamu. Yehowa Karai Kasang, Yesu Hkristu hte sadi dung ai lamu kasa ni gaw myi hte n mu lu ai wenyi mung hta nga ai. b (Shakawn 103:19-21; Kasa 7:55) Masha marai 144,000 sha, Karai Kasang a mungdan kaw Yesu hte arau uphkang na matu, lamu de hkrung rawt na re.​—Daniela 7:27; 2 Timohti 2:12; Shingran 5:9, 10; 14:1, 3.

7.   Ginding Aga. Shinggyim masha ni, htani htana nga na matu, ginding aga hpe Karai Kasang hpan da ya ai. (Shakawn 104:5; 115:16; Hpaji 1:4) Karai Kasang gaw madat mara ai ni hpe, hparadisu hta hkum tsup ai hkamja lam hte, htani htana asak jaw ai hku nna shaman chyeju jaw na re.​—Shakawn 37:11, 34.

8.   Nhkru Ai Hte Yakhkak Jamjau Ai Lam Ni. Karai Kasang a lamu kasa langai gumlau ai majaw, nhkru ai lam ni byin wa ai. (Yawhan 8:44) Gumlau ai ndai lamu kasa gaw “Nat Satan” byin wa ai. Adam yan Ewa hpe shi a maga de lawm wa hkra, shi lau la ai majaw masha yawng gaw, tsin-yam tsindam ni hkrum wa ai. (Ningpawt 3:1-6; Roma 5:12) Jaw ai shut ai hte seng nna, Satan galaw ai manghkang hpe hparan ra ai majaw, Karai Kasang gaw nhkru ai lam hte yakhkak jamjau ai lam ni byin nga ai hpe ahkang jaw da ai re. Raitim, prat tup matut nna byin nga na matu shi ahkang jaw na n re.

9.   Si Hkrung Si Htan. Masha gaw si mat yang, gara kaw mung n nga sai. (Shakawn 146:4; Hpaji 9:5, 10) Dai majaw, si mat ai masha ni gaw ngarai hta zingri hkrum ai lam n nga ai.

    Karai Kasang gaw masha wan law law hpe si ai kaw nna, bai hkrung rawt wa hkra galaw ya na re. (Kasa 24:15) Raitim, bai hkrung rawt wa ai ni gaw, Karai Kasang hte seng ai lam n sharin la mayu ai nga yang, htani htana jahten kau hkrum na re. Hpang de mung shanhte ni bai hkrung rawt sana n re.​—Shingran 20:14,15.

10.   Kun Dinghku. Num langai hte la langai sha hkungran nna arau mai nga ai ngu ai dinghku hte seng ai Karai Kasang a tsang madang hpe anhte hkan sa ga ai. Num shaw la shaw ai amu hta lai nna dinghku hpe n mai jahka ai. (Mahte 19:4-9) Chyum Laika kaw na hpaji jaw ga ni gaw, dinghku ngwi pyaw lu hkra karum ya ai ngu anhte kam sham ai.​—Ehpesu 5:22–6:1.

11.   Anhte A Nawku Daw Jau Lam. Wudang shing nrai gawng ngu sumla ni hpe anhte n shagrau ai. (Tara Jahprang 4:15-19; 1 Yawhan 5:21) Anhte a nawku dawjau lam hta lawm ai madung lam ni gaw:

    •   Karai Kasang kaw akyu hpyi ai.​—Hpilipi 4:6.

    •   Chyum Laika hti nna hkaja ai.​—Shakawn 1:1-3.

    •   Chyum Laika kaw nna sharin la lu ai lam ni hpe myit sawn sumru ai.​—Shakawn 77:12.

    •   Zuphpawng hta arau akyu hpyi ai, Chyum Laika hkaja ai, mahkawn hkawn ai, anhte a makam masham hpe tsun dan nna Sakse Hkam shada da hte kaga ni hpe n-gun jaw ai.​—Kolose 3:16; Hebre 10:23-25.

    •   “Mungdan a kabu gara shiga” hpe hkaw tsun ai.​—Mahte 24:14.

    •   Ra kadawn nga ai ni hpe karum ya ai.​—Yaku 2:14-17.

    •   Nawku Htingnu ni hte Mungkan ting Chyum hpaji jaw ai bungli hta akyu jashawn ai htingnu ni hpe gawgap ai. Gram lajang ai.​—Shakawn 127:1.

    •   Hkye mawai bungli ni hta shang lawm ai.​—Kasa 11:27-30.

12.   Anhte A Uhpung Uhpawng. Nawku hpung ni hpe hpawng de da nna, hpung shagu hta myitsu salang hpung langai nga ai. Shanhte ni gaw nawku hpung hpe woi awn ya ai. Raitim, shanhte gaw shabrai lu ai hpung sara ni n re ai. (Mahte 10:8; 23:8) Htam shi alu n hta ai. Zuphpawng ni galaw nga ai shaloi, alu hta ai lam mung n nga ai. (2 Korinhtu 9:7) Anhte a magam bungli yawng hpe, amying n tsun ai sha bang ai alu gumhpraw ni hte madi shadaw da ai.

     Kunghpan ai Hkristan nkau mi hte hpawng de da ai Uphkang Hpung gaw, ginjaw rung hta nga ai. Dai kaw nna mungkan ting hta nga ai Yehowa Sakse ni hpe lam matsun jaw ya ai.​—Mahte 24:45.

13.   Anhte A Kahkyin Gumdin Lam. Anhte gaw makam masham hta mungkan ting kahkyin gumdin nga ai. (1 Korinhtu 1:10) Amyu, ngasat ngasa, shan hpraw shan chyang, madang nem tsaw ginhka ai lam n nga ai. (Kasa 10:34, 35; Yaku 2:4) Raitim, tinang myit ra ai hpe wanglu wanglang n lata lu ai gaw n re. Anhte langai hpra gaw, Chyum Laika hku shaman shakyang da ai myit nsam hte maren dawdan ma ai.​—Roma 14:1-4; Hebre 5:14.

14.   Anhte A Akyang Lailen. Lam shagu hta tsawra myit madun lu hkra anhte shakut ga ai. (Yawhan 13:34, 35) Karai Kasang n ra sharawng ai lam yawng hpe anhte ni n galaw ai. Sai hte seng ai Karai a tara hpe hkungga ai majaw, sai n bang ga ai. (Kasa 15:28, 29; Galati 5:19-21) Anhte ni gaw ngwi pyaw simsa hkra nga nna, majan hta mung n shang lawm ai. (Mahte 5:9; Esaia 2:4) Anhte shanu nga ai mungdan a asuya hpe hkungga ai. Karai a tara hpe tawt lai ai upadi hta lai nna, ngam ai asuya tara upadi yawng hpe hkan sa ga ai.​—Mahte 22:21; Kasa 5:29.

15.   Kaga Masha Ni Hte Kanawn Mazum Lam. “Na a htingbu wa hpe, na a hkum hte maren nang tsawra lu na ndai” nga nna Yesu tsun ai. Raitim, Hkristan ni gaw “mungkan ga na n rai ma ai” nga nna mung tsun da ai. (Mahte 22:39; Yawhan 17:16) Yawng a ntsa “mai kaja ai amu galaw” lu hkra anhte ni shakut ai. Raitim, mung masa lam hta n lawm ai. Nawku htung n bung ai ni hte makam masham gayau ai lam n nga ai. (Galati 6:10; 2 Korinhtu 6:14) Raitim, dai lam ni hte seng nna masha ni a wanglu wanglang lata lu ai ahkang hpe gaw anhte hkungga ga ai.​—Roma 14:12.

 Yehowa Sakse Ni a makam masham hte seng nna grau chye mayu yang, anhte a website hta shang yu mai ai. Anhte a rung langai ngai hte matut mahkai mai ai. Nang nga ai shara hte ni ai Nawku Htingnu hta zuphpawng ni lung mai ai. Shing nrai, na a buga hta nga ai Yehowa Sakse langai ngai hte matut mahkai mai ai.