Shadu ai lam: Yehowa Sakse Ni gaw, tsi mawan hte tsi tsi ai lam ni hpe n kam sham ai.

 Teng man ai lam: Anhte gaw, tinang a matu hte kun dinghku a matu, kaja htum tsi tsi myu ai. Anhte machyi ai shaloi, kunghpan ai tsi sara ni, sai nbang ai sha, ga lajang ai hta kunghpan ai tsi sara ni hpang de, sa madun ai. Tsi hpaji madang tsaw wa ai hpe mung, anhte kabu ga ai. Machyi ai Yehowa Sakse Ni hpe karum ya let, lu wa ai sai nbang ai tsi tsi ladat hpe, ya kaga masha ni a matu mung jailang nga sai. Mungdan law law hta, machyi masha ni gaw, sai nbang na matu lata mai ai. Dai majaw, sai kaw na kap chye ai ana zinli ni, sai nhtuk ai lam ni hte sai bang shut ai lam ni hpe koi yen lu ai.

 Shadu ai lam: Machyi makaw ai hpe, makam masham hte tsi tsi mai ai ngu, Yehowa Sakse Ni kam sham ai.

 Teng man ai lam: Makam masham hte, tsi tsi ai hpe anhte n hkap la ai.

 Shadu ai lam: Sai nbang ai sha, tsi tsi ai gaw, jarik grai ma ai.

 Teng man ai lam: Sai nbang ai sha, tsi tsi ai gaw, jarik nau n ma ai sha, tsi lajang ai lam re. a

 Shadu ai lam: Yehowa Sakse law law gaw, sai nbang ai majaw, shaning shagu si nga ai. Dai hta ma kaji ni mung lawm ai.

 Teng man ai lam: Ndai hku shadu ai gaw, tsep kawp sakse n nga ai. Salum hpe ga tsi ai, nra hpe ga tsi ai, hkum a daw chyen galai bang ai zawn re ai, ga lajang ai ni hpe, sarawun ni gaw, sai nbang ai sha, tsi lajang ya nga ma ai. b, Sai bang nna tsi ai machyi masha ni zawn, sai n bang na tsi tsi ai ma ni pyi, hkam kaja wa ai. Shing nrai sai bang nna tsi ai machyi masha ni hta pyi, grau hkam kaja wa ai. c Hpa mi rai rai, sai nbang ai majaw, si na ngu ntsun lu ai zawn, sai bang ai majaw mung asak hkrung na ngu, kadai mung tsep kawp n lu tsun ai.

 Sai nbang ai gaw, tsi lajang ai hpaji a majaw n re ai sha, makam masham a majaw re. Ga Shaka Dingsa hte Ningnan ni hta, sai hpe koi gam na matu, dan dan leng leng tsun da ai. (Ningpawt 9:4; Jaw Jau 17:10; Tara Jahprang 12:23; Kasa 15:28, 29) Dai hta n ga, Karai Kasang a man hta, sai gaw asak hpe hkrang madun ai re. (Jaw Jau 17:14) Dai majaw, Karai Kasang tsun ai hpe madat mara nna, asak madu Karai Kasang hpe hkungga ai majaw, anhte sai n bang ai re.

 Lai wa sai aten hta, sai n bang ai sha tsi tsi ai hpe ladu lai ai, tinang hkum tinang si shangun ai lam ni ngu mu mada wa ai. Raitim, lai wa sai shaning ni kaw nna, dai zawn mu mada lam ni, galai shai mat wa sai. Ga shadawn, 2004 ning, tsi hpaji jane hta, “Yehowa Sakse machyi masha ni hpe, karum ya na matu lajang da ai tsi hpaji ni gaw, hpang de mung madung langai hku nna jailang wa na re” ngu ka da ai. d 2010 hta shapraw ai Heart, Lung and Circulation jane hta mung “‘sai n bang ai sha ga lajang’ nna tsi tsi ai gaw, Yehowa Sakse Ni a matu sha, n byin ging sai. Ga tsi lajang ai yawng hta, sai n bang ai sha tsi tsi ai ladat hpe jailang ging ai” ngu tsun da ai.

 Mungkan ting kaw na, hking hku law ai sarawun ni gaw, sai pru yawm hkra galaw ai ladat hpe jailang nna, sai n bang ai sha, ga lajang ai lam ni hpe galaw nga ai. Sai n bang ai sha tsi tsi ai ladat hpe, ya she bawng ring wa ai mungdan ni hta pyi jailang nga nna, Yehowa Sakse n re ai machyi masha ni mung, dai zawn ladat hte tsi tsi ya na matu hpyi shawn nga ma ai.