Ngwatanĩo ya United States Commission on International Religious Freedom (USCIRF) nĩyonanĩtye kana nĩkũthĩnĩka mũno nũndũ wa Mwana-a-asa Tesfazion Gebremichael, ũla wĩthĩĩtwe e mwove nthĩ ya Eritrea kwa myaka mbee wa 11. Kĩsese kya Ngwatanĩo ĩsu ya USCIRF kyaĩtye kana “Gebremichael nũendeee kũkũa—nũndũ yu e na myaka mbee wa 80—na kĩu no kĩlikye mũisyonĩ ũima wake wa mwĩĩ e kũu yela.” Matukũ 7, Mwei wa 10, 2022, Mũnene ũmwe wa USCIRF wĩtawa Frederick Davie awetie ũtheini asya Mwana-a-asa Gebremichael alekwʼe.

Silikalĩ yakwatie Mwana-a-asa Gebremichael Matukũ 20, Mwei wa 7, 2011, aendeee kũelesya angĩ ĩũlũ wa mũĩkĩĩo wake. O na kau asyaĩwe Eritrea, yu ndatalawa ta laiaa wa nthĩ ĩsu nũndũ silikalĩ nĩyavenie Ngũsĩ sya Yeova syonthe ũlaiaa mwaka wa 1994.

Mwana-a-asa Gebremichael atwʼĩkie Ngũsĩ ya Yeova Mwei wa 1, 1971. Esĩkĩe ta mũndũũme wĩ wendo, tei, wendete mũuo, na ũtetheeasya atũi make. Mwaka wa 1974, nĩwʼo watwaie kĩveti kyake, Lemlem. O nake Lemlem nĩ Ngũsĩ ya Yeova. Me syana inya na esũkũũe atano.

Mwĩĩtu-a-asa Gebremichael aĩtye: “O na kau nĩnĩmakaa nasũanĩa ũima wa mũemewa e kũu yela, na nĩnĩthĩawa na mea ma kwona aimbonyʼa wendo na kũndwʼĩĩka, nĩnĩsĩ Yeova nũkũmũsũvĩa. Nĩnendeeawʼa mũno nĩ ũĩkĩĩku wa mũemewa na ũndũ ũtwʼĩte kũendeea kũlũmanyʼa na Yeova. Kũvindĩĩsya ĩandĩko ya Mũtavanʼya 10:4 nĩkũmbĩkĩaa vinya nĩkale nĩuĩtye o na kau mũsyĩ witũ nũkwatĩtwe nĩ mawetu asu.”

Nthĩ ya Eritrea yĩthĩĩtwe ĩithĩnyʼa Ngũsĩ sya Yeova kuma mwaka wa 1991. O na kau Ngũsĩ 32 nĩsyalekilwʼe kuma Mwei wa 12, 2020 nginya Mwei wa 2, 2021, ana-a-asa na eĩtu-a-asa angĩ 20 me o yela. Na onthe movetwe kyovo kya thayũ. Nũndũ vai mĩao mĩseo nthĩ ĩsu kana mĩvango ĩngĩ ya mĩao matonya kũtũmĩa kwĩtetea, kyovo kyoo ti kya ĩvinda ĩna yĩtwʼĩtwe (de facto life sentence).

Ngwatanĩo nene sya kũtetea ũthasyo wa andũ ĩũlũ wa nthĩ, nĩsyĩthĩĩtwe iileana na kĩu nthĩ ya Eritrea yĩkĩte kya kũvena andũ ũthasyo woo, na ikakũlya silikalĩ ĩsu ĩlũnge maũndũ. Ngwatanĩo ĩmwe ya kũthũima ũndũ maũndũ maendeee nthĩ ĩsu ya Eritrea (UN Commission of Inquiry on Human Rights in Eritrea) mwaka wa 2016 yaisye kana silikalĩ ya Eritrea “nĩtũlĩte mĩao ĩla ĩkonetye ũthasyo wa andũ” nũndũ wa kũthĩnyʼa Ngũsĩ sya Yeova vamwe na andũ angĩ.

Kwovwa kwa Mwana-a-asa Gebremichael nĩ ngelekanyʼo ya ũndũ silikalĩ ĩsu ĩtwʼĩte kũthĩnyʼa Ngũsĩ sya Yeova, o na ala akũũ. Kuma mwaka wa 2011, Ngũsĩ inya nikwʼĩĩe yela na eĩtu-a-asa atatũ akũũ makakwʼa ĩtina wa kũlekwʼa, nũndũ wa maũndũ metu ala makomanie namo me yela.

Anene ma silikalĩ ya Eritrea nĩmaleete kũneenea ũndũ ũsu vamwe na Ngũsĩ sya Yeova.

Nĩtũkũendeea kũvoya kwondũ wa ana-a-asa na eĩtu-a-asa maitũ ala movetwe mate mavĩtyo. Nĩtwĩsĩ nesa vyũ kana Yeova nũkũendeea kũmatwʼĩĩka.—Aevelania 13:3.