Ngũsĩ sya Yeova nithĩnawʼa mũno nthĩ ya Eritrea. Silikalĩ ya Eritrea nĩyĩthĩĩtwe ĩikwata, na ĩkathĩnyʼa Ngũsĩ sya Yeova kuma yĩla yakwatie wĩyathi mwaka wa 1993. Mũsumbĩ nĩwaumisye mwĩao Matukũ 25, Mwei wa 10, 1994, aĩtye kana Ngũsĩ sya Yeova nthĩ ya Eritrea “nĩvenetwe ũlaiaa wasyo” nũndũ wa kũlea kwĩlikya maũndũnĩ ma siasa kana kũlika ũthũkũminĩ wa ita sya kaũ. Kuma ĩvinda yu, silikalĩ ĩsu nĩyĩthĩĩtwe ĩteũnenga ndaĩa ũthasyo wa Ngũsĩ sya Yeova.

Nũndũ wa kũthĩnwʼa kwa myaka mingĩ, Ngũsĩ mbingĩ nikĩĩe nthĩ ingĩ. Ala matwʼĩte kwĩkala nthĩ ĩsu nĩmethĩawa mũisyonĩ wa kũthĩnwʼa na no nginya metũĩĩe mũno yĩla mekwĩka maũndũ makonetye ũthaithi woo. Silikalĩ ya Eritrea nĩkwatĩte na ĩkova Ngũsĩ mbingĩ myakanĩ mĩvĩtu—amwe nũndũ wa kũlea kũlika ũthũkũminĩ wa ita nũndũ wa wasya woo wa ngoo, na angĩ nũndũ wa kũthi maũmbanonĩ ma ũthaithi, kũneena na atũi moo ĩũlũ wa Mbivilia, kana nũndũ wa itumi itesĩkĩe. Ala movawa yela nĩ vamwe na aũme akũũ, aka, o na mavinda amwe syana. Ve aũme atatũ ala nĩ Ngũsĩ methĩĩtwe yela mbee wa myaka 20. Vai ũmwe katĩ woo waatwawa kotinĩ akasilĩlwa.

Kũthĩnwʼa kwa Ngũsĩ sya Yeova nthĩ ya Eritrea nĩkũtumĩte nthĩ ingĩ syambĩĩa kũthĩnĩka nũndũ wa ũndũ ũsu. Anene ma silikalĩ kĩsionĩ kya Africa, Europe, na Amelika, nĩmaneenete na atongoi ma Eritrea, ĩndĩ silikalĩ ĩsu ndyosete matambya ma kũmina thĩna ũsu. O nasyo Ngũsĩ nĩsyĩthĩĩtwe iikũlya atongoi ma Eritrea taoninĩ ya Asmara metĩkĩle kũea ngewa namo nĩ kana mamine thĩna ũsu, ĩndĩ silikalĩ nĩleaa kũkomana namo.