Twĩ Matukũ 12, Mwei wa 5, 2023, Koti ũla ũsilaa makoani ala matũngwa kotinĩ (Court of Appeal) nĩwaumisye ũtwi wa vata ũkasũvĩaa ũthasyo wa ũthaithi wa syana ila syĩ sukulu nthĩ ĩsu. O na kau nthĩ ya Kenya yĩ na mwĩao wonanĩtye kana vaiĩ mũndũ waĩlĩte kũthingʼĩĩwʼa eke maũndũ maleanĩte na mũĩkĩĩo wake, kuma mwaka wa 2015, ve na syana 41 sya Ngũsĩ sya Yeova ilũngĩtwʼe sukulu kana ikaũngamwʼa kũthi sukulu kwa ĩvinda yĩana ũna nũndũ wa kũlea kũvulanyʼa ũthaithi.

Ũtwi ũsu wa vata weekiwe nĩ koti ũsu mũnenange wa Kenya nũkonanĩtye na ũndũ mũna weekĩkie mwaka wa 2017. Mwakanĩ ũsu, syana kenda sya Ngũsĩ nĩsyaleile kwa nzĩa ya ndaĩa kũvulanyʼa ũthaithi woo me sukulu. Kwĩka ũu nĩkwatumie methĩwa na ĩkoani kotinĩ. Mwakanĩ wa 2019, koti mũninangi nĩwatwie kana sukulu ndyatũlĩte mwĩao kwa kũthingʼĩĩsya syana isu ithaithe vamwe na ila ingĩ sukulu. Ĩndĩ twĩ Matukũ 12, Mwei wa 5, 2023, koti ũsu nĩweetĩkĩlile kana ũtwi ũsu weekĩtwe “nĩwalikĩlĩĩlĩte ũthasyo wa syana wa kũsoma na kũnewa ndaĩa.” O na ĩngĩ, koti ũsu ũsilaa makoani ala matũngwa kotinĩ (Court of Appeal) nĩwoonanisye kana mwĩao wa kũthingʼĩĩsya Ngũsĩ sya Yeova ivulanyʼe ũthaithi “ndwosanĩte na mĩao na ndwaaĩlĩte.” Mũsili ũmwe wa makoani ũla waĩ ĩkoaninĩ yĩu aandĩkie atĩĩ: “Ũtwi wa koti ũũ nũũtetheesya sukulu imanye kana syana sya sukulu syĩ na ũthasyo wa kũthaitha.”

Ũtwi ũsu nũnalũlũmĩĩlilye mwĩao waumĩtʼwe nĩ Mũvĩa wa Kĩsomo wa Kenya Mwei wa 3, 2022. Mwĩao ũsu watavĩtye anene ma sukulu manenge ndaĩa ũthasyo wa kũthaitha wa syana syonthe. Nũndũ wa ũtwi ũsu, Kenya nĩnatwʼĩkie nthĩ ĩmwe katĩ wa nthĩ mbingĩ sya Africa, o vamwe na Malawi na Rwanda, ila iminĩte kwĩka ũtwi ta ũsu wa vata nĩ kana itetee ũthasyo wa kũthaitha wa syana sya Ngũsĩ.

Andũ ma mũika nthĩ ya Kenya na isionĩ ila ingĩ nthĩ yonthe nĩmaĩle kũmanya kana nĩmamũtanĩthasya Yeova yĩla maũngama me alũmu kwondũ wa ũthaithi wa wʼo.—Nthimo 29:25.