Twĩ Matukũ 15, Mwei wa 12, 2023, kaũ ũla ũendeee katĩ wa nguthu ilĩ syĩ na mĩio ya kaũ taoni ĩla nene ya Sudan, Khartoum, nũnanyaĩĩkie nginya taoninĩ ya Wad Madani, ĩla nĩyo taoni ya kelĩ kwa ũnene nthĩ ĩsu. O tondũ voonanĩtwʼe nthĩnĩ wa jw.org, yĩla kaũ ũsu wambĩĩie Khartoum Mwei wa 4, 2023, ana-a-asa na eĩtu-a-asa aingĩ nĩmasembie mathi kwĩvitha Wad Madani, ĩla yĩ ngalĩko ya ĩtheo kwelekela wumĩlonĩ wa syũa ya taoni ĩla nene ta ũasa wa kĩlomita 170 (maili 106). Yu tũĩ, ana-a-asa na eĩtu-a-asa mbee wa 150 nĩmalasimĩkĩte kũsemba ĩngĩ makĩĩte kaũ ũsu.

• Vaiĩ ũmwe wa ana-a-asa kana eĩtu-a-asa maitũ ũkwatĩte mawũũmĩsye kana akoawa

• Ana-a-asa na eĩtu-a-asa 158 nĩmatiĩte mĩsyĩ yoo. Amwe nĩmavotete kũkĩĩa taoninĩ kana nthĩ ila syĩ vakuvĩ na makavika me o aima

• Ve ana-a-asa na eĩtu-a-asa 10 na andũ o anini moo ma mũsyĩ ala mate Ngũsĩ me o taoninĩ ya Wad Madani

• Asyaĩĩsya ma mũthyũlũlũko na atumĩa ma ikundi nĩmaendeee kũmatetheesya kĩ-veva ala makwatĩtwe nĩ mathĩna nũndũ wa kaũ

• Kamitii sya kũnengane ũtethyo ĩvinda ya mũisyo sya nthĩ ya Sudan vamwe na nthĩ ila itũanĩe niendeee kũũngamĩa mũvango wa kũnengane ũtethyo, ta kwa ngelekanyʼo lĩu, ndawa, na vandũ va kwĩkala

Ũndũ wa kwendeesya nĩ kana, o kyumwa kĩmwe kaũ ũsu ũtanambĩĩa Wad Madani, ovisi wa ũvonge wa East Africa nĩweekie mũvango nĩ kenda ala maĩ manauma mĩsyĩ kwoo nũndũ wa kaũ ũsu meloele ũmbano mũnene wa mĩthenya ĩtatũ wa 2023 ũlekotiĩtwe kwa kĩthyomo kya Kĩalavu, ũla waĩ na kyongo ‘Ĩthĩwa na Wũmĩĩsyo’! Katĩ wa andũ vakuvĩ 200 ala maĩ vo, vaĩ na ana-a-asa na eĩtu-a-asa 145 ala maumĩte Khartoum makĩĩte kaũ. Aingĩ ũmbanonĩ ũsu nĩmatũngie mũvea mũno nũndũ wa lĩu ũsu wa kĩ-veva maũkwatie ĩvindanĩ yĩla yaĩlĩte. Ala maĩ ũmbanonĩ ũsu nĩmeekĩiwe vinya nĩ vitio ndaasa ĩla yaĩ na kyongo “Mwiĩe Yeova Nzĩa Yaku,” ĩla yoosanĩte vyũ na thĩna ũla wamakwatĩte. O na ĩngĩ, andũ mũonza nĩmavatisiwe ĩvindanĩ ya ũmbano ũsu.

Twĩvoya kwondũ wa ana-a-asa na eĩtu-a-asa maitũ ala me Sudan maendeee kũmĩĩsya motato asu, na tweteele na mea ĩvinda yĩla Yeova ‘ũkatuma makaũ mathela kũvika kĩtulu kya nthĩ.’—Savuli 46:9.