ANDŨ MA MŨIKA MAKŨLASYA
Nĩkĩ Asyai Makwa Matendaa Ndyĩtanĩthya?
Anyanyau nĩmaũthoketye wikendi ĩno mũketanĩthye. Wakũlya asyai maku kana no ũthi, ũsũngĩo woo nĩ, “Aiee.” Ĩndĩ o na kĩu kĩinaũsengyʼa. Ũu nowʼo maũsũngĩie ĩvinda ĩvĩtu.
Kĩlungunĩ kĩĩ
Nĩkĩ asyai makwa maleaa kĩla ĩvinda?
Ethĩwa asyai maku no ta maleaa kĩla ĩvinda wamakũlya ũketanĩthye, no wasye kana mayendaa ũyĩtanĩthya o na vanini.
Mwĩĩtu wa mũika wĩtawa Marie eewie ũu yĩla wambĩie kũtũmĩa simũ. Aĩtye atĩĩ: “Tata ambĩkĩie mĩao mingĩ ĩũlũ wa syĩndũ ila naaĩlĩte kwĩkĩa simũnĩ, andũ ala naaĩlĩte kũeaa ngewa namo, na saa ila naaĩlĩte kũea ngewa namo. Ĩvindanĩ yĩu anyanyawa meekaa kĩla mekwenda!”
Sũanĩa ũndũ ũũ: Kwa wʼo ĩthe wa Marie endaa kũmũsiĩĩa ndaketanĩthye? Atonya kwĩthĩwa athĩnĩkĩaa maũndũ angĩ ta meva?
Mũendo ũla ũtaĩle kũvĩta yĩla ũtwaĩte ngalĩ no ũkũsiĩĩe kwĩthĩwa na ũthasyo ũla ũkwenda ĩndĩ nĩkũsũvĩaa ndũkaũmĩe; na ũu nowʼo mĩao ya asyai yĩilye.
Tata kwĩka ũndũ ũũ: Ĩtwʼĩkĩthye wĩ mũsyai na wĩ na mwana wa mũika wambĩĩie kũtũmĩa simũ. Nĩ maũndũ meva we ũtonya kwĩthĩwa ũithĩnĩkĩa? Nĩ mĩao yĩva we ũtonya kwĩkĩĩa mwana waku wa mũika? We ũtonya kũsũngĩa ata mwana waku akakwĩa kana ndũkwenda ayĩtanĩthya o na vanini?
“Kĩla ĩvinda tata ambĩaa, ‘ĩyĩkĩe iatũnĩ syakwa ta wĩ mũsyai.’ Kwĩka ũu nĩkwandetheeisye noona vata wa mĩao yake na itumi ila syatumĩte amĩkĩa. Nĩĩkwatya keka naĩ na syana, nĩthĩwa neekwatasya syĩke o maũndũ ala tata wendaa nĩke.”—Tanya.
Naĩle kwĩka ata nĩ kana asyai makwa metĩkĩle?
“Kũkĩlya wasya kũyĩsa kũũtethya, vandũ va ũu kũũtiaa wĩ mũnou vamwe na asyai maku. Wambĩĩa kũkananĩsya, asyai maku no mambĩĩe kũkwona ta ũte mũimu na ta ũtaĩlĩte kũnengwa ũthasyo mwingĩ.”—Richard.
“Kĩla mwĩao wĩthĩawa na kĩeleelo kĩseo. Asyai makwa mayĩthĩawa maimbata kwĩtanĩthya ĩndĩ methĩawa mayenda nĩtanĩthye kwa nzĩa ĩla yaĩle na ĩtendetea mathĩna.”—Ivy.
Mwolooto wĩ Mbivilianĩ: “Ndia nĩneenaa ũthatu wayo wʼonthe; Ĩndĩ mũndũ mũĩ nĩwũsiĩĩaa na kũkilĩthya.”—Nthimo 29:11.
“Nĩnatatie kũtũla mĩao ĩla tata wambĩkĩĩe ya kũtũmĩa simũ yakwa. Nĩnamanthie nzĩa sya kũtũmĩĩa anyanyawa mesengyi masaanĩ ma ũtukũ mũno na kwĩkĩa simũnĩ yakwa syĩndũ ila tata wambatĩte. Ĩtina ndaleaa kwĩsa kũmanya kĩla naendeesye na kĩu kyatumaa ambĩkĩĩa mĩvaka mingangĩ nũndũ ndambĩkĩĩaa. Kũtata kũtũla mĩao ĩla wĩkĩĩwe kũtumaa maũndũ mathi naĩ.”—Marie.
“Ĩthĩwa na wũmĩĩsyo. No vavĩte ĩvinda asyai maku mayĩsa kũvĩndũa mwĩao, ĩndĩ yĩla moona ũyĩatĩĩa mĩao ĩla makwĩkĩĩe, kĩu no kĩtume maũnenga ũthasyo mwingangĩ..”—Melinda.
Mwolooto wĩ Mbivilianĩ: “Mewʼei asyai menyu maũndũnĩ onthe.”—Akolosai 3:20.
“Kũendeea kũmathingʼĩĩsya ĩngĩ na ĩngĩ kũyĩsa kũtuma maũndũ methĩwa me laisi kana kũkatuma ũkwata kĩla ũkwenda.”—Natalie.
“Mũsyai nĩwendaa kwona kana no wĩke motwi maseo. Kwoou yĩla ngũneena na asyai makwa nĩndataa kũelesya itumi syakwa nesa vandũ va kwonanyʼa ũndũ ngwĩwʼa. Neeka ũu asyai makwa nĩmambĩtĩkĩlasya ngeka kĩla namakũlya.”—Joseph
Mwolooto wĩ Mbivilianĩ: “Nenga ndaĩa ĩthe waku na inyia waku.” —Aeveso 6:2.
No Wendeewʼe Nĩ Ii
ANDŨ MA MŨIKA MAKŨLASYA
Ndonya Kũneena na Asyai Makwa Ata Ĩũlũ wa Mĩao Ĩla Mambĩkĩĩe?
Manya ũndũ ũtonya kũneenyʼa asyai maku kwa ndaĩa, na no ũsengʼe kwona ũseo wa kwĩka ũu.
VITIO SYA KATUNI ŨVWAŨNĨ
Ndonya Kwĩka Ata Nĩkwate Ũthasyo Mwingangĩ?
Wĩsũanĩa waĩle kwoswa ta mũndũ mũima, ĩndĩ asyai maku no maleane naku. Ũtonya kwĩka ata nĩ kana makũĩkĩĩe?
WHAT YOUR PEERS SAY
Ndonya Kũneena na Asyai Makwa Ata?
No vethĩwe moseo maingangĩ kwĩ ũndũ ũũsũanĩa.
ANDŨ MA MŨIKA MAKŨLASYA
Ndonya Kwĩka Ata Nĩ Kana Asyai Makwa Mandĩkĩĩe?
Maũndũ atatũ matonya kũtuma ũnengwa ũthasyo mwingangĩ.
