Mavindanĩ amwe andũ ma Ngai masengʼaa ethĩwa nĩmatethekaa nĩ kĩthito kĩla mekĩaa na ĩvinda yĩla matũmĩaa nĩ kana mekale kwosana na myolooto ya Mbivilia. (Savuli 73:2, 3) O na no mambĩĩe kwĩka maũndũ meũleana na mĩao ya Yeova na maitata kũkenga athaithi ala angĩ kwa kũvitha mwĩkalĩle woo mũthũku.

 Kĩlungu kĩĩ kĩseũvĩtwʼe nĩ kana kĩtetheesye ala matonya kwĩthĩwa mambĩĩe kwĩthĩwa na mwĩkalĩle ta ũsu, ĩndĩ nĩmekwenda kũekana nawʼo.

Kĩlungunĩ kĩĩ

•  Kwĩka maũndũ mathũku wĩvithĩte nĩ kwĩka ata?

•  Kwĩkaa maũndũ mathũku nĩvithĩte kwonanasya nĩ mũndũ mũthũku?

•  Ndonya kwĩka ata nĩeke kwĩka maũndũ mathũku nĩvithĩte?

•  Kĩla andũ angĩ ma mũika maasya

 Kwĩkaa maũndũ mathũku wĩvithĩte kwonanasya kana yĩla wĩ na ala matamwĩwʼaa Yeova wĩkaa maũndũ ala wĩsĩ nĩ mathũku, ĩndĩ yĩla wĩ vamwe na athaithi ala angĩ, ũyonanyʼa kana nũkwenda vyũ kũmũthũkũma. Yĩla weeka ũu wĩthĩawa ũyonanyʼa kana wĩ na ũseleke, na ve kĩla wĩthĩawa ũivitha.

 “Yĩla weeka maũndũ mathũku kĩmbithĩnĩ, ve kĩla wĩthĩawa ũivitha, na kwoou vai mũndũ wĩsa kũũmanya nesa kwa wʼo nue ũũ. Kũneena ũla wʼo, yĩla weeka maũndũ mathũku wĩvithĩte, wonanasya kana ndwĩ mũĩkĩĩku kwa kĩla mũndũ.”—Erin.

 We nĩwĩsĩ? Kwĩkaa maũndũ mathũku yĩla wĩ weka nĩ vamwe na kwĩkaa maũndũ ala wĩsĩ Yeova nũleanaa namo.

 “Yĩla naĩ na myaka 14, nĩnambĩĩie kũsisya mavisa na vitio nthũku indanetinĩ. Nĩ na ala angĩ noonanasya nĩnĩmenete mavisa ma ũlaalai vyũ, ĩndĩ ngoonĩ nĩneesĩ kana ndimamenete.”—Nolan.

 Mwolooto wĩ Mbivilianĩ: “Vaiĩ mũndũ ũtonya kũthũkũma mavwana elĩ; nũndũ akamũmena ũmwe na aimwenda ũla ũngĩ, kana akalũmanyʼa na ũmwe na aimũmena ũla ũngĩ.”—Mathayo 6:24.

 Ti nginya vethĩwe vailye ũu. Kwa wʼo, andũ amwe nĩmatwʼĩte kana maikwenda kwĩkala kwosana na myolooto ya Mbivilia. Ĩndĩ kwa wʼo ũu nĩwʼo we ũilye? Kana ve kĩtumi kĩngĩ kĩla kĩũtuma wĩka maũndũ ũu, ta:

•   Kwĩwʼaa ũikĩa kwĩthĩwa wĩ kĩvathũkanyʼo na andũ ala angĩ ma mũika.

•   Kwĩwʼaa wĩ na maũndũ maingĩ ũkwatĩanĩaa vamwe na ala ũsomaa namo kwĩ ala me kĩkundinĩ.

•   Kwĩwʼaa ũte na vinya na ũtonyi wĩanĩtye wa kũatĩĩa mĩao yonthe ya Ngai.

 “Nĩĩsilya andũ amwe ma mũika ala mekaa maũndũ mathũku mevithĩte mewʼaa me eanĩe mũnango yĩla me na andũ ala mataatĩĩaa myolooto ya Kĩklĩsto nũndũ mendaa kwĩthĩwa na anyanya, o na ethĩwa mailye ata.”—David.

 Kwa wʼo, katĩ wa maũndũ asu twatalanyʼa, vaiĩ o na ũmwe ũũnenga mũndũ kĩtumi kya kwĩka maũndũ mathũku evithĩte. Ĩndĩ o na vailye ũu, metũtetheesya kũelewa ũndũ o na andũ aseo matonya kũlika kĩteinĩ kĩu. Ethĩwa nũkwatĩtwe nĩ ũndũ ta ũsu, ũtonya kwĩka ata?

1.  1. Sũanĩa ũndũ wĩkalaa oyu. Ĩkũlye atĩĩ: ‘Kwa wʼo ũũ nĩwʼo ngwenda kwĩthĩwa nĩilye? Na naendeea kwĩkala ũu, mawumĩlo meĩthĩwa me meva?ʼ

    Mwolooto wĩ Mbivilianĩ: “Mũndũ wĩ kĩlĩko nĩwonaa ũthũku na kwĩvitha; ĩndĩ ala mate ũmanyi nĩmaendeeaa na kũthĩna.”—Nthimo 27:12.

2.  2. Neenaa ũla wʼo. Neenea thĩna waku vamwe na asyai maku kana mũnyanya ũngĩ mũimu ũla ũnengete ndaĩa mĩao ya Yeova. Vate nzika maikalea kũtana nũndũ nĩwamakũlya maũtetheesye. O na ĩngĩ makatana mũno nũndũ meona wĩenda kwĩka kĩla kyaĩlĩte!

    “Kwĩtĩkĩla mavĩtyo makwa nĩwʼo waĩ ũndũ ũla waĩ vinya vyũ naaĩle kwĩka, ĩndĩ yĩla neekie ũu, neewie nausya vyũ.”—Nolan.

    Mwolooto wĩ Mbivilianĩ: “Ũla ũvwʼĩkaa mavĩtyo make ndakaathimĩka; ĩndĩ ũla ũmaumbũlaa na kũmatia akeewʼĩwa tei.”—Nthimo 28:13.

3.  3. Ĩtĩkĩla mawumĩlo. Lilikana, ethĩwa wĩthĩĩtwe ndũvitha asyai maku kana ana-a-asa na eĩtu-a-asa kĩkundinĩ ũndũ mũna, manya kana nue ũtumĩte mewʼa ve vinya kũkũĩkĩĩa. Na nũndũ wa ũu, asyai maku kana atumĩa ma kĩkundi nĩmatonya kũkwĩkĩĩa mĩvaka maũndũnĩ mana. Ĩtĩkĩla mawumĩlo ma mavĩtyo maku na ũitwʼa kana nũkũendeea kwĩthĩwa wĩ ‘mũĩkĩĩku maũndũnĩ onthe.’—Aevelania 13:18.

    Mwolooto wĩ Mbivilianĩ: “Ĩwʼa ũtao, na osa ũmanyĩsyo, nĩ kana wĩthĩwe mũĩ mũminũkĩlyonĩ waku.”—Nthimo 19:20.

4.  4. Ĩkĩĩa vyũ kana Ngai nũkwendete. Nũndũ Yeova nũtwendete, nĩwĩthĩawa esĩ nesa maũndũ onthe ala twĩkaa. Kwoou, yĩla weeka maũndũ mathũku wĩvithĩte, nũmanyaa na ũndũ ũsu nũmũthatasya. Ĩndĩ, ‘nũndũ nũkũthĩnĩkĩaa,ʼ e na mea ma kũũtetheesya nĩ kana ũlũnge mĩendele yaku.—1 Vetelo 5:7.

    Mwolooto wĩ Mbivilianĩ: “Metho ma Yeova maendaa kũũ na kũũ nthĩ yonthe, eyonanyʼe e vinya kwondũ wa ala ngoo syoo imwelekele syĩ mbĩanĩu.”—2 Mavinda 16:9.