We wĩona ata?

•   Ve ũthũku kũsoma ndata, kũthi kwona ala me mavinya mathonokete ma andũ, kana kũtũmĩa syĩndũ sya kwaũsya?

•   Ngewa sya ũwe no ta ngewa tũ sya ũthũku na ũseo, kana syĩ na ũthũku wĩ vandũ?

 Kĩlungu kĩĩ kĩeleetye nĩkĩ kũneenanyʼa na maveva kwonekaa ta kũseo, na nĩkĩ waĩle kwĩkala wĩ metho.

•  Nĩkĩ kwonekaa ta kũseo?

•  Nĩkĩ waĩle kwĩkala wĩ metho?

•  Ũndũ ũtonya kwĩka

•  Kĩla andũ angĩ ma mũika maasya

 Ala maseũvasya syĩndũ sya kwĩtanĩthya mendete mũno kũsyĩkĩa maũndũ ma ũwe. Nũndũ wa ũu, maũndũ asu methĩawa mausĩe nthĩnĩ wa sinema, ivĩndĩ sya TV, mathaũ ma kombiũta, na mavuku. Nũndũ wa ũu, amũika aingĩ ũmũnthĩ nĩmendeewʼa nĩ kwona maũndũ ma ũwe ta kũsoma ndata, ndaimoni, andũ meũnywʼa angĩ nthakame, na ũoi. Nĩkĩ? Itumi imwe nĩ ta:

•   Kwenda kũmanya mũno: Nĩmendaa kũmanya ethĩwa o wʼo kwĩ maveva na ndaimoni

•   Kwĩmakĩa: Nĩmendaa kũmanya nĩ kyaũ kĩ mbee woo

•   Kũea ngewa: Nĩmendaa kũtata mone kana nongi nĩmaneena na mũndũ mendete wakwie

 Itumi isu ti nthũku. Kwa ngelekanyʼo, nũũ we ũtendaa kũmanya nĩ kyaũ kĩ mbee wake, kana ũtewʼaa aikosa mũndũ wake wakwie? Ĩndĩ o na vailye ũu, nĩwaĩle kwĩthĩwa wĩ metho.

 Mbivilia nĩtũkanĩtye mũno tũikese kwĩlikanyʼa na maveva. Kwa ngelekanyʼo, yaĩtye:

 “Kũikaoneke kwaku mũndũ . . . ũla ũaũasya, kana ũla ũingasya nyũnyi kana mũndũ mũe, kana mũoi, kana mwĩki wa syama, kana ũla ũkũlasya ala mesene na maveva, kana ũla ũmbasya ithitũ, kana ũla ũkũlasya akwʼũ. Nũndũ ũla wĩkaa maũndũ asu nũmũthatasya Yeova.”—Kũtũngĩlĩlwa Kwa Mĩao 18:10-12.

 Nĩkĩ Mbivilia ĩtũvatĩte vyũ kũneenanyʼa na maveva?

•   Kũneenanyʼa na maveva kũtũkwatanasya vyũ na ndaimoni. Mbivilia nĩtũtavĩtye kana ve alaĩka amwe mamũleile Ngai na matwʼĩka amaitha make. (Mwambĩlĩlyo 6:2; Yuta 6) Alaĩka asu nĩmo metawa ndaimoni, na matũmĩaa ala mesene namo kũkenga andũ. O na nĩmatũmĩaa awe, makatũmĩa ala maũasya, na ala masomaa ndata. Tweelikya maũndũnĩ asu tũtwʼĩkaa anyanya ma amaitha ma Ngai.

•   Ala maneenanasya na maveva matumaa angĩ mona atĩ andũ no mamanye ũndũ kũkethĩwa kũilye ĩvinda yũkĩte. Ĩndĩ ũsu nĩ ũvũngũ. No Ngai e weka ũtonya kũweta ndeto ii: “Ngĩtavanʼya mũminũkĩlyo kuma mwambĩlĩlyonĩ, na kuma tene tene maũndũ ala matanamba kwĩkwa.”—Isaia 46:10; Yakovo 4:13, 14.

•   Ala maneenanasya na maveva matumaa angĩ mona atĩ akwʼũ no maneene na ala me thayũ. Ĩndĩ ũsu nĩ ũvũngũ. Mbivilia yaĩtye: “Ala akwʼũ matyĩsĩ ũndũ o na wĩva . . . Kũti wĩa kana ũsũanĩo, kana ũmanyi, kana ũĩ, Seoli.”—Mũtavanʼya 9:5, 10.

 Nũndũ wa itumi isu, ithyĩ Ngũsĩ sya Yeova tũyĩlikasya maũndũnĩ ala makonanĩtye na kũneenanyʼa na maveva. O na tũyĩtanĩthasya na syĩndũ syĩkwonanyʼa maũndũ ta andũ akwʼũ mekwonanwʼa ta mathayũũkie, andũ meũnywʼa angĩ nthakame, kana o andũ mekwĩka maũndũ matũmĩĩte vinya wa ndaimoni. Mwĩĩtu ũmwe wĩtawa Maria aĩtye, “Ethĩwa nĩ kĩndũ kĩ na kaũndũ kakonanĩtye na ndaimoni, ndyaĩle kwĩloela.” a

•   Twʼa vyũ “kwĩthĩwa na wasya mũtheu wa ngoo” methonĩ ma Yeova kwa kũleana vyũ na meko kana syĩndũ sya kwĩtanĩthya ila ikonanĩtye na ũwe.—Meko ma Atũmwa 24:16.

•   Ananga kana wĩkye vaasa kyonthe wĩ nakyo kĩkonanĩtye na ũwe. Kwa soma Meko ma Atũmwa 19:19, 20, na ũisisya wone ũndũ Aklĩsto ma ĩvinda ya atũmwa matũtiĩe ngelekanyʼo nzeo ũndũnĩ ũsu.

 Lilikana: Yĩla waleana vyũ na meko ma ũwe kana syĩndũ sya kwĩtanĩthya syĩ na maũndũ asu, wĩthĩawa woonanyʼa ũtheinĩ vyũ kana wĩ ngalĩko ya Yeova. Kĩu kĩtumaa atana mũno!—Nthimo 27:11.