ANDŨ MA MŨIKA MAKŨLASYA
Kwĩvaanyʼa—Kĩlungu kya 3: Nĩtwaĩle Kũeka Kwĩvaanyʼa?
Nĩwĩthĩĩtwe ũyĩvaanyʼa na mũndũ kwa kavinda, ĩndĩ nĩwambĩĩe kwĩthĩwa na nzika. Waĩlĩte kũendeea na ndũũ ĩsu kana waĩlĩte kũmina? Kĩlungu kĩĩ kĩseũvĩtwʼe kĩũtetheesye kwĩka ũtwi.
Kĩlungunĩ kĩĩ
Ũndũ ũtonya kwĩka wakwatwa nĩ nzika
Ĩtina wa mwanake na mwĩĩtu kwĩvaanyʼa kwa kavinda, nĩmatonya kwĩthĩa mayaĩlanĩte kĩvathũkanyʼo na ũndũ manasũanĩaa mbeenĩ. Kwa ngelekanyʼo:
Ũmwe no ethĩwe atanĩaa kũthi kũtembea ũtee wa ũkanga, nake ũla ũngĩ nũtonya kwĩthĩwa atanĩaa kũlĩsa kĩĩma.
Ũmwe no ethĩwe endaa kũtindanyʼa na andũ, nake ũla ũngĩ no ethĩwe endete kũtũmĩa ĩvinda e weka.
Ũmwe no ethĩwe ethĩawa ate mũĩkĩĩku, nake ũla ũngĩ ethĩawa e mũĩkĩĩku ĩvinda yonthe.
Lilikana kana kĩla ĩmwe ya ngelekanyʼo isu syawetwa yĩ kĩvathũkanyʼo na ila ingĩ. Ya mbee yĩonanyʼa mendeeawʼa nĩ maũndũ me kĩvathũkanyʼo; ya kelĩ yĩonanyʼa me na nguma syĩ kĩvathũkanyʼo; nayo ya katatũ yĩonanyʼa mĩkalĩle yoo ndĩkwosana.
Sũanĩa ũndũ ũũ: Katĩ wa maũndũ asu atatũ, nĩ ũndũ wĩva ũkwona ũtonya kwĩsa kũtuma mũtekalanyʼa nesa ethĩwa mũkatwaana? Nĩ ũndũ wĩva mũtonya kwĩtĩkĩlana mwĩ elĩ?
Mũũme na mũka no methĩwe mendeeawʼa nĩ maũndũ me kĩvathũkanyʼo na me na nguma syĩ kĩvathũkanyʼo, ĩndĩ mayĩthĩwa na mũtwaano wĩ na ũtanu. Lilikana kana kwĩthĩwa mwaĩlanĩte kũyonanasya kana mũvwʼanene maũndũnĩ onthe. Mavinda amwe, mũndũ na mũka no memanyĩsye kũtanĩaa maũndũ ala mendetwe nĩ ũla ũngĩ, o na no matetheke nĩ nguma sya ũla ũngĩ. a
Kĩvathũkanyʼo na ũu, nĩ ũndũ wa vata mũndũ ũla ũũtwaana nake ethĩwe aatĩĩaa myolooto ĩvwʼanene na yaku. Myolooto ĩsu nĩ vamwe na maũndũ ala ũĩkĩĩaa, maũndũ makonetye mwĩkalĩle, na kwĩka kĩla kyaĩle na kĩla kĩtaĩle. Ethĩwa ũu tiwʼo vailye, manya kana yĩu nĩyo ĩvinda ya kũmina ndũũ yenyu.
Kwa ngelekanyʼo, sũanĩa ĩũlũ wa andũ elĩ ma ndĩni syĩ kĩvathũkanyʼo. Ĩvuku, Fighting for Your Marriage yaĩtye: “Ĩvinda yonthe ũkunĩkĩli wonanasya kana vethĩawa ve laisi mũno kwa andũ elĩ ma ndĩni syĩ kĩvathũkanyʼo kũthasya mũtwaano.”
Mwolooto wĩ Mbivilianĩ: “Mũikatate kũvulana na andũ mate etĩkĩli ta mũvwʼanene namo, nĩkwĩthĩwa ũu ndũtonyeka.”—2 Akolintho 6:14, Good News Translation.
Ũndũ ũtonya kwĩka ũtwi
Mbivilia yaĩtye kana ala matwaana “makeethĩwa na woo na kyeva.” (1 Akolintho 7:28, The New English Bible) Kwoou ndũkasengʼe ethĩwa nĩwambĩĩie kwĩthĩwa na maũndũ ta asu ĩvindanĩ yĩĩ mũkwĩvaanyʼa.
Tũmathĩna o tũnini tũyonanasya kana mũtwaano wenyu ndũkethĩwa na ũtanu. Ĩkũlyo nĩ atĩĩ: No mũmine mathĩna asu kwa nzĩa ya mũuo? Vate nzika, mũkendeka mwĩthĩwe na ũtũĩka wa kwĩka ũu ĩla mwĩtwaana.
Mwolooto wĩ Mbivilianĩ: “Ĩwʼanĩai tei na ĩnee, na mũiekeanĩa o tondũ Ngai wamũekeie na ngenda kwĩsĩla Klĩsto.”—Aeveso 4:32.
Kĩvathũkanyʼo na ũu, ethĩwa nĩmũemanawa mũno kĩla ĩvinda, ũu wĩonanyʼa kana no mwĩthĩwe mũtaĩlanĩte. Ethĩwa vailye ũu, nũseo yu mũkambĩĩa kũmantha nĩkĩ mũemanawa mũno vandũ va kwĩsa kwĩka ũu ĩtina!
Ethĩwa mavinda maingĩ nĩmũemanawa mũno, ũu no wonanyʼe kana mũyaĩlanĩte
Ũndũ ũla wa vata: Ethĩwa wĩ na nzika mbingĩ ĩũlũ wa mũndũ ũla ũkwĩvaanyʼa nake, kana wĩ na nzika ethĩwa nĩwĩyũmbanĩtye nesa kwondũ wa mũtwaano, ndũkavũthĩĩsye nzika isu!
Mwolooto wĩ Mbivilianĩ: “Mũndũ wĩ kĩlĩko nĩwonaa ũthũku, na kwĩvitha; ĩndĩ ala mate ũmanyi nĩmaendeeaa, na kũthĩna.”—Nthimo 22:3.
Ũndũ ũtonya kwĩka watwʼa kũmina ndũũ
Kũmina ndũũ nĩkũtonya kũkũũmĩĩsya mũno. Ĩndĩ, ethĩwa ũmwe kana mwĩ elĩ kwa ĩvinda yĩasa nĩmwĩthĩĩtwe na nzika ĩũlũ wa ndũũ yenyu, wĩthĩwa ne ũndũ waĩlĩte vyũ mũkamina ndũũ ĩsu.
Mũtonya kwĩka ũu ata? Nũseo mũno mũikamine ndũũ yenyu kwa kũandĩkĩana mesengyi kana email ethĩwa vai ũndũ ũũmũlasimĩthya kwĩka ũu. Vandũ va ũu, manthai ĩvinda yaĩlĩte na vandũ vaĩlĩte mũneenee ũtwi ũsu mũito mwĩ vamwe.
Mwolooto wĩ Mbivilianĩ: “Neenaai wʼo kĩla mũndũ na mũtũi wake.”—Nzekalia 8:16.
Kwʼo kũmina ndũũ kwĩonanyʼa nĩwaemwa vyũ? Tiwʼo o na vanini. Lilikana kana kwĩvaanyʼa kwaĩlĩte kũũtetheesya wĩke ũtwi wa kũtwaana kana kũlea kũtwaana. O na ethĩwa ndũũ yenyu nĩyathela, ve o maũndũ ma vata ũtonya kwĩmanyĩsya kumana na ũndũ ũsu.
Ĩkũlye-ĩ: ‘Neemanyĩsya kyaũ ĩũlũ wakwa kumana na ndũũ ĩsu? Wʼo ũndũ ũsu nĩwoonanyʼa kana ve vandũ naĩlĩte kwaĩlangya? Nĩ moalyũku meva naĩlĩte kwĩka natwʼa kwambĩĩsya kwĩvaanyʼa ĩngĩ?’
a Nĩ kenda ũelewe nesa ũndũ mathĩna asu matonya kũũmĩsya mũũme na mũka, sisya ilungu, “Msaada kwa Ajili ya Familia—Mapendezi Yanapotofautiana” na “Ũtethyo Kwondũ wa Andũ ma Mũsyĩ—Kwĩthĩwa na Woni Waĩle Ĩũlũ wa Mĩtuo ya Kũthatya ya Ũla Ũtwaanĩte Nake.”
No Wendeewʼe Nĩ Ii
ANDŨ MA MŨIKA MAKŨLASYA
Nĩnĩyũmbanĩtye Kwĩvaanyʼa Kana Kwĩvaaawʼa?
Maũndũ atano matonya kũũtetheesya kũmanya ethĩwa nĩwĩyũmbanĩtye kwondũ wa kwĩvaanyʼa kana kwĩvaawʼa na mũtwaano.
ANDŨ MA MŨIKA MAKŨLASYA
Naĩle Kwĩkwatya Maũndũ Methĩwe Mailye Ata Yĩla Tũkwĩvaanyʼa?
Maũndũ atatũ mwaĩle kũsũanĩa o ũndũ mũendeee na kwĩvaanyʼa.
VITIO SYA KATUNI ŨVWAŨNĨ
Ũtonya Kũmanya Ata Kana Nĩ Wendo wa Wʼo?
Vathũkanyʼa wendo wa wʼo na wendo ũte wa wʼo.
