Mbivilia Yaasya ata Ĩũlũ wa Nyamũ Syeetawa Dinosaurs?
Ũndũ Mbivilia yaasya
Vaiĩ vandũ Mbivilia ĩwetete ĩmwe kwa ĩmwe ĩũlũ wa dinosaurs. Ĩndĩ o na vamwe na ũu, Mbivilia yonanasya kana Ngai “nĩwoombie syĩndũ syonthe,” kwoou veonekana kana nyamũ isu nĩ imwe katĩ wa ila woombie. a (Ũvuanyʼo 4:11) O na kau vaiĩ vandũ Mbivilia ĩwetete ĩũlũ wa dinosaurs, nĩwetaa mĩthemba ĩmwe ya nyamũ ila dinosaurs itonya kwĩthĩwa syĩ nthĩnĩ wayo:
“Mĩkũnga mĩnene.”—Mwambĩlĩlyo 1:21.
“Kĩla kĩndũ kĩtambũkaa ĩũlũ wa nthĩ.”—Mwambĩlĩlyo 1:25.
“Nyamũ sya kũũ nthĩ.”—Mwambĩlĩlyo 1:25.
Syo dinosaurs syaumie nyamũnĩ ingĩ?
Syĩndũ sya tene ila syonanasya kana dinosaurs syaĩ kwʼo, syonanasya kana syaĩ kwʼo o ĩvinda yĩmwe vandũ va kwĩthĩwa syaumie nyamũnĩ ingĩ. Ũndũ ũsu nĩwosanĩte nesa na kĩla Mbivilia ĩmanyĩasya kana Ngai nĩwe woombie nyamũ syonthe. Kwa ngelekanyʼo, ĩandĩko ya Savuli 146:6 yĩeleasya kana Ngai nĩwe “watwʼĩkĩthisye ĩtu na nthĩ, na ũkanga, na syonthe ila syĩ nthĩnĩ wasyo.”
Yo dinosaurs syaĩ kwʼo ĩndĩĩ?
Mbivilia yonanasya kana nyamũ sya ũkanganĩ na ila itambũkaa ĩũlũ wa nthĩ syoombiwe mũthenya wa katano na wa thanthatũ wa wũmbi. b (Mwambĩlĩlyo 1:20-25, 31) Kwoou Mbivilia yonanasya kana no kwĩthwa dinosaurs syoombiwe na ikaendeea kwĩthĩwa vo kwa ĩvinda yĩasa.
Yo Behemoth na Leviathani syaĩ dinosaurs?
Aiee. O na kũtwʼĩka nyamũ isu iwetetwe ĩvukunĩ ya Yovu iyĩsa kũmanyĩka nesa, Behemoth yĩsĩkĩe tayo nguũ nayo Leviathani tayo kĩngʼangʼi. No twĩtĩkĩlane na ũndũ ũsu twasũanĩa ũndũ nyamũ isu ieleetwʼe Maandĩkonĩ. (Yovu 40:15-23; 41:1, 14-17, 31) Kwoou no twasye kana vaiĩ kĩtumi o na kĩmwe kya kũĩkĩĩa kana “Behemoth” na “Leviathani” syaĩ dinosaurs. Ngai atavĩtye Yovu ose ĩvinda asisye nyamũ isu nesa, na nĩtwĩsĩ kana Yovu aĩ thayũ myaka mingĩ ĩtina wa dinosaurs kwĩthĩwa syathelile.—Yovu 40:16; 41:8.
Nĩ kyaũ kyatumie dinosaurs ithela?
Mbivilia ndĩeleasya nĩkĩ dinosaurs syathelile. Ĩndĩ nĩyĩeleasya kana syĩndũ syonthe syoombiwe “nũndũ wa kwenda [kwa Ngai],” kwoou vate nzika Ngai aĩ na kĩeleelo kĩseo kya kũmba dinosaurs. (Ũvuanyʼo 4:11) Yĩla kĩeleelo kĩu kyeanĩie, Ngai nĩwaekie nyamũ isu syathela.
a Ve syĩndũ sya tene syenziwe nthĩ syonanasya kana ve ĩvinda dinosaurs syaĩ kwʼo. Syĩndũ isu syonanasya kana ve ĩvinda dinosaurs syaĩ mbingĩ na syaĩ na ũnene na mĩthemba yĩ kĩvathũkanyʼo.
b Mbivilianĩ, ndeto “mũthenya” no ĩtũmĩwe kwonanyʼa ĩvinda ya myaka ngili mbingĩ.—Mwambĩlĩlyo 1:31; 2:1-4; Aevelania 4:4, 11.
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Yo Saenzi na Mbivilia Nikwatĩanĩaa?
Ve maũndũ mate ma wʼo ĩũlũ wa saenzi me nthĩnĩ wa Mbivilia?
MOMANYĨSYO MA VATA MA MBIVILIA
Nthĩ na Matu Syeekie Kũmbwa?
Andũ aingĩ maieleawa nĩ ngewa ĩla yĩ Mbivilianĩ ĩũlũ wa wũmbi, na angĩ mamyonaa ta wano. Kĩla Mbivilia ĩwetete ĩũlũ wa vala nthĩ na matu syaumie nĩ kya kũĩkĩĩka?
MAKŨLYO ATANO MA VATA ĨŨLŨ WA VALA THAYŨ WAUMIE
W’o Thayũ Wambĩĩie Ata?
Kũmanya ũsungĩo wa ĩkũlyo yĩu no kũtume wĩthĩwa na woni mũseo ĩũlũ wa thayũ.
MOMANYĨSYO MA VATA MA MBIVILIA
Nĩkĩ Ngai Woombie Nthĩ?
Nthĩ yitũ yusĩe syĩndũ mbanake. Ngai Amĩiie ũasanĩ ũla waĩlĩte kuma vala ve sua na amĩseũvya weethĩa yĩthiũũka ũndũ vaĩlĩte. Nĩkĩ Ngai weekĩie kĩthito kingĩ mũno kũmba nthĩ?
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.