Ndevili na ndaimoni matongoesye andũ naĩ mũno nginya Mbivilia ĩkasya kana, “ũla mũthũku nĩwe ũtongoesye nthĩ yonthe.” (1 Yoana 5:19, New Century Version) Mbivilia nĩyonanĩtye nzĩa ila Ndevili ũtũmĩaa kũtongoesya andũ naĩ.

•   Ũkengani. Mbivilia yĩkĩĩte Aklĩsto vinya ‘masiĩĩe mawũĩ ma Satani.’ (Aeveso 6:11) Nzĩa ĩmwe ya mawũĩ ĩla Satani ũtũmĩaa nĩ kũkenga andũ maĩkĩĩe kana athũkũmi make methĩawa maimũthũkũma Ngai.​—2 Akolintho 11:13-​15.

•   Kũneenanyʼa na maveva. Ndevili akengete andũ kwĩsĩla ala maneenanasya na maveva, ala mombasya ithitũ, na ala maũasya. (Kũtũngĩlĩlwa Kwa Mĩao 18:10-12) Kũtũmĩa ndawa sya kũmila, kũeka kũthũkũmĩthya kĩlĩko, na kũlekya kĩlĩko kyangange vate ũndũ mũndũ ũkũsũanĩa, no itume mũndũ ambĩĩa kũtongoewʼa nĩ ndaimoni.​—Luka 11:24-​26.

•   Ndĩni sya ũvũngũ. Ndĩni ila imanyĩasya ũvũngũ nitumaa andũ maeka kũmwĩwʼa Ngai. (1 Akolintho 10:20) Mbivilia yĩtĩte momanyĩsyo asu ma ũvũngũ “momanyĩsyo ma ndaimoni.”​—1 Timotheo 4:1.

•  Kũlikwa nĩ ndaimoni. Mbivilia nĩwetete andũ maĩ na ndaimoni. Mavinda amwe andũ asu nĩmaekaa kwona, kũneena, kana makeeyĩũmĩsya.​—Mathayo 12:22; Maliko 5:​2-5.

Ũndũ ũtonya kwĩka nĩ kana ndũkatongoewʼe naĩ nĩ Ndevili

 Ndwaĩlĩte kwĩkalaa ũikĩa ndaimoni, nũndũ Mbivilia nĩyonanĩtye ũndũ ũtonya kũmũsiĩĩa Ndevili:

•   Manya nzĩa ila Ndevili ũtũmĩaa nĩ kana ndũkethĩwe ‘ũtesĩ mosũanĩo make.’​—2 Akolintho 2:11.

•   Soma Mbivilia ũkwate ũmanyi, na ũitũmĩa ũmanyi ũsu. Kũatĩĩa myolooto ya Mbivilia kũkaũsiĩĩa ndũkakengeke nĩ nzĩa sya Ndevili.​—Aeveso 6:​11-​18.

•   Vetanga kĩndũ o na kĩva kĩla kĩkonanĩtye na ndaimoni. (Meko ma Atũmwa 19:19) Syĩndũ isu nĩ ta mbathi, mavuku, makaseti, mathangũ ala mombĩĩawa kũndũ, na vitio ila syĩthĩawa na maũndũ ma ndaimoni.