Ngai oombie mũndũũme na mũndũ mũka, mamanyanae kĩ-mwĩĩ o nthĩnĩ wa mũtwaano ve voka. (Mwambĩlĩlyo 1:​27, 28; Alivai 18:22; Nthimo 5:​18, 19) Mbivilia nĩleete andũ matatwaanĩte maimanyana kĩ-mwĩĩ, methĩwe nĩ mũndũũme na mũndũ mũka, mũndũũme na mũndũũme kana mũndũ mũka na mũndũ mũka. (1 Akolintho 6:​18) Mbivilia ĩleete andũ asu matatwaanĩte mayĩka maũndũ ta kũkoma na mũndũ, kũkwatanga mamutha ma mũndũ ma ũsyai, kũtũmĩa mũnuka kũamũkya mamutha ma ũsyai ma mũndũ ũngĩ, na kũkoma na mũndũ kwĩsĩla kĩtimba.

 O na kau Mbivilia nĩvatanĩte mũndũũme aikoma na mũndũũme kana mũndũ mũka kũkoma na mũndũ mũka, ndyaĩtye tũmene andũ asu. Vandũ va ũu, Aklĩsto mathuthĩtwʼe ‘manenge andũ onthe ndaĩa.’​—1 Vetelo 2:17, Good News Translation.

 Mũndũũme ũkomaa na mũndũũme ũngĩ kana mũndũ mũka ũkomaa na mũndũ mũka ũngĩ no ethĩwe asyaiwe na wendi ũsu?

Mbivilia ndĩeleetye andũ ta asu masyaawa me na wendi ũilyĩ ata, ĩndĩ nĩyonanĩtye kana andũ onthe masyaawa me na mwelekelo wa kũleana na mĩao ya Ngai. (Alomi 7:​21-​25) Vandũ va kũneenea kĩla kĩtumaa mũndũ ethĩwa na wendi ta ũsu, Mbivilia yĩkĩte kũleana na meko ta asu.

 Aũme ala methĩawa na wendi wa kũkoma na aũme, na aka ala methĩawa na wendi wa kũkoma na aka matonya kwĩka ata nĩ kana mamwendeesye Ngai?

Mbivilia yaĩtye atĩĩ: “Ndũkatongoewʼe nĩ mwĩĩ waku. Ũaa wendi wʼonthe ũtaĩle wa kũkoma na mũndũ.” (Akolosai 3:5, Contemporary English Version) Nĩ kana mũndũ oae wendi mũthũku ũla ũtonya kũtuma eka maũndũ mataĩle, no mũvaka atũmĩe nesa ũtonyi wake wa kũsũanĩa. Ethĩwa ũkeekĩaa maũndũ maseo kĩlĩkonĩ kyaku, nĩ ũndũ ũtonyeka ũkaeka kwĩthĩwa na wendi mũthũku. (Avilivi 4:8; Yakovo 1:​14, 15) O na kau mbeenĩ no wĩthĩwe wĩ ũndũ wĩ vinya kwĩka ũu, ĩtina no vatonyeke. Ngai aĩtye kana akaũtetheesya ‘ũtwʼĩkĩthwʼe mweũ vevanĩ wa kĩlĩko kyaku.’​—Aeveso 4:​22-​24.

 O namo aũme ala methĩawa na wendi wa kũkoma na aka, kana aka ala methĩawa na wendi wa kũkoma na aũme nĩmokitanaa na wendi ũsu nĩ kana mekale kwosana na myolooto ya Mbivilia. Kwa ngelekanyʼo, ala matatwaanĩte kana mate atwae na mekwona ta matesa kũtwaana kana kũtwawa, kana ala me nthĩnĩ wa mũtwaano na ũyĩthĩa ũmwe ndatonya kwĩanĩsya wendi wa kũmanyana kĩ-mwĩĩ wa ũla ũngĩ, nĩmatataa kũsiĩĩa wendi ũsu o na ĩla matatwa. Nũndũ wa kwĩka ũu, methĩawa matonya kwĩkala me atanu.  Kwoou, o namo aũme ala methĩawa na wendi wa kũkoma na aũme, kana aka ala methĩawa na wendi wa kũkoma na aka no makĩlye vinya wendi ũsu ethĩwa nĩmekwenda kũmwendeesya Ngai.​—Kũtũngĩlĩlwa Kwa Mĩao 30:19.